തെരഞ്ഞെടുപ്പ് വേദികൾ ആശയങ്ങളുടെ പോരാട്ടത്തിനായിരിക്കണം. പക്ഷേ അടുത്തകാലത്ത് ഉയർന്നുവരുന്ന പരാമർശങ്ങൾ, ആ വേദികളെ വ്യക്തിപരമായ ആക്രമണങ്ങളുടെയും അസഭ്യമായ വാക്കുകളുടെയും അരങ്ങാക്കി മാറ്റുന്ന അപകടകരമായ പ്രവണതയിലേക്ക് നീങ്ങുന്നുവെന്ന ആശങ്കയാണ് ശക്തമാക്കുന്നത്. തെലങ്കാന മുഖ്യമന്ത്രിയായ രേവന്ത് റെഡിയും കേരള മുഖ്യമന്ത്രിയായ പിണറായി വിജയനും തമ്മിലുണ്ടായ വിവാദപരാമർശങ്ങൾ, വ്യക്തികളെ മാത്രമല്ല അവർ വഹിക്കുന്ന ഭരണഘടനാപദവികളെയും അതിലൂടെ പ്രതിനിധീകരിക്കുന്ന ജനങ്ങളെയും ബാധിക്കുന്നതാണ്. രാഷ്ട്രീയ വാദപ്രതിവാദങ്ങൾ ശക്തമായിരിക്കാം, പക്ഷേ അത് മാന്യതയുടെ പരിധി ലംഘിക്കുമ്പോൾ ജനാധിപത്യത്തിന്റെ അടിസ്ഥാന മൂല്യങ്ങൾ തന്നെ ചോദ്യചിഹ്നമാകുന്നു.
കേരളത്തിലെ രാഷ്ട്രീയസംസ്കാരം എപ്പോഴും ആശയസംവാദങ്ങളുടെ മേൽപ്പാടിലാണ് വളർന്നത്. ഭിന്നതകൾ ശക്തമായിരുന്നിട്ടും പരസ്പര ബഹുമാനവും ഭാഷയുടെ സംസ്കാരവും നിലനിർത്തിയ പാരമ്പര്യമാണ് ഇവിടെ നിലനിന്നിരുന്നത്. എന്നാൽ ഇന്ന്, ആ പാരമ്പര്യത്തെ മറികടന്ന് വ്യക്തിപരമായ പരിഹാസങ്ങളും വെല്ലുവിളികളും മുൻനിരയിൽ എത്തുന്നത്, രാഷ്ട്രീയത്തിന്റെ ഗുണമേന്മ കുറയുന്നതിന്റെ സൂചനയാണ്.
സമൂഹമാധ്യമങ്ങളിലെ കയ്യടികളും ആൾക്കൂട്ടങ്ങളുടെ ആവേശവും നേതാക്കളെ ഇത്തരം പ്രസ്താവനകളിലേക്ക് തള്ളിവിടുന്ന ഘടകങ്ങളാകാം. എന്നാൽ അത് ഒരു ന്യായീകരണവുമല്ല. ഭരണഘടനാപദവികൾ വഹിക്കുന്നവരുടെ ഓരോ വാക്കും പൊതുസമൂഹത്തിന് മാതൃകയാകേണ്ടതാണ്. അവിടെ കാണുന്ന അസംയമിതത്വം, സമൂഹത്തിലും അതേ രീതിയിലുള്ള പ്രതികരണങ്ങൾക്ക് വഴിതെളിക്കും. ഇതിന്റെ ദൂരവ്യാപകമായ പ്രത്യാഘാതം രാഷ്ട്രീയവിമുഖതയാണ്. പുതിയ തലമുറയിൽ ഇതിനകം തന്നെ രാഷ്ട്രീയത്തോട് ഒരു അകലം രൂപപ്പെട്ടിട്ടുണ്ട്. വോട്ടിംഗ് ശതമാനത്തിലെ ഇടിവ് അതിന്റെ സൂചനയാണ്.
ആശയങ്ങളില്ലാത്ത, വ്യക്തിപരമായ ആക്രമണങ്ങൾ മാത്രം നിറഞ്ഞ രാഷ്ട്രീയമാണ് അവർ കാണുന്നത് എങ്കിൽ, ജനാധിപത്യ പ്രക്രിയയിൽ നിന്ന് അവർ കൂടുതൽ അകന്നുപോകും. അരാഷ്ട്രീയ വാദങ്ങൾ ശക്തമാകുന്ന ഈ കാലഘട്ടത്തിൽ, രാഷ്ട്രീയ പാർട്ടികളും നേതാക്കളും കൂടുതൽ ഉത്തരവാദിത്വത്തോടെ പെരുമാറേണ്ടതാണ്. അഭിപ്രായവ്യത്യാസങ്ങൾ ഉണ്ടാകാം, കടുത്ത വിമർശനങ്ങളും ആവശ്യമാണ്; എന്നാൽ അത് ശീലമുള്ള ഭാഷയിലും മാന്യതയിലും ആകണം. ജനാധിപത്യം നിലനിൽക്കുന്നത് പരസ്പര ബഹുമാനത്തിലും സംസ്കാരത്തിലും ആണ്. അത് നഷ്ടപ്പെടുന്നിടത്ത് രാഷ്ട്രീയ വിജയങ്ങൾക്കും അർത്ഥമില്ല. ഈ ഘട്ടത്തിൽ, രാഷ്ട്രീയ നേതാക്കളും പ്രസ്ഥാനങ്ങളും ഒരു തിരിച്ചറിവിലേക്ക് എത്തണം- വാക്കുകളുടെ നിലവാരം താഴുമ്പോൾ, ജനാധിപത്യത്തിന്റെ നിലവാരവും താഴും.