ലിവർപൂൾ ആൻഡ് ഡിസ്ട്രിക്റ്റ് ക്രിക്കറ്റ് ടൂര്‍ണമെന്‍റിൽ സെഞ്ച്വറി നേടി അശുതോഷ് ശര്‍മ
ലണ്ടൻ(London): ഇംഗ്ലീഷ് ക്ലബ്ബ് ക്രിക്കറ്റില്‍ വീഗാന്‍ ക്രിക്കറ്റ് ക്ലബ്ബിനുവേണ്ടി സെഞ്ച്വറി നേടി അശുതോഷ് ശര്‍മ. ലിവര്‍പൂള്‍ ആന്‍ഡ് ഡിസ്ട്രിക്റ്റ് ക്രിക്കറ്റ് ടൂര്‍ണമെന്‍റിലാണ് ഫോംബൈ എഫ്‌സിക്കെതിരെ അശുതോഷ് 70 പന്തില്‍ സെഞ്ച്വറി നേടിയത്.
അഞ്ചാമനായി ക്രീസിലിറങ്ങിയാണ് അരങ്ങേറ്റത്തില്‍ തന്നെ അശുതോഷ് സെഞ്ച്വറി കുറിച്ചത്. ആദ്യം ബാറ്റ് ചെയ്ത വീഗാന്‍ ക്ലബ്ബ് 10 ഓവറില്‍ 17-3 എന്ന സ്കോറില്‍ ബാറ്റിംഗ് തകര്‍ച്ച നേരിടുമ്പോഴാണ് അശുതോഷ് ക്രീസിലെത്തിയത്. നാലാം വിക്കറ്റില്‍ അവീന്‍ ദലുഗോഡക്ക് ഒപ്പം 153 റണ്‍സ് കൂട്ടുകെട്ടുയര്‍ത്തിയശേഷമാണ് വേര്‍പിരിഞ്ഞത്. എട്ട് ബൗണ്ടറിയും ആറ് സിക്സും പറത്തിയാണ് അശുതോഷ് 70 പന്തില്‍ സെഞ്ച്വറി തികച്ചത്.
അതേസമയം അശുതോഷ് സെഞ്ച്വറി തികച്ച് 34-ാം ഓവറില്‍ പുറത്തായശേഷം മികച്ച കൂട്ടുകെട്ടുകളുണ്ടാക്കാന്‍ കഴിയാതിരുന്ന വീഗാന്‍ ക്ലബ്ബ് 52 ഓവറില്‍ 241 റൺസിന് ഓള്‍ ഔട്ടായി. മത്സരത്തില്‍ ഫോംബൈ ആറ് വിക്കറ്റിന് ജയിച്ചു. കഴിഞ്ഞ ഐപിഎല്‍ സീസണില്‍ പഞ്ചാബിനായി അരങ്ങേറിയ അശുതോഷ് 189 റണ്‍സ് നേടി ഫിനിഷറായി തിളങ്ങിയിരുന്നു. ഇത്തവണ ഡല്‍ഹി കുപ്പായത്തില്‍ കളിച്ച അശുതോഷ് 204 റണ്‍സാണ് ഐ പി എല്ലിൽ നേടിയത്.
Highlights: Ashutosh Sharma scores century in Liverpool and District Cricket Tournament
