എട്ട് ജില്ലകളിൽ റെഡ് അലർട്ട്; അതിതീവ്രമഴ തുടരും: സംസ്ഥാനത്ത് മഴക്കെടുതിയിൽ 4 മരണം

തിരുവനന്തപുരം(Thiruvananthapuram): സംസ്ഥാനത്ത് കനത്ത മഴയുടെ പശ്ചാത്തലത്തിൽ മഴ മുന്നറിയിപ്പിൽ മാറ്റം. കേന്ദ്ര കാലാവസ്ഥ വകുപ്പിന്റെ പുതിയ മുന്നറിയിപ്പ് പ്രകാരം എട്ട് ജില്ലകളിൽ റെഡ് അലർട്ട് പ്രഖ്യാപിച്ചിട്ടുണ്ട്. പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂർ, കണ്ണൂർ, കാസർകോട് ജില്ലകളിലാണ് അതിതീവ്രമഴയ്ക്കുള്ള മുന്നറിയിപ്പായി റെഡ് അലർട്ട് പ്രഖ്യാപിച്ചിരിക്കുന്നത്.

തിരുവനന്തപുരം, കൊല്ലം, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ ഓറഞ്ച് അലർട്ടാണ് പ്രഖ്യാപിച്ചിട്ടുള്ളത്. നാളെ സംസ്ഥാനത്തെ എല്ലാ ജില്ലകളിലും യെല്ലോ അലർട്ടാണ് നിലവിൽ വരുന്നത്. പ്രത്യേകിച്ച് വടക്കൻ ജില്ലകളിൽ കനത്ത ജാഗ്രത നിർദേശിച്ചിരിക്കുന്നതായി അധികൃതർ അറിയിച്ചു.

മഴക്കെടുതിയിൽ നാല് മരണം

വർഷാപതം ശക്തമായതോടെ സംസ്ഥാനത്തിന്റെ വിവിധ ഭാഗങ്ങളിൽ മഴക്കെടുതിയും അപകടങ്ങളും റിപ്പോർട്ട് ചെയ്യപ്പെടുകയാണ്. ഇന്ന് നാല്
മരണങ്ങളാണ് സ്ഥിരീകരിച്ചത്. തിരുവനന്തപുരം വിഴിഞ്ഞത്ത് മത്സ്യബന്ധനത്തിനിടെ ബോട്ട് മുങ്ങി പുല്ലുവിള സ്വദേശി തഥയൂസും സ്റ്റെല്ലസും മരിച്ചു. എറണാകുളം തിരുമാറാടിയിൽ കാറ്റിൽ മരം വീണ് 85 കാരിയായ തൊഴിലുറപ്പ് തൊഴിലാളി മരിച്ചു. ഇഷ്ടിക തലയിൽ വീണ് പരിക്കേറ്റ് ചികിത്സയിൽ കഴിഞ്ഞിരുന്ന യുവതി മരിച്ചു. മലപ്പുറം കാളികാവിൽ ശക്തമായ ഒഴുക്കിൽപ്പെട്ട് ഒരാൾ കാണാതായി. ശക്തമായ കാറ്റിലും മഴയിലും വഞ്ചി മറിഞ്ഞ് ചെറായിൽ ഒരാളെ കാണാതായിട്ടുണ്ട്.
മറവിൽ, കനത്ത കാറ്റിൽ വൈദ്യുതി പോസ്റ്റുകൾ ഒടിഞ്ഞ് വീണതോടെ വൈദ്യുതി വിതരണവും പല പ്രദേശങ്ങളിലും നിലച്ചിട്ടുണ്ട്. റെയിൽവേ ട്രാക്കുകളിൽ മരങ്ങൾ വീണതോടെ നിരവധി ട്രെയിനുകൾ വൈകിയോടുകയാണ്.

മുൻകരുതലായി കാസർകോട് ജില്ലയിലെ മുളിയാർ വില്ലേജിൽ 18 കുടുംബങ്ങളെ സുരക്ഷിത സ്ഥലങ്ങളിലേക്ക് മാറ്റി. മഞ്ചേശ്വരം, വോർക്കാടി പഞ്ചായത്തുകളിൽ നിരവധി വീടുകളിൽ വെള്ളം കയറി. കണ്ണൂർ ജില്ലയിലെ താവക്കര, പുഴാതി ഭാഗങ്ങളിൽ നിന്നും ഡിങ്കി ബോട്ടുകൾ ഉപയോഗിച്ച് മാറ്റിപ്പാർപ്പിക്കൽ നടന്നു.
താഴ്ന്ന പ്രദേശങ്ങളായ ആലപ്പുഴ, കോട്ടയം, പത്തനംതിട്ട, എറണാകുളം ജില്ലകളിലും വെള്ളം കയറിയത് ദുരിതം സൃഷ്ടിച്ചു. ശക്തമായ കാറ്റിലും മഴയിലും സംസ്ഥാനത്ത് നിരവധി വീടുകൾ തകർന്നതായും റിപ്പോർട്ടുണ്ട്.

Highlights: Red alert in eight districts; Heavy rains to continue: 4 deaths due to rains in the state