ന്യൂഡൽഹി: സ്മാർട്ട്ഫോൺ നിർമ്മാതാക്കളായ ടെക്നോ തങ്ങളുടെ ഏറ്റവും പുതിയ 5ജി മോഡലായ ടെക്നോ സ്പാർക്ക് 50 5ജി ഇന്ന് ഇന്ത്യൻ വിപണിയിൽ പുറത്തിറക്കും. കുറഞ്ഞ വിലയിൽ മികച്ച 5ജി സേവനം ലഭ്യമാക്കുക എന്ന ലക്ഷ്യത്തോടെ പുറത്തിറക്കുന്ന ഈ ഫോൺ, ടെക്നോയുടെ സ്പാർക്ക് സീരീസിലെ രണ്ടാമത്തെ 5ജി സ്മാർട്ട്ഫോണാണ്. കഴിഞ്ഞ വർഷം പുറത്തിറങ്ങിയ സ്പാർക്ക് 40 4ജി മോഡലിൽ നിന്ന് വലിയ മാറ്റങ്ങളുമായാണ് പുതിയ പതിപ്പ് എത്തുന്നത്. 6,500 mAh ശേഷിയുള്ള കരുത്തുറ്റ ബാറ്ററിയും 45 വാട്സ് ഫാസ്റ്റ് ചാർജിംഗ് പിന്തുണയുമാണ് ഈ ഫോണിന്റെ പ്രധാന സവിശേഷത.
ആമസോൺ, ഫ്ലിപ്കാർട്ട് തുടങ്ങിയ ഓൺലൈൻ പ്ലാറ്റ്ഫോമുകൾ വഴി ലഭ്യമാകുന്ന ഈ ഫോണിൽ ആർട്ടിഫിഷ്യൽ ഇന്റലിജൻസ് (AI) അടിസ്ഥാനമാക്കിയുള്ള നിരവധി ഫീച്ചറുകൾ ഉൾപ്പെടുത്തിയിട്ടുണ്ട്. ടെക്നോയുടെ സ്വന്തം എഐ അസിസ്റ്റന്റായ ‘എല്ല’ (Ella AI) വോയിസ് കമാൻഡുകൾക്ക് പുറമെ ഇന്ത്യൻ പ്രാദേശിക ഭാഷകളിലുൾപ്പെടെ തത്സമയ വിവർത്തനത്തിനും സഹായിക്കും. നെറ്റ്വർക്ക് ഇല്ലാത്ത സാഹചര്യങ്ങളിൽ പോലും 1.5 കിലോമീറ്റർ പരിധിയിലുള്ള മറ്റ് ഉപകരണങ്ങളുമായി സന്ദേശങ്ങളും കോളുകളും കൈമാറാൻ കഴിയുന്ന ‘ഓഫ്ലൈൻ കമ്മ്യൂണിക്കേഷൻ’ സൗകര്യമാണ് ഈ ഫോണിനെ ശ്രദ്ധേയമാക്കുന്നത്.
44 MIMO ആന്റിനകൾ ഉൾപ്പെടുത്തിയതിനാൽ മികച്ച 5ജി സിഗ്നൽ ലഭ്യതയും ഫോൺ ഉറപ്പുനൽകുന്നു. ഡിജിറ്റൽ ഇടപാടുകൾക്കായി എൻഎഫ്സി (NFC) സൗകര്യവും ഫോണിലുണ്ട്. കൂടാതെ, കഠിനമായ സാഹചര്യങ്ങളിലും മികച്ച പ്രകടനം കാഴ്ചവെക്കുന്നതിനായി MIL-STD 810H സർട്ടിഫിക്കേഷനും ഈ മോഡലിനുണ്ട്. ആകർഷകമായ പിൽ-ആകൃതിയിലുള്ള ക്യാമറ മോഡ്യൂളും കരുത്തുറ്റ ഡിസൈനുമായി എത്തുന്ന ടെക്നോ സ്പാർക്ക് 50 5ജി ബജറ്റ് സ്മാർട്ട്ഫോൺ വിപണിയിൽ വലിയ ചലനമുണ്ടാക്കുമെന്നാണ് കരുതപ്പെടുന്നത്.