വധശിക്ഷയ്ക്ക് ജയിലിൽ അറിയിപ്പ് ലഭിച്ചു; നിമിഷ പ്രിയയുടെ സന്ദേശം ആക്ഷൻ കൗൺസിലിന്
ന്യൂഡൽഹി(New Delhi): യെമനിൽ വധശിക്ഷ കാത്ത് ജയിലിൽ കഴിയുന്ന മലയാളി നഴ്‌സ് നിമിഷ പ്രിയ, ജയിൽ അധികൃതർക്ക് വധശിക്ഷ നടപ്പാക്കാനുള്ള ഉത്തരവ് ലഭിച്ചതായി അറിയിച്ചു. സേവ് നിമിഷ പ്രിയ ആക്ഷൻ കൗൺസിൽ കൺവീനർ ജയൻ ഇടപാളിനാണ് ഈ സന്ദേശം ലഭിച്ചത്. ഒരു അഭിഭാഷക മുഖേനയാണ് ഈ വിവരം അറിയിച്ചിരിക്കുന്നത് എന്നും വധശിക്ഷ നടപ്പാക്കാൻ തീരുമാനം എടുത്തതായി ജയിലിൽ സ്ഥിരീകരിച്ചതായി സന്ദേശത്തിൽ നിമിഷ പ്രിയ പറയുന്നു.
മുൻപ് നിമിഷ പ്രിയയുടെ മോചനത്തിന് മാനുഷിക പരിഗണനയിൽ ഇടപെടാൻ ഇറാൻ തയ്യാറാണെന്ന റിപ്പോർട്ടുകൾ വന്നിരുന്നു. ഇറാൻ വിദേശകാര്യ സഹമന്ത്രിയുടെ ഇന്ത്യ സന്ദർശനത്തിനിടെ വിദേശകാര്യ ഉദ്യോഗസ്ഥർ ഇതുസംബന്ധിച്ച നിലപാട് വ്യക്തമാക്കിയിരുന്നു. അതേസമയം, വധശിക്ഷ സംബന്ധിച്ച് സർക്കാർ ഇടപെടലുകൾക്ക് പരിമിതിയുണ്ടെന്ന് കേന്ദ്ര സർക്കാർ നേരത്തെ വ്യക്തമാക്കിയിരുന്നു.
പാലക്കാട് കൊല്ലങ്കോട് സ്വദേശിനിയായ നിമിഷ പ്രിയക്ക് യെമൻ പൗരൻ തലാൽ അബ്ദുമഹ്ദിയെ 2017ൽ കൊലപ്പെടുത്തിയ കേസിലാണ് വധശിക്ഷ വിധിക്കപ്പെട്ടത്. അബ്ദുമഹ്ദിയുടെ കുടുംബത്തെ നേരിൽ കണ്ട് മോചനത്തിനായി ശ്രമം നടത്തിയിരുന്നെങ്കിലും ഫലം കണ്ടില്ല. അദ്ദേഹം ഉൾപ്പെട്ട ഗോത്രത്തലവന്മാരുമായും ചര്‍ച്ചകൾ നടത്തിയിരുന്നെങ്കിലും വിജയിക്കാനായില്ല.
നിലവിൽ നിയമപരമായ എല്ലാ മാർഗങ്ങളും പ്രയോജനപ്പെടുത്താൻ നിമിഷ പ്രിയയുടെ കുടുംബവും ആക്ഷൻ കൗൺസിലും ശ്രമം തുടരുകയാണ്. ഭാരത സർക്കാരിന്റെ ഇടപെടൽ ആവശ്യമെന്നാവശ്യപ്പെട്ട് പുതിയ നീക്കങ്ങൾ ഉടൻ ഉണ്ടാകുമെന്നാണ് റിപ്പോർട്ടുകൾ.
Highlights: Death penalty notification received in prison; Nimisha Priya’s message to the Action Council
