അമേരിക്ക നല്‍കിയ പിന്തുണയ്ക്കും സൈനിക സഹായത്തിനും നന്ദി’; ട്രംപുമായുളള തര്‍ക്കത്തിന് പിന്നാലെ സെലന്‍സ്‌കി
കീവ്: അമേരിക്കയ്ക്കും പ്രസിഡന്റ് ഡൊണാള്‍ഡ് ട്രംപിനും നന്ദി പറഞ്ഞ് യുക്രെയ്ന്‍ പ്രസിഡന്റ് വ്‌ളാദിമിര്‍ സെലന്‍സ്‌കി. അമേരിക്ക നല്‍കിയ പിന്തുണയ്ക്കും സൈനിക സഹായത്തിനും നന്ദി അറിയിക്കുന്നുവെന്നാണ് സെലന്‍സ്‌കിയുടെ പ്രതികരണം. വൈറ്റ് ഹൗസില്‍ ട്രംപുമായുള്ള കൂടിക്കാഴ്ച രൂക്ഷമായ വാക്‌പോരില്‍ കലാശിച്ചതിന് പിന്നാലെയാണ് സെലന്‍സ്‌കിയുടെ പ്രതികരണമെന്നത് ശ്രദ്ധേയമാണ്.
എക്‌സിലാണ് സെലന്‍സ്‌കി പ്രതികരണം പങ്കുവെച്ചത്. യുക്രെയ്ന്‍ ജനത അമേരിക്കയുടെ പിന്തുണയെ വിലമതിച്ചിട്ടുണ്ടെന്ന് സെലന്‍സ്‌കി പറഞ്ഞു. തങ്ങള്‍ക്ക് അതിജീവിക്കാന്‍ അമേരിക്കയുടെ സഹായം പ്രധാനമാണ്. അത് അംഗീകരിക്കാന്‍ താന്‍ ആഗ്രഹിക്കുന്നു. തങ്ങള്‍ യുദ്ധത്തിനൊപ്പം ജീവിക്കുന്നവരാണ്. തങ്ങളേക്കാള്‍ സമാധാനം ആഗ്രഹിക്കുന്നവരായി ആരും ഉണ്ടാവില്ല. ഇത് സ്വാതന്ത്ര്യത്തിനും സമാധാനത്തിനും വേണ്ടിയുളള പോരാട്ടമാണെന്നും സെലന്‍സ്‌കി എക്‌സിലൂടെ വ്യക്തമാക്കി.
