മുംബൈ: ഇന്ത്യന് ഓഹരി വിപണിയില് നിലവിലുള്ള ഇടിവ് നിക്ഷേപകര്ക്ക് മികച്ച അവസരമാണെന്ന് പ്രമുഖ ഫണ്ട് ഹൗസായ Quant Mutual Fund വിലയിരുത്തുന്നു. കോവിഡ് കാലത്തിന് ശേഷമുള്ള ഏറ്റവും വലിയ വാങ്ങല് അവസരമാണ് നിലവിലെ സാഹചര്യത്തിലൂടെ തുറന്നുകിട്ടുന്നതെന്ന് ഫണ്ട് ഹൗസ് നിക്ഷേപകര്ക്ക് നല്കിയ കുറിപ്പില് വ്യക്തമാക്കുന്നു.
2020-ലെ COVID-19 വ്യാപന സമയത്ത് വിപണി കുത്തനെ ഇടിഞ്ഞതിന് പിന്നാലെ വലിയ ലാഭ സാധ്യതകള് സൃഷ്ടിക്കപ്പെട്ടിരുന്നു. അതിന് സമാനമായ ഒരു സാഹചര്യമാണ് ഇപ്പോഴുണ്ടാകുന്നതെന്നും ക്വാണ്ട് ഫണ്ട് ചൂണ്ടിക്കാട്ടുന്നു. വിപണിയിലെ ആശങ്കകള് കുറഞ്ഞുവരികയും മുന്നിലുള്ള കാലഘട്ടത്തില് ഉയര്ച്ചയ്ക്കുള്ള സാധ്യത ശക്തമാണെന്നും അവരുടെ വിശകലനത്തില് പറയുന്നു.
കഴിഞ്ഞ ചില മാസങ്ങളായി തങ്ങളുടെ സ്കീമുകളില് ഗണ്യമായ തുക പണമായി സൂക്ഷിച്ചിരുന്ന ക്വാണ്ട്, വിപണി താഴേക്ക് പോകുമ്പോള് കുറഞ്ഞ വിലയില് ഓഹരികള് സ്വന്തമാക്കാനുള്ള തന്ത്രമാണ് സ്വീകരിച്ചത്. ഇപ്പോള് വിപണി അനുകൂലമാകുന്നുവെന്ന വിലയിരുത്തലോടെ ഈ നിക്ഷേപം ഘട്ടംഘട്ടമായി വിപണിയിലേക്ക് ഇറക്കിത്തുടങ്ങിയിട്ടുണ്ട്.
നിക്ഷേപത്തില് സുരക്ഷ മുന്നിര്ത്തി വന്കിട കമ്പനികളുടെ ഓഹരികള്ക്കാണ് (ലാര്ജ് ക്യാപ്) മുന്ഗണന. അതേസമയം, തിരഞ്ഞെടുത്ത ഇടത്തരം, ചെറിയ കമ്പനികളിലേക്കും നിക്ഷേപം വര്ധിപ്പിച്ചിട്ടുണ്ട്. ബാങ്കിംഗ്, ഇന്ഷുറന്സ്, ഇന്ഫ്രാസ്ട്രക്ചര്, എനര്ജി, ഫാര്മസ്യൂട്ടിക്കല്സ്, ടെലികോം മേഖലകളിലാണ് കൂടുതല് പ്രതീക്ഷ പ്രകടിപ്പിക്കുന്നത്. എന്നാല് മാനുഫാക്ചറിംഗ് മേഖലയോട് തല്ക്കാലം ജാഗ്രത പുലര്ത്തുന്നു.
ആഗോളതലത്തില് സാമ്പത്തിക മാന്ദ്യത്തെക്കുറിച്ചുള്ള ആശങ്കകള് നിലനില്ക്കുന്നുണ്ടെങ്കിലും ഇന്ത്യയുടെ സാമ്പത്തിക അടിത്തറ ശക്തമാണെന്ന് ഫണ്ട് ഹൗസ് വിലയിരുത്തുന്നു. കേന്ദ്ര സര്ക്കാരിന്റെയും Reserve Bank of Indiaയുടെയും ഇടപെടലുകള് ഇന്ത്യന് വിപണിയെ സ്ഥിരതയോടെ മുന്നോട്ടു നയിക്കുന്നതായും പറയുന്നു.
വിപണിയിലെ താല്ക്കാലിക ചാഞ്ചാട്ടങ്ങളെ ഭയപ്പെടാതെ, മികച്ച ഓഹരികള് കുറഞ്ഞ വിലയില് സ്വന്തമാക്കാനുള്ള അവസരമായി നിക്ഷേപകര് ഇതിനെ കാണണമെന്നും ദീര്ഘകാലാടിസ്ഥാനത്തില് മികച്ച ലാഭം പ്രതീക്ഷിക്കാമെന്നും ക്വാണ്ട് മ്യൂച്വല് ഫണ്ട് നിര്ദേശിക്കുന്നു.