തിരുവനന്തപുരം: നിയമസഭാ തിരഞ്ഞെടുപ്പിന് ദിവസങ്ങൾ മാത്രം ബാക്കിനിൽക്കെ, വോട്ടർമാരെ സ്വാധീനിക്കാൻ വമ്പൻ വാഗ്ദാനങ്ങളുമായി എൽഡിഎഫും യുഡിഎഫും ഒരേ ദിവസം പ്രകടനപത്രിക പുറത്തിറക്കി. നേരത്തെ എൻഡിഎ പത്രിക പുറത്തിറക്കിയതിന് പിന്നാലെയാണ് ഇരുമുന്നണികളും തങ്ങളുടെ വികസനരേഖകൾ ജനങ്ങൾക്ക് മുന്നിൽ അവതരിപ്പിച്ചത്. ക്ഷേമപദ്ധതികൾ, കൃഷി, അടിസ്ഥാന സൗകര്യ വികസനം തുടങ്ങിയ മേഖലകളിൽ ഇരുമുന്നണികളും സമാനമായ വാഗ്ദാനങ്ങൾ മുന്നോട്ടുവെച്ചു എന്നത് ശ്രദ്ധേയമാണ്.
സാമൂഹിക സുരക്ഷാ പെൻഷനുകളുടെ കാര്യത്തിൽ ഇരുവിഭാഗവും ഒരേ നിലപാടാണ് സ്വീകരിച്ചിരിക്കുന്നത്. ക്ഷേമ പെൻഷനുകൾ 3,000 രൂപയായി വർദ്ധിപ്പിക്കുമെന്ന് എൽഡിഎഫും യുഡിഎഫും ഒരേപോലെ ഉറപ്പുനൽകുന്നു. കർഷകരെ കയ്യിലെടുക്കാനായി റബ്ബറിന്റെ താങ്ങുവില 300 രൂപയാക്കി ഉയർത്തുമെന്നും നെല്ല് സംഭരണ വില കിലോയ്ക്ക് 35 രൂപയാക്കുമെന്നും ഇരുപക്ഷവും പത്രികയിൽ വ്യക്തമാക്കുന്നുണ്ട്.
അടിസ്ഥാന സൗകര്യ വികസനത്തിൽ തിരുവനന്തപുരത്തും കോഴിക്കോട്ടും മെട്രോ റെയിൽ പദ്ധതി നടപ്പിലാക്കുമെന്ന വാഗ്ദാനം ഇരുമുന്നണികളും പങ്കുവെക്കുന്നു. ഭവനരഹിതർക്കായി എൽഡിഎഫ് ‘ലൈഫ് മിഷൻ 2.0’ വഴി സമ്പൂർണ്ണ പാർപ്പിടം ഉറപ്പുനൽകിയപ്പോൾ, അഞ്ച് ലക്ഷം വീടുകൾ നിർമ്മിക്കുമെന്നാണ് യുഡിഎഫ് വാഗ്ദാനം ചെയ്യുന്നത്. സർക്കാർ ജീവനക്കാരുടെ പെൻഷൻ കാര്യത്തിലും അനുകൂലമായ പരിഷ്കാരങ്ങൾ രണ്ട് മുന്നണികളും മുന്നോട്ടുവെക്കുന്നുണ്ട്. എൽഡിഎഫ് അഷ്വേർഡ് പെൻഷൻ ഉറപ്പുനൽകുമ്പോൾ, ജീവനക്കാർക്ക് ഗുണകരമായ പെൻഷൻ പരിഷ്കരണമാണ് യുഡിഎഫിന്റെ വാഗ്ദാനം.
ആരോഗ്യമേഖലയിൽ എല്ലാ കുടുംബങ്ങൾക്കും 25 ലക്ഷം രൂപ വരെ ചികിത്സാ സഹായം ലഭിക്കുന്ന ‘ഉമ്മൻചാണ്ടി ആരോഗ്യ ഇൻഷുറൻസ്’ പദ്ധതി യുഡിഎഫ് മുന്നോട്ടുവെച്ചപ്പോൾ, വിപുലമായ ആരോഗ്യ പരിരക്ഷാ പദ്ധതികളാണ് എൽഡിഎഫും പ്രഖ്യാപിച്ചിരിക്കുന്നത്. അതിദരിദ്രരില്ലാത്ത കേരളം എന്ന ലക്ഷ്യം മുൻനിർത്തിയുള്ള കർമ്മപദ്ധതികൾക്കും രണ്ട് മുന്നണികളും തുല്യ പ്രാധാന്യം നൽകുന്നു. ഒരേ ദിവസം പുറത്തിറങ്ങിയ രണ്ട് പ്രകടനപത്രികകളിലെയും ഈ സമാനതകൾ വോട്ടർമാർക്കിടയിൽ വലിയ ചർച്ചകൾക്ക് വഴിവെച്ചിട്ടുണ്ട്.