കണ്ണൂർ: കേരളം വലിയ വികസനക്കുതിപ്പിലേക്ക് മാറിയിരിക്കുകയാണെന്നും ഈ മുന്നേറ്റത്തിനൊപ്പം ഓരോ നാടിനും സഞ്ചരിക്കാൻ കഴിയണമെന്നും മുഖ്യമന്ത്രി പിണറായി വിജയൻ. ധർമടം മണ്ഡലത്തിലെ വിവിധ തിരഞ്ഞെടുപ്പ് യോഗങ്ങളിൽ സംസാരിക്കുകയായിരുന്നു അദ്ദേഹം. സംസ്ഥാനത്തുടനീളം പ്രചാരണത്തിന് പോകേണ്ടി വന്നതിനാൽ സ്വന്തം മണ്ഡലത്തിൽ സ്ഥാനാർത്ഥി എന്ന നിലയിൽ ചില പരിമിതികൾ ഉണ്ടായിട്ടുണ്ടെന്നും എന്നാൽ ആ ഉത്തരവാദിത്തം ജനങ്ങൾ ഏറ്റെടുത്തതായും അദ്ദേഹം പറഞ്ഞു.
മണ്ഡലത്തിലെ വോട്ടർമാരോട് നേരിട്ട് സംവദിക്കുന്നതിൽ കുറവുണ്ടായിട്ടുണ്ട്. മറ്റ് മണ്ഡലങ്ങളിലെ പ്രചാരണ ചുമതലകൾ കൂടി നിർവ്വഹിക്കേണ്ടി വന്നത് ഒരു പരിമിതിയായിരുന്നു. എന്നാൽ ഈ സാഹചര്യം ഉൾക്കൊണ്ട് വോട്ടർമാർ തന്നെ ആ ഉത്തരവാദിത്തം ഏറ്റെടുത്തതിൽ സന്തോഷമുണ്ടെന്ന് മുഖ്യമന്ത്രി വ്യക്തമാക്കി. നാടിന്റെ പൊതുവായ വികസനത്തിന് തടസ്സം നിൽക്കുന്ന ശക്തികളെ തിരിച്ചറിയണമെന്നും അദ്ദേഹം കൂട്ടിച്ചേർത്തു.
സർക്കാരിനെതിരെ വമ്പിച്ച രീതിയിലുള്ള നുണപ്രചാരണങ്ങൾ നടക്കുന്ന കാലമാണിതെന്ന് മുഖ്യമന്ത്രി ഓർമ്മിപ്പിച്ചു. ഇത്തരം വ്യാജ പ്രചാരണങ്ങളെ പ്രതിരോധിക്കാനും യഥാർത്ഥ വസ്തുതകൾ ജനങ്ങളിലേക്ക് എത്തിക്കാനും പ്രവർത്തകർ ജാഗ്രത കാട്ടണം. വികസനവും സാമൂഹിക ക്ഷേമവും മുൻനിർത്തി സർക്കാർ നടത്തിയ പ്രവർത്തനങ്ങൾക്കുള്ള അംഗീകാരമായി വരാനിരിക്കുന്ന തിരഞ്ഞെടുപ്പ് ഫലം മാറുമെന്നും മികച്ച ഭൂരിപക്ഷത്തോടെ ഭരണത്തുടർച്ചയുണ്ടാകുമെന്നും മുഖ്യമന്ത്രി ആത്മവിശ്വാസം പ്രകടിപ്പിച്ചു.