ഉത്തരാഖണ്ഡില്‍ വന്‍ഹിമപാതം ഹിമപാതത്തില്‍ കുടുങ്ങിയത് 47 തൊഴിലാളികള്‍ രക്ഷാപ്രവര്‍ത്തനം തുടരുന്നു
ചമോലി (ഉത്തരാഖണ്ഡ്): ഉത്തരാഖണ്ഡിലെ ചമോലി ജില്ലയില്‍ വന്‍ ഹിമപാതത്തില്‍ റോഡ് നിര്‍മാണത്തില്‍ ഏര്‍പ്പെട്ടിരുന്ന 47 തൊഴിലാളികള്‍ വലിയ മഞ്ഞുപാളികള്‍ക്കിടയില്‍ കുടുങ്ങി.
ബോര്‍ഡര്‍ റോഡ്‌സ് ഓര്‍ഗനൈസേഷന്‍ ക്യാമ്പിലെ നിര്‍മാണ തൊഴിലാളികളാണ് മഞ്ഞുപാളികള്‍ക്കിടയില്‍ കുടുങ്ങിയത്. ബദരീനാഥിലെ മന ഗ്രാമത്തിന്റെ അതിര്‍ത്തി പ്രദേശത്ത് ഇവര്‍ ജോലി ചെയ്യുകയായിരുന്നുവെന്ന് ഉദ്യോഗസ്ഥര്‍ പറഞ്ഞു.
ഐടിബിപിയില്‍ നിന്നും സൈന്യത്തില്‍ നിന്നുമുള്ള ഉദ്യോഗസ്ഥര്‍ രക്ഷാപ്രവര്‍ത്തനത്തില്‍ ഏര്‍പ്പെട്ടിട്ടുണ്ടെന്ന് ഉത്തരാഖണ്ഡ് മുഖ്യമന്ത്രി പുഷ്‌കര്‍ സിംഗ് ധാമി പറഞ്ഞു.
57 തൊഴിലാളികളില്‍ 16 പേരെ രക്ഷപ്പെടുത്തിയിട്ടുണ്ട്. അതേസമയം, രക്ഷാപ്രവര്‍ത്തനം പുരോഗമിക്കുകയാണെന്നും കനത്ത മഞ്ഞുവീഴ്ച കാരണം സംഘം ബുദ്ധിമുട്ടുകള്‍ നേരിടുന്നുണ്ടെന്നും ബിആര്‍ഒ എക്‌സിക്യൂട്ടീവ് എഞ്ചിനീയര്‍ സി.ആര്‍. മീന പറഞ്ഞു
ഇന്തോ-ടിബറ്റന്‍ ബോര്‍ഡര്‍ പോലീസും ബിആര്‍ഒയും ദുരിതാശ്വാസ, രക്ഷാപ്രവര്‍ത്തനങ്ങള്‍ നടത്തുന്നുണ്ടെന്ന് ഉത്തരാഖണ്ഡ് മുഖ്യമന്ത്രി പുഷ്‌കര്‍ സിംഗ് ധാമി പറഞ്ഞു.
ഇന്ത്യന്‍ സൈന്യം, ഐടിബിപി, സംസ്ഥാന ദുരന്ത നിവാരണ സേന എന്നിവയിലെ ഉദ്യോഗസ്ഥരെ രക്ഷാപ്രവര്‍ത്തനത്തിനായി നിയോഗിച്ചിട്ടുണ്ടെന്ന് ചമോലി ജില്ലാ മജിസ്ട്രേറ്റ് സന്ദീപ് തിവാരി അറിയിച്ചു.
ജോഷിമഠില്‍ നിന്ന് എസ്ഡിആര്‍എഫിന്റെ ഒരു സംഘം പുറപ്പെട്ടിട്ടുണ്ടെന്നും എന്നാല്‍ ലംബഗാഡിലെ റോഡ് തടസം കാരണം, സൈന്യവുമായി ബന്ധപ്പെട്ട് റൂട്ട് തുറക്കുന്നതിനുള്ള നടപടികള്‍ പുരോഗമിക്കുകയാണെന്നും എസ്ഡിആര്‍എഫ് ഇന്‍സ്പെക്ടര്‍ ജനറല്‍ ഓഫ് പൊലീസ് പറഞ്ഞു.
‘സഹസ്രധാര ഹെലിപാഡില്‍ രണ്ടാമത്തെ സംഘത്തെ ജാഗ്രതയില്‍ നിര്‍ത്തിയിരിക്കുകയാണ്. പ്രദേശത്തിന്റെ കൃത്യമായ കോര്‍ഡിനേറ്റുകളും ലഭിച്ചു. കാലാവസ്ഥ മെച്ചപ്പെട്ടാലുടന്‍, എസ്ഡിആര്‍എഫിന്റെ ഉയര്‍ന്ന ഉയരത്തിലുള്ള രക്ഷാസംഘത്തെ ഏറ്റവും അടുത്തുള്ള സ്ഥലത്ത് ഹെലികോപ്റ്ററില്‍ ഇറക്കും,’ അഗര്‍വാള്‍ പറഞ്ഞു.
മാത്രമല്ല, എസ്ഡിആര്‍എഫും ജില്ലാ ഭരണകൂടവും ബിആര്‍ഒയുടെയും സൈന്യത്തിന്റെയും ഉദ്യോഗസ്ഥരുമായി ഏകോപിപ്പിക്കുന്നു.
‘എസ്ഡിആര്‍എഫ് ഡ്രോണ്‍ സംഘത്തെയും സജ്ജരാക്കിയിട്ടുണ്ട്. കനത്ത മഞ്ഞുവീഴ്ച കാരണം, ഇപ്പോള്‍ ഡ്രോണ്‍ പ്രവര്‍ത്തനങ്ങള്‍ സാധ്യമല്ല,’ അദ്ദേഹം കൂട്ടിച്ചേര്‍ത്തു.
