മുംബൈ: രാജ്യത്തെ ബാങ്കിങ് സംവിധാനത്തിൽ നിർണ്ണായക പരിഷ്കാരങ്ങളുമായി റിസർവ് ബാങ്ക് ഇന്ത്യ(ആർബിഐ). 2026 ഏപ്രിൽ 8-ന് പുറത്തിറക്കിയ പുതിയ മാർഗനിർദേശങ്ങൾ ബാങ്കുകളുടെ പ്രവർത്തനം കൂടുതൽ കാര്യക്ഷമമാക്കുകയും വായ്പാ നടപടികൾ ലളിതമാക്കുകയും ചെയ്യുന്നതാണ്.
പുതിയ സംവിധാനപ്രകാരം ബാങ്ക് ബോർഡുകളുടെ ദൈനംദിന ചുമതലകൾ കുറച്ച്, നയരൂപീകരണത്തിലും തന്ത്രപരമായ തീരുമാനങ്ങളിലുമാണ് കൂടുതൽ ശ്രദ്ധ കേന്ദ്രീകരിക്കാൻ സൗകര്യം ഒരുക്കുന്നത്. പ്രവർത്തന ചുമതലകൾ മാനേജ്മെന്റിലേക്ക് മാറ്റുന്നതോടെ തീരുമാനം എടുക്കൽ വേഗത്തിലാകുമെന്ന് ആർബിഐ വിലയിരുത്തുന്നു.
ചെറുകിട വ്യവസായങ്ങൾക്ക് ആശ്വാസകരമായി, ഡിജിറ്റൽ പ്ലാറ്റ്ഫോമുകളിലൂടെ വായ്പ ലഭ്യമാക്കുന്നതിലെ കടുത്ത നിബന്ധനകൾ ഇളവാക്കി. ഇതോടെ ചെറുകിട സംരംഭകർക്ക് വേഗത്തിൽ ഔദ്യോഗിക വായ്പാ സംവിധാനങ്ങളിലേക്ക് പ്രവേശിക്കാനാകും.
ഇതോടൊപ്പം, എൻപിഎ പ്രൊവിഷനിംഗ് മാനദണ്ഡങ്ങളിലും നിക്ഷേപ കരുതൽ ശേഖരത്തിലും ഇളവുകൾ അനുവദിച്ചു. ബാങ്കുകളുടെ വായ്പാ ശേഷി വർധിപ്പിക്കുന്നതിൽ ഇത് സഹായകരമാകുമെന്ന് പ്രതീക്ഷിക്കുന്നു.
സാമ്പത്തിക വിപണിയെ കൂടുതൽ സജീവമാക്കുന്നതിനായി ടേം മണി മാർക്കറ്റിൽ ബാങ്ക് ഇതര സ്ഥാപനങ്ങൾക്കും പ്രവേശനം അനുവദിക്കാൻ ആർബിഐ തീരുമാനിച്ചു. പണലഭ്യത വർധിപ്പിക്കുകയും ഹ്രസ്വകാല ഫണ്ടിംഗിനുള്ള ആശ്രയം കുറയ്ക്കുകയും ചെയ്യുന്നതാണ് ലക്ഷ്യം.