ഫോക്സ്ബറോ: ലോകകപ്പ് ഫുട്ബോളിന്റെ ക്വാർട്ടർ ഫൈനൽ പോരാട്ടത്തിൽ വൻ ശക്തികളായ ഫ്രാൻസ് ആഫ്രിക്കൻ കരുത്തരായ മൊറോക്കോയെ നേരിടുന്നു. അമേരിക്കയിലെ ഫോക്സ്ബറോ സ്റ്റേഡിയത്തിൽ നടക്കുന്ന ഈ മത്സരം 2022-ലെ ഖത്തർ ലോകകപ്പ് സെമിഫൈനലിന്റെ ആവർത്തനമാണ്. അന്ന് ഫ്രാൻസ് മൊറോക്കോയുടെ സ്വപ്നക്കുതിപ്പിനെ 2-0 ന് തകർത്തിരുന്നു. എന്നാൽ നാല് വർഷങ്ങൾക്കിപ്പുറം, വടക്കേ അമേരിക്കൻ മണ്ണിൽ മാറ്റുരയ്ക്കുമ്പോൾ മൊറോക്കോ കേവലം ഒരു ‘അട്ടിമറി വീരന്മാർ’ മാത്രമല്ല, ലോകകിരീടം നേടാൻ പോന്ന യഥാർത്ഥ ശക്തികളായി മാറിക്കഴിഞ്ഞു.
ടൂർണമെന്റിലുടനീളം തകർപ്പൻ ഫോമിലുള്ള ഫ്രാൻസ്, പ്രീ-ക്വാർട്ടറിൽ കരുത്തരായ പരാഗ്വേയെ കിലിയൻ എംബാപ്പെയുടെ പെനാൽറ്റി ഗോളിന്റെ ബലത്തിൽ 1-0 ന് നാടകീയമായി മറികടന്നാണ് ക്വാർട്ടറിലെത്തിയത്. മറുഭാഗത്ത് കാനഡയെ എതിരില്ലാത്ത മൂന്ന് ഗോളുകൾക്ക് തകർത്തുവിട്ടാണ് മൊറോക്കോയുടെ വരവ്. ഗ്രൂപ്പ് ഘട്ടത്തിൽ ബ്രസീലിനെ സമനിലയിൽ തളയ്ക്കുകയും ഹെയ്തി, സ്കോട്ട്ലൻഡ് ടീമുകളെ അനായാസം തോൽപ്പിക്കുകയും ചെയ്ത മൊറോക്കോ കടുത്ത വെല്ലുവിളിയാണ് ഫ്രഞ്ച് പടയ്ക്ക് ഉയർത്തുന്നത്.
ചരിത്രവും രാഷ്ട്രീയവും ഇഴചേരുന്ന പോരാട്ടം
ഫ്രാൻസും മൊറോക്കോയും തമ്മിലുള്ള മത്സരം കേവലം ഫുട്ബോളിനപ്പുറം ചരിത്രപരവും രാഷ്ട്രീയവുമായ ഒട്ടേറെ മാനങ്ങളുള്ള ഒന്നാണ്. ഇരുപതാം നൂറ്റാണ്ടിൽ ദശാബ്ദങ്ങളോളം മൊറോക്കോ ഫ്രാൻസിന്റെ കോളനിയായിരുന്നു. നിലവിൽ ഫ്രാൻസിൽ ഏഴ് ലക്ഷത്തിലധികം മൊറോക്കൻ വംശജർ താമസിക്കുന്നുമുണ്ട്.
“ഞങ്ങൾ ഇന്ന് ആരെയും അത്ഭുതപ്പെടുത്തുന്ന ഒരു ടീമല്ല, അതൊരു വലിയ അഭിമാനമാണ്. ഇതൊരു തുടക്കം മാത്രമാണ്, വരും വർഷങ്ങളിലും ഈ കുതിപ്പ് തുടരുമെന്ന് ഞാൻ പ്രതീക്ഷിക്കുന്നു,” – കോച്ച് മുഹമ്മദ് ഔഹാബി പറഞ്ഞു.
2022-ലെ തോൽവിക്ക് പകരം വീട്ടുക എന്നതിനപ്പുറം തങ്ങളുടെ രാജ്യത്തെ ജനങ്ങളെ അഭിമാനിപ്പിക്കുകയാണ് ലക്ഷ്യമെന്ന് കോച്ച് വ്യക്തമാക്കുമ്പോഴും, മുൻ കൊളോണിയൽ ശക്തികളെ ലോകവേദിയിൽ തകർക്കുക എന്നത് മൊറോക്കോയ്ക്ക് ഇരട്ടി മധുരം നൽകും.
എംബാപ്പെയെ പൂട്ടാൻ ഹക്കിമിയും സംഘവും
ഈ ലോകകപ്പിൽ ഇതിനകം 7 ഗോളുകൾ നേടി ലയണൽ മെസ്സി, എർലിങ് ഹാലൻഡ് എന്നിവർക്കൊപ്പം ഗോൾഡൻ ബൂട്ട് റേസിൽ ഒന്നാമതാണ് കിലിയൻ എംബാപ്പെ. ഒപ്പം നിലവിലെ ബാലൺ ഡി ഓൺ ജേതാവ് ഉസ്മാൻ ഡെംബെലെ കൂടിയാകുമ്പോൾ ഫ്രഞ്ച് മുന്നേറ്റനിര അതിശക്തമാണ്. എന്നാൽ പരാഗ്വേ ഫ്രഞ്ച് ആക്രമണത്തെ വിജയകരമായി തടഞ്ഞത് മൊറോക്കോയ്ക്ക് പ്രതീക്ഷ നൽകുന്നു. ലോകകപ്പുകളിൽ എപ്പോഴും അസാധ്യ പ്രകടനം പുറത്തെടുക്കുന്ന ഗോൾകീപ്പർ യാസിൻ ബൗണോയും ലോകത്തിലെ ഏറ്റവും മികച്ച റൈറ്റ് ബാക്കായ അഷ്റഫ് ഹക്കിമിയും നയിക്കുന്ന പ്രതിരോധക്കോട്ട ഫ്രാൻസിന് എളുപ്പത്തിൽ തകർക്കാനാകില്ല.
ഫ്രാൻസ് വെറും ഭംഗിയുള്ള ഫുട്ബോൾ മാത്രമല്ല കളിക്കുന്നത്, ആവശ്യമെങ്കിൽ കടുത്ത ശാരീരിക പോരാട്ടങ്ങൾക്കും തങ്ങൾ സജ്ജരാണെന്ന് പരാഗ്വേക്കെതിരായ മത്സരത്തിലൂടെ അവർ തെളിയിച്ചു കഴിഞ്ഞു.
“ഫ്രാൻസ് വെറുതെ പന്തുതട്ടാൻ മാത്രമല്ല ഇവിടെ വന്നിരിക്കുന്നതെന്ന് ഞങ്ങൾ ഓർമ്മിപ്പിച്ചു. ഞങ്ങളോട് യുദ്ധത്തിന് വരാൻ ആഗ്രഹിക്കുന്നവർക്ക് ഇതൊരു മുന്നറിയിപ്പാണ്,” – ഫ്രഞ്ച് താരം റായൻ ചെർക്കി വ്യക്തമാക്കി.
മൊറോക്കോയുടെ കോച്ച് മാറ്റവും ഫ്രാൻസിന്റെ സസ്പെൻഷൻ ഭീഷണിയും
ടൂർണമെന്റിന് തൊട്ടുമുൻപ് കോച്ച് വാലിദ് റെഗ്രാഗുവിക്ക് പകരം മുഹമ്മദ് ഔഹാബിയെ പരിശീലകനാക്കിയ മൊറോക്കോയുടെ തന്ത്രം വീണ്ടും വിജയമായിരിക്കുകയാണ്. പരമ്പരാഗത സെന്റർ ഫോർവേഡിന് പകരം ഇസ്മായിൽ സൈബാരിയെ ‘ഫാൾസ് നയൻ’ ആയി ഇറക്കിയും അസ്സെദിൻ മാറ്റി മധ്യനിരയെ ശക്തിപ്പെടുത്തിയുമുള്ള ഔഹാബിയുടെ തന്ത്രങ്ങൾ കൃത്യമായി ഫലം കാണുന്നുണ്ട്. കാനഡയ്ക്കെതിരെ ഇരട്ട ഗോൾ നേടിയ അസ്സെദിൻ ഔനാഹിയാണ് അവരുടെ ഇപ്പോഴത്തെ താരം.
അതേസമയം, ഫ്രഞ്ച് ക്യാമ്പിൽ സസ്പെൻഷൻ ഭീഷണി കനക്കുകയാണ്. സൂപ്പർ താരങ്ങളായ ബ്രാഡ്ലി ബാർക്കോള, മാനു കോനെ, മിഷേൽ ഒലൈസ് എന്നിവർക്ക് കഴിഞ്ഞ മത്സരത്തിൽ മഞ്ഞക്കാർഡ് ലഭിച്ചിരുന്നു. ഇന്ന് മൊറോക്കോയ്ക്കെതിരെ ഇവർക്ക് വീണ്ടും മഞ്ഞക്കാർഡ് ലഭിച്ചാൽ സെമിഫൈനൽ മത്സരം നഷ്ടമാകും. ടൂർണമെന്റിലെ ഫ്രാൻസിന്റെ ഏറ്റവും മികച്ച മൂന്ന് കളിക്കാരിൽ ഒരാളായ ഒലൈസിന്റെ അഭാവം സെമിയിലെത്തിയാൽ ഫ്രാൻസിന് വലിയ തിരിച്ചടിയാകും. ഇന്ന് ഫോക്സ്ബറോയിൽ പന്തുരുളുമ്പോൾ ആഫ്രിക്കൻ സിംഹങ്ങൾ ചരിത്രമെഴുതുമോ അതോ ഫ്രഞ്ച് പട കിരീടത്തിലേക്ക് ഒരു പടി കൂടി അടുക്കുമോ എന്ന് കാത്തിരുന്ന് കാണാം.