പാലക്കാട് റെയില്‍വേ ഡിവിഷനിലെ കസേരയുംമേശയും എസിയും കമ്പ്യൂട്ടറും ജപ്തി ചെയ്ത് കോടതി
പാലക്കാട്: റെയില്‍വേ ഡിവിഷന് ഓഫീസിലെ കസേര, മേശ, എസി, കമ്പ്യൂട്ടര്‍ തുടങ്ങിയവ ജപ്തി ചെയ്യാന്‍ കോടതി ഉത്തരവ്.പാലക്കാട് റെയില്‍വേ ഡിവിഷന് കീഴിലെ റെയില്‍വേ സ്റ്റേഷനുകളില്‍ വാട്ടര്‍ പ്യൂരിഫയര്‍ സ്ഥാപിച്ച കമ്പനി ബില്‍ തുക കിട്ടാത്തതിനെ തുടര്‍ന്ന് കോടതിയെ സമീപിക്കുകയായിരുന്നു. നേരത്തെ, എം.എസ്.എം.ഇ ഫെസിലിറ്റേഷന്‍ കൗണ്‍സില്‍ റെയില്‍വേ സ്വകാര്യ കമ്പനിക്ക് തുക നല്‍കണമെന്ന് ഉത്തരവിട്ടിരുന്നു. ഇതിനെതിരെ റെയില്‍വേ, ചെന്നൈ ഹൈക്കോടതിയില്‍ അപ്പീല്‍ നല്‍കിയെങ്കിലും തള്ളി. തുടര്‍ന്ന് ചെറിയ തുക മാത്രമാണ് കമ്പനിക്ക് റെയില്‍വേ നല്‍കിയത്. മുഴുവന്‍ തുകയും കണ്ടെത്താന്‍ വേണ്ടി കമ്പനി പാലക്കാട് അഡീ. ജില്ലാ സെഷന്‍സ് കോടതിയെ സമീപിക്കുകയായിരുന്നു. ഇക്കഴിഞ്ഞ 25നാണ് കോടതി റെയില്‍വേയുടെ വസ്തുക്കള്‍ ജപ്തി ചെയ്തു വില്‍പ്പന നടത്തി കമ്പനിക്ക് പണം നല്‍കാന്‍ ഉത്തരവിട്ടത്. എന്നാല്‍ ഇതിനെതിരെ അപ്പീല്‍ നല്‍കുമെന്ന് പാലക്കാട് റെയില്‍വെ ഡിവിഷന് അറിയിച്ചു.
