മമ്മൂട്ടിയുടെ ആശംസയോടെ ‘എമ്പുരാൻ’ തിയറ്ററുകളിലേക്ക്
മലയാള സിനിമ പ്രേമികൾ ആകാംക്ഷയോടെ കാത്തിരിക്കുന്ന ‘എമ്പുരാൻ’ നാളെ ലോകമെമ്പാടുമുള്ള തിയറ്ററുകളിൽ എത്തുകയാണ്. മോഹൻലാൽ മുഖ്യവേഷത്തിൽ എത്തുന്ന ഈ ചിത്രം പൃഥ്വിരാജാണ് സംവിധാനം ചെയ്യുന്നത്. റിലീസ് ദിനത്തിൽ മലയാള സിനിമയ്ക്ക് ഒരു മഹത്തായ വിജയം നേടാനാകുമെന്ന പ്രതീക്ഷയിലാണ് ആരാധകർ.
ചിത്രത്തിന്റെ റിലീസിന് മുന്നോടിയായി മമ്മൂട്ടി തന്റെ സോഷ്യൽ മീഡിയ അക്കൗണ്ടുകൾ വഴി മോഹൻലാലിനും പൃഥ്വിരാജിനും അഭിനന്ദനങ്ങൾ നേർന്നു. “എമ്പുരാന്റെ മുഴുവൻ താരങ്ങൾക്കും അണിയറ പ്രവർത്തകർക്കും ഒരു ചരിത്ര വിജയം ആശംസിക്കുന്നു. ലോകത്തിൻറെ അതിരുകൾ ഭേദിച്ചുകൊണ്ട് മലയാള സിനിമയ്ക്ക് അഭിമാനം പകരുന്ന ചിത്രമാവുമെന്നതാണ് പ്രതീക്ഷ. പ്രിയ ലാൽ, പൃഥ്വി, നിങ്ങൾക്ക് എല്ലാ പിന്തുണയും,” എന്ന് മമ്മൂട്ടി കുറിച്ചു. ഈ കുറിപ്പിനൊപ്പം ചിത്രത്തിന്റെ പോസ്റ്ററും പങ്കുവെച്ചിട്ടുണ്ട്.
‘ലൂസിഫർ’ എന്ന സൂപ്പർഹിറ്റ് സിനിമയുടെ രണ്ടാം ഭാഗമായ ‘എമ്പുരാൻ’ ആക്ഷൻ ത്രില്ലർ ഗണത്തിൽപെടുന്ന ചിത്രം ആണ്. ഖുറേഷി അബ്രാം എന്നത് മുതൽ സ്റ്റീഫൻ നെടുമ്പള്ളി വരെ എത്തുന്ന കഥാപാത്രവുമായി മോഹൻലാൽ എത്തുമ്പോൾ, പൃഥ്വിരാജ്, മഞ്ജു വാര്യർ, ടൊവിനോ തോമസ്, ഇന്ദ്രജിത് സുകുമാരൻ, സുരാജ് വെഞ്ഞാറമൂട്, ജെറോം ഫ്ലിൻ, ഫാസിൽ, ബൈജു, ആൻഡ്രിയ ടിവാടർ, സാനിയ ഇയ്യപ്പൻ തുടങ്ങി വമ്പൻ താരനിര അണിനിരക്കുന്നു.
‘ഗെയിം ഓഫ് ത്രോൺസ്’ പരമ്പരയിലൂടെ പ്രശസ്തനായ ജെറോം ഫ്ലിൻ സിനിമയിലെ പ്രധാന കഥാപാത്രങ്ങളിൽ ഒരാളാകുന്നത് വലിയ ചർച്ചയായിട്ടുണ്ട്. അതുകൊണ്ടുതന്നെ, ഈ ചിത്രം അന്താരാഷ്ട്ര തലത്തിൽ കൂടി വലിയ സ്വാധീനം ചെലുത്തുമെന്നാണ് പ്രതീക്ഷ. ട്രെയ്‌ലർ പുറത്തിറങ്ങിയതുമുതൽ ചിത്രത്തിന് വലിയ സ്വീകാര്യതയാണ് ലഭിച്ചിട്ടുള്ളത്.
Highlights: With Mammootty’s Wishes, ‘Empuraan’ Hits Theatres
