കണ്ണൂർ: ധർമ്മടം മണ്ഡലത്തിലെ തെരഞ്ഞെടുപ്പ് പ്രചാരണത്തിന് മുഖ്യമന്ത്രി പിണറായി വിജയൻ തുടക്കമിട്ടു. വൈകിട്ട് നാല് മണിയോടെ കണ്ണൂർ അന്താരാഷ്ട്ര വിമാനത്താവളത്തിലെത്തിയ മുഖ്യമന്ത്രിക്ക് പ്രവർത്തകർ വൻ സ്വീകരണം നൽകി. തുടർന്ന് വിമാനത്താവളത്തിൽ നിന്ന് പിണറായി വരെ റോഡ് ഷോ സംഘടിപ്പിച്ചു.
സ്ഥാനാർത്ഥി പ്രഖ്യാപനത്തിന് ശേഷം ആദ്യമായാണ് മുഖ്യമന്ത്രി മണ്ഡലത്തിലെത്തുന്നത്. വരാനിരിക്കുന്ന ദിവസങ്ങളിൽ വോട്ടർമാരെ നേരിൽ കണ്ടുള്ള വ്യാപക പ്രചാരണ പരിപാടികളുമായി മണ്ഡലത്തിൽ സജീവമാകാനാണ് പദ്ധതിയെന്ന് പാർട്ടി നേതൃത്വം അറിയിച്ചു.
സിപിഎം വിട്ട ടി.കെ. ഗോവിന്ദന്റെയും വി. കുഞ്ഞികൃഷ്ണന്റെയും സ്ഥാനാർത്ഥിത്വം ജില്ലയിൽ പാർട്ടിക്ക് രാഷ്ട്രീയ വെല്ലുവിളിയായി മാറുന്ന സാഹചര്യത്തിലാണ് പ്രചാരണം ശക്തമാക്കുന്നത്. തളിപ്പറമ്പ്, പയ്യന്നൂർ മണ്ഡലങ്ങളിലും മുഖ്യമന്ത്രി നേരിട്ട് എത്തി പ്രചാരണത്തിന് നേതൃത്വം നൽകുമെന്ന സൂചനയുണ്ട്.
മത്സരം കടുപ്പത്തിൽ
ധർമ്മടത്ത് മൂന്നാം തവണയാണ് പിണറായി വിജയൻ ജനവിധി തേടുന്നത്. കഴിഞ്ഞ പത്ത് വർഷമായി മണ്ഡലത്തെ പ്രതിനിധീകരിച്ച അനുഭവത്തിന്റെ അടിസ്ഥാനത്തിലാണ് വീണ്ടും മത്സരരംഗത്ത് എത്തുന്നത്.
മുഖ്യമന്ത്രിക്കെതിരെ കോൺഗ്രസ് സ്ഥാനാർത്ഥിയായി വി.പി. അബ്ദുൾ റഷീദിനെ പരിഗണിക്കുന്നതായി റിപ്പോർട്ടുകൾ സൂചിപ്പിക്കുന്നു. കെപിസിസി അംഗവും യൂത്ത് കോൺഗ്രസ് സംസ്ഥാന ജനറൽ സെക്രട്ടറിയുമായ അബ്ദുൾ റഷീദിനെ ആദ്യം തളിപ്പറമ്പിൽ മത്സരിപ്പിക്കാനായിരുന്നു തീരുമാനം. എന്നാൽ ടി.കെ. ഗോവിന്ദന് കോൺഗ്രസ് പിന്തുണ പ്രഖ്യാപിച്ചതിനെ തുടർന്ന് ധർമ്മടത്ത് മത്സരിപ്പിക്കാനുള്ള നീക്കമാണ് ഉണ്ടായത്.
കഴിഞ്ഞ തിരഞ്ഞെടുപ്പിൽ എൽഡിഎഫ് സ്ഥാനാർത്ഥിക്കെതിരായ ഭൂരിപക്ഷം ഏകദേശം 22,000 വോട്ടായി കുറഞ്ഞിരുന്നു. അതിന് മുമ്പുള്ള തിരഞ്ഞെടുപ്പിൽ ഭൂരിപക്ഷം നാല്പതിനായിരത്തിന് സമീപമായിരുന്നു.