വൈറ്റ് ഹൗസിൽ പിരിച്ചുവിട്ട ജീവനക്കാരെ തിരിച്ചുനിയമിക്കുമോ?

സുപ്രീം കോടതിയിൽ ട്രംപിന്റെ ഹർജി

വാഷിംഗ്ടൺ (Washington): വൈറ്റ് ഹൗസ് പിരിച്ചുവിട്ട ആയിരക്കണക്കിന് സർക്കാർ ജീവനക്കാരെ തിരിച്ചുനിയമിക്കണമെന്ന് ആവശ്യപ്പെട്ട കീഴ്ക്കോടതിയുടെ വിധിക്ക് സ്റ്റേ നൽകണമെന്ന് ആവശ്യപ്പെട്ട് അമേരിക്കൻ പ്രസിഡന്റ് ഡൊണാൾഡ് ട്രംപ് സുപ്രീം കോടതിയെ സമീപിച്ചു. ഫെഡറൽ ചെലവു നിയന്ത്രണത്തിന്റെ ഭാഗമായി പിരിച്ചുവിട്ട 16,000-ത്തിലധികം പ്രൊബേഷണറി തൊഴിലാളികളെ വീണ്ടും നിയമിക്കണമെന്ന ഉത്തരവ് ഒരു ഫെഡറൽ ജഡ്ജി നേരത്തെ നൽകിയിരുന്നു.

കുടിയേറ്റം, സർക്കാർ ചെലവുകൾ തുടങ്ങി വിവിധ വിഷയങ്ങളിൽ കോടതികൾ സർക്കാർ നയങ്ങളിൽ തടസം സൃഷ്ടിക്കുന്നുവെന്ന് ട്രംപിന്റെ ആക്ടിംഗ് സോളിസിറ്റർ ജനറൽ സാറാ ഹാരിസ് കുറ്റപ്പെടുത്തി. ഈ വിഷയത്തിൽ സുപ്രീം കോടതി എന്ത് നിലപാട് സ്വീകരിക്കും എന്നത് രാഷ്ട്രീയപരമായും ഭരണപരമായും നിർണായകമാണ്.

സ്കോളർഷിപ്പ് ധനസഹായം മരവിപ്പിക്കൽ: ഇന്ത്യൻ വിദ്യാർഥികൾ ആശങ്കയിൽ

ഫുൾബ്രൈറ്റ് ഉൾപ്പെടെയുള്ള സർക്കാർ ഫണ്ടിംഗ് സ്‌കോളർഷിപ്പുകൾക്ക് ധനസഹായം മരവിപ്പിക്കാനുള്ള യുഎസ് സ്റ്റേറ്റ് ഡിപ്പാർട്ട്മെന്റിന്റെ തീരുമാനം ആയിരക്കണക്കിന് ഇന്ത്യൻ വിദ്യാർഥികളെ ആശങ്കയിലാഴ്ത്തുന്നു. ഈ നീക്കം, അവരുടെ പഠനവും ഭാവിയുമെല്ലാം തകിടം മറിച്ചേക്കുമെന്ന ഭയത്തിലാണ് വിദ്യാർഥികൾ.

യുഎസിലെ ഉയർന്ന ചെലവ് കണക്കിലെടുത്താൽ, സ്കോളർഷിപ്പുകൾ ഇല്ലാതാകുന്നത് സാധാരണ വിദ്യാർഥികൾക്ക് വൻ ബാധ്യതയാകും. സ്റ്റൈപൻഡ് ഉപജീവനമാർഗ്ഗമായ വിദ്യാർഥികൾ ഇപ്പോൾ നിത്യചെലവുകൾക്കുപോലും ആശയക്കുഴപ്പത്തിലാണ്.

വിദ്യാർഥികളും കോളേജുകളും ആവർത്തിച്ച് വ്യക്തത ആവശ്യപ്പെട്ടിട്ടും ഫെഡറൽ ഉദ്യോഗസ്ഥർ ഇപ്പോഴും ഉറപ്പുനൽകാത്ത നിലയിലാണ്.

Highlights: Will the dismissed employees be reinstated in the White House