മഹാരാഷ്ട്രയിൽ വീണ്ടും  ആരോഗ്യ പ്രശ്നം: ബുൽദാനയിലെ ഗ്രാമങ്ങളിൽ നഖങ്ങൾ കൊഴിഞ്ഞുപോകുന്നു

മുംബൈ(Mumbai): മഹാരാഷ്ട്രയിലെ ബുൽദാന ജില്ലയിൽ അതിസാധാരണ ആരോഗ്യ പ്രശ്നം വീണ്ടും വാര്‍ത്തയാകുന്നു. തലയിൽ ഒരു മുടിയുമില്ലാതെ പൂർണമായി കഷണ്ടിയാകുന്ന രീതിയിലുള്ള മുടികൊഴിച്ചിൽ റിപ്പോർട്ട് ചെയ്തതിന് പിന്നാലെ, ഇപ്പോൾ നഖങ്ങൾ തനിയെ പൊടിഞ്ഞു കൊഴിഞ്ഞുപോകുന്ന കേസുകളാണ് രേഖപ്പെടുത്തപ്പെടുന്നത്.

ജില്ലയിലെ ഷെഗാവ് താലൂക്കിലുള്ള നാല് ഗ്രാമങ്ങളിലാണ് പുതിയ പ്രതിഭാസം കണ്ടത്. മുപ്പതിലേറെ പേർക്ക് നഖങ്ങളിലുണ്ടായ മാറ്റങ്ങൾ ശ്രദ്ധേയമാണ്. ചിലർക്കത് പൂർണമായും വീണു പോയെന്നും ചിലർക്കത് പൊടിഞ്ഞതായും ബുൽദാനയിലെ ഹെൽത്ത് ഓഫീസർ ഡോ. അനിൽ ബങ്കർ പറഞ്ഞു. പ്രാഥമിക ചികിത്സ ലഭിച്ച ശേഷം രക്തസാമ്പിളുകൾ വിദഗ്ധ പരിശോധനയ്ക്കായി അയച്ചതായും അദ്ദേഹം അറിയിച്ചു.

ഗ്രാമങ്ങളിൽ ആരോഗ്യമുള്ളവർക്ക് പോലും നഖം കൊഴിയുന്നതും പൊടിയാകുന്നതുമാണ് പ്രധാനമായ ലക്ഷണം. “ആദ്യദിവസം ചെറിയ പൊട്ടലുകൾ കാണപ്പെട്ടു. അതിനു പിന്നാലെയാണ് നഖം തന്നെ വീണുപോയത്,” എന്ന് ഗ്രാമത്തിലെ സർപഞ്ച് റാം തർക്കർ പറഞ്ഞു. സംഭവത്തെക്കുറിച്ച് ജില്ലാ ഹെൽത്ത് ഓഫീസ്, ആയുഷ് വകുപ്പ്, ആരോഗ്യ വകുപ്പ് മന്ത്രിമാരായ പ്രതാപ് റാവു ജാദവ് എന്നിവർക്കറിയിച്ചതായും അദ്ദേഹം അറിയിച്ചു.

ഇത് ആദ്യമായല്ല ബുൽദാനയിൽ ആരോഗ്യ പ്രശ്നങ്ങൾ റിപ്പോർട്ട് ചെയ്യുന്നത്. 2024 ഡിസംബർ മുതൽ 2025 ജനുവരി വരെ സമാനമായ സാഹചര്യത്തിൽ 279 പേർക്ക് തലയിലെ മുടി പെട്ടെന്ന് വീണുപോയി. തലവേദന, ചൊറിച്ചിൽ, വയറിളക്കം തുടങ്ങിയ ലക്ഷണങ്ങൾ അനുഭവപ്പെട്ടതിനു പിന്നാലെയാണ് മുടി വേരോടെ കൊഴിയുന്നത് തുടങ്ങിയത്.

പിന്നീട് നടന്ന പരിശോധനയിൽ ഗോതമ്പിൽ സെലീനിയം എന്ന രാസവസ്തുവിന്റെ അളവധികം സാന്നിധ്യമാണ് രോഗകാരണം എന്നാണ് കണ്ടെത്തിയത്. രക്തം, മൂത്രം, മുടി എന്നിവയിലെ പരിശോധനാ ഫലങ്ങളിൽ ഇത് സ്ഥിരീകരിച്ചു.

പുതിയ നഖവൈകല്യവും സെലീനിയം വിഷഭക്ഷണവുമായി ബന്ധപ്പെട്ടതാണോ എന്നത് ഇപ്പോൾ പരിശോധിക്കപ്പെടുകയാണ്. ജനങ്ങളുടെ ആരോഗ്യത്തിനായി കൂടുതൽ പരിശോധനകളും ഇടപെടലുകളും ആരോഗ്യ വകുപ്പ് ആരംഭിച്ചിരിക്കുകയാണ്.

Highlights: Health problem again in Maharashtra: Nails falling off in villages of Buldhana