സമീപഭാവിയിൽ ഐടി മേഖലയിൽ മാത്രമല്ല, മറ്റ് വൈറ്റ് കോളർ ജോലികളിലും 25 ശതമാനം വരെ എഐ ഓട്ടോമേഷൻ വ്യാപിക്കുമെന്ന് വിദഗ്ധർ വിലയിരുത്തുന്നു. ഇതോടെ എൻട്രി ലെവൽ ജോലികളിൽ വലിയ കുറവുണ്ടാകാൻ സാധ്യതയുണ്ട്. അതേസമയം, മനുഷ്യബുദ്ധിയെ കൂടുതൽ ക്രിയാത്മകമായി ഉപയോഗിക്കാനുള്ള പുതിയ തൊഴിൽ അവസരങ്ങളും എഐ സൃഷ്ടിക്കുമെന്നാണ് വിലയിരുത്തൽ.
ഇന്ന് എഐ എന്നത് ചാറ്റ് ബോട്ടുകളിൽ മാത്രം ഒതുങ്ങുന്നില്ല. ‘ഏജന്റിക് എഐ’യുടെ കാലമാണ് വരുന്നതെന്ന് വിദഗ്ധർ പറയുന്നു. വിവിധ ഐടി ടൂളുകൾ സംയോജിപ്പിച്ച് വലിയ ജോലികൾ ഓട്ടോമേറ്റ് ചെയ്യാൻ കഴിയുന്ന സംവിധാനങ്ങളാണ് ഏജന്റിക് എഐ. ഇതോടെ പഠനം പൂർത്തിയാക്കി തൊഴിൽ രംഗത്തേക്ക് എത്തുന്നവർക്കും എൻട്രി ലെവൽ ജോലികൾക്കും വലിയ തിരിച്ചടിയുണ്ടാകാമെന്നാണ് വിലയിരുത്തൽ.
ഐടി ഉൽപ്പന്ന കമ്പനികൾക്കൊപ്പം അധ്യാപനം, അക്കൗണ്ടിംഗ്, ഫിനാൻസ് തുടങ്ങിയ വൈറ്റ് കോളർ മേഖലകളിലേക്കും ലോകവ്യാപകമായി എഐ വ്യാപിച്ചുകഴിഞ്ഞു. ആവർത്തന സ്വഭാവമുള്ള ജോലികൾ എഐ ഏറ്റെടുക്കുകയും മനുഷ്യരുടെ ബുദ്ധിശേഷി കൂടുതൽ സൃഷ്ടിപരമായ ജോലികൾക്കായി വിനിയോഗിക്കപ്പെടുകയും ചെയ്യുമെന്നതാണ് പുതിയ തൊഴിൽ ലോകത്തിന്റെ ആശയം.
ഉൽപ്പാദനച്ചെലവ് കുറയുന്നത് ഉപഭോക്തൃ വിപണിയിലും മാറ്റങ്ങൾ സൃഷ്ടിക്കുമെന്നാണ് പ്രതീക്ഷ.
എന്നാൽ മനുഷ്യവിഭവശേഷിക്ക് എന്ത് സംഭവിക്കുമെന്നതാണ് പ്രധാന ചോദ്യം. എഐ സാങ്കേതികവിദ്യകൾ ഫലപ്രദമായി ഉപയോഗിക്കുന്നവർക്ക് ഓരോ തൊഴിൽ മേഖലയിലും മുൻതൂക്കം ലഭിക്കുമെന്നാണ് വിലയിരുത്തൽ.
ഐടി സർവീസ് മേഖലയിൽ ഇന്ത്യ ശക്തമായ സാന്നിധ്യമുണ്ടെങ്കിലും എഐ അടിസ്ഥാന സൗകര്യ വികസനത്തിൽ വികസിത രാജ്യങ്ങളെ അപേക്ഷിച്ച് ഇപ്പോഴും പിന്നിലാണ്. ഹാർഡ്വെയർ, അടിസ്ഥാന സൗകര്യങ്ങൾ, ഊർജ ഉൽപ്പാദനം, എഐയ്ക്കാവശ്യമായ ഡാറ്റാ തയ്യാറാക്കൽ തുടങ്ങി നിരവധി മേഖലകളിൽ കൂടുതൽ വികസനം ആവശ്യമാണ്. ഈ രംഗത്ത് വൈകുന്നത് ഭാവിയിലെ വളർച്ചയെ ബാധിക്കുമെന്നാണ് വിദഗ്ധരുടെ മുന്നറിയിപ്പ്.
അതേസമയം, എഐയെ കാരണമായി ചൂണ്ടിക്കാട്ടി കമ്പനികൾ ജീവനക്കാരെ പിരിച്ചുവിടുന്നത് ആശങ്കയുണ്ടാക്കുന്ന വിഷയമാണ്. ഇത്തരം കൂട്ടപ്പിരിച്ചുവിടലുകൾ തുടർന്നാൽ അത് നയപരമായി കൈകാര്യം ചെയ്യുക സംസ്ഥാനങ്ങൾക്ക് വലിയ വെല്ലുവിളിയാകും.
കേന്ദ്ര സർക്കാരിന്റെ ലേബർ കോഡിനെ മാത്രം കുറ്റപ്പെടുത്തിക്കൊണ്ട് സംസ്ഥാനങ്ങൾക്ക് ഉത്തരവാദിത്തത്തിൽ നിന്ന് ഒഴിഞ്ഞുമാറാനാകില്ലെന്നും വിലയിരുത്തലുണ്ട്. കമ്പ്യൂട്ടർ എത്തിയപ്പോൾ രൂപപ്പെട്ടതുപോലെ പുതിയ തൊഴിൽ സാധ്യതകൾ എഐ കാലത്തും ഉണ്ടാകുമെന്നാണ് പ്രതീക്ഷ. എന്നാൽ സാമൂഹിക-സാമ്പത്തിക അസമത്വവും ഡിജിറ്റൽ വിഭജനവും നിലനിൽക്കുന്ന ഇന്ത്യയിൽ ആ പുതിയ തൊഴിൽ ലോകത്തിലേക്കുള്ള യാത്ര എളുപ്പമാകില്ലെന്നും വിദഗ്ധർ ചൂണ്ടിക്കാട്ടുന്നു.