വഖഫ് ഭേദഗതി ബിൽ പാർലമെന്റിന്റെ ഇരുസഭകളും പാസാക്കി; ഇനി രാഷ്ട്രപതിയുടെ ഒപ്പു മാത്രം ബാക്കി

ന്യൂഡല്‍ഹി(New Delhi): ലോക്സഭയ്ക്ക് ശേഷം രാജ്യസഭയും വഖഫ് ഭേദഗതി ബിൽ പാസാക്കി. രാജ്യസഭയിൽ 128 പേർ ബില്ലിനെ അനുകൂലിച്ചപ്പോൾ 95 പേർ എതിർത്ത് വോട്ട് ചെയ്തു. ഇന്നലെ പുലർച്ചെവരെ നീണ്ട ചർച്ചയ്ക്കൊടുവിൽ ലോക്സഭ പാസാക്കിയ ബിൽ കേന്ദ്ര സർക്കാർ വൈകാതെ രാജ്യസഭയിൽ അവതരിപ്പിച്ചു. 12 മണിക്കൂറിലേറെ നീണ്ട ചർച്ചയ്ക്ക് ശേഷമാണ് ഇന്നു പുലർച്ചെ 1.10ന് രാജ്യസഭയിൽ വോട്ടെടുപ്പ് ആരംഭിച്ചത്. പാർലമെന്റിന്റെ ഇരുസഭകളിലും ബിൽക്ക് അംഗീകാരം ലഭിച്ചതോടെ നിയമമാകാൻ രാഷ്ട്രപതിയുടെ ഒപ്പ് മാത്രമാണ് ഇനി ബാക്കി. രാജ്യസഭയും ബിൽ പാസാക്കിയതോടെ മുനമ്പത്ത് ആഹ്ലാദപ്രകടനങ്ങളുണ്ടായി. പ്രധാനമന്ത്രി നരേന്ദ്ര മോദിക്കും കേന്ദ്രമന്ത്രി സുരേഷ് ഗോപിക്കും പ്രകടനം നടത്തിയവർ ജയ് വിളിച്ചും അഭിനന്ദനം അറിയിച്ചു. മുനമ്പത്തെ പ്രശ്നങ്ങൾക്ക് തികച്ചും പരിഹാരമാകുമോ എന്ന ആശങ്കക്കൊപ്പം, സഭയിൽ വിശദീകരണം ആവശ്യപ്പെട്ടുപോയ കാര്യങ്ങളും നിലനില്ക്കുന്നു.

ലോക്സഭയിൽ ബിൽ പാസാകുന്നത് വ്യാഴാഴ്ച പുലർച്ചെ 1.56ന് ആണ്. 14 മണിക്കൂറോളം നീണ്ട ചർച്ചയ്ക്കും വോട്ടെടുപ്പിനുമൊടുവിലാണ് ഈ തീരുമാനം. ഹാജരായിരുന്ന 520 അംഗങ്ങളിൽ 288 പേർ അനുകൂലിച്ചപ്പോൾ 232 പേർ എതിർത്തു. കേരളത്തിൽ നിന്നുള്ള എംപിമാരിൽ സുരേഷ് ഗോപി ഒഴികെ 18 പേരും ബില്ലിനെതിരെ വോട്ട് ചെയ്തു. കോൺഗ്രസ് നേതാവായ പ്രിയങ്ക ഗാന്ധി വിദേശത്തായിരുന്നതിനാൽ സഭയിൽ പങ്കെടുത്തില്ല. വഖഫ് കൗൺസിൽ ഘടനയുമായി ബന്ധപ്പെട്ട എൻ.കെ. പ്രേമചന്ദ്രൻ അവതരിപ്പിച്ച ഭേദഗതി നിർദേശം 231–288 വോട്ടിനായിരുന്നു തള്ളപ്പെട്ടത്. നിലവിൽ ലോക്സഭയിൽ എൻഡിഎക്ക് 293 അംഗങ്ങളുടെയും ഇന്ത്യാ സഖ്യത്തിന് 3 സ്വതന്ത്രരടക്കം 236 അംഗങ്ങളുടെയും പിന്തുണയുണ്ട്.

1995ലെ വഖഫ് നിയമത്തിൽ നടത്തുന്ന ഭേദഗതിയാണ് ഇപ്പോഴത്തെത്. ഓഗസ്റ്റിൽ ബിൽ അവതരിപ്പിച്ച ശേഷം സംയുക്ത പാർലമെന്ററി സമിതിയുടെ പരിഗണനയ്ക്ക് വിട്ടിരുന്നു. ജെപിസിയുടെ നിർദേശങ്ങൾ ഉൾപ്പെടുത്തി നവീകരിച്ച ബിലാണ് ഇപ്പോൾ ഇരുസഭകളും പാസാക്കിയിരിക്കുന്നത്. ബിൽ പാർലമെന്റിൽ അവതരിപ്പിച്ചത് കേന്ദ്ര ന്യൂനപക്ഷകാര്യമന്ത്രി കിരൺ റിജിജുവാണ്.

Highlights: Waqf (Amendment) Bill 2025: Rajya Sabha passed Waqf Bill 2025 after hours long discussion.