മൈസൂരു: തെന്നിന്ത്യൻ വാനമ്പാടി എസ്. ജാനകിക്ക് മൈസൂരുവിൽ പൂർണ ഔദ്യോഗിക ബഹുമതികളോടെ വിട നൽകി. രാഷ്ട്രീയ, സാംസ്കാരിക, ചലച്ചിത്ര, സംഗീത മേഖലകളിലെ പ്രമുഖരും പതിനായിരക്കണക്കിന് ആരാധകരും സാക്ഷിയായാണ് പ്രിയഗായികയ്ക്ക് രാജ്യം അന്ത്യാഞ്ജലി അർപ്പിച്ചത്.

മൈസൂരു മഹാരാജ ഗ്രൗണ്ടിൽ പൊതുദർശനത്തിന് ശേഷം ജാനകിയുടെ ഭൗതികശരീരം കനിയനഹുണ്ടി ഫാംഹൗസിലേക്ക് കൊണ്ടുപോയി. അവിടെ സംസ്ഥാന സർക്കാർ പൂർണ ഔദ്യോഗിക ബഹുമതികൾ അർപ്പിച്ചതിന് ശേഷമാണ് സംസ്കാരച്ചടങ്ങുകൾ നടന്നത്. പേരക്കുട്ടി അപ്സരയാണ് അന്ത്യകർമങ്ങൾ നിർവഹിച്ചത്. തെലുങ്ക് ബ്രാഹ്മണ ആചാരപ്രകാരമായിരുന്നു സംസ്കാരം.

കണ്ണീരോടെ പൊതുദർശനം

മൈസൂരു അപ്പോളോ ആശുപത്രിയിൽ ചികിത്സയിലിരിക്കെ ഇന്നലെയായിരുന്നു എസ്. ജാനകി അന്തരിച്ചത്. ശ്വസനസംബന്ധമായ അസ്വസ്ഥതയെ തുടർന്ന് ഉച്ചയോടെയാണ് ആശുപത്രിയിൽ പ്രവേശിപ്പിച്ചത്. ചികിത്സയിലിരിക്കെ വൈകിട്ട് 7.30ഓടെയായിരുന്നു അന്ത്യം.

മലയാളം, തമിഴ്, തെലുങ്ക്, കന്നഡ, ഹിന്ദി ഉൾപ്പെടെ 17 ഭാഷകളിലായി 40,000-ത്തിലധികം ഗാനങ്ങൾ ആലപിച്ച അപൂർവ ഗായികയായിരുന്നു എസ്. ജാനകി. ആന്ധ്രപ്രദേശ് സ്വദേശിയായ അവർ മികച്ച പിന്നണി ഗായികയ്ക്കുള്ള ദേശീയ ചലച്ചിത്ര പുരസ്കാരം നാല് തവണ നേടി. കേരളം ഉൾപ്പെടെ വിവിധ സംസ്ഥാനങ്ങളുടെ മികച്ച ഗായികയ്ക്കുള്ള പുരസ്കാരങ്ങളും അവരെ തേടിയെത്തി. 2013-ൽ പ്രഖ്യാപിച്ച പത്മഭൂഷൺ ദക്ഷിണേന്ത്യൻ കലാകാരന്മാരോടുള്ള അവഗണനയിൽ പ്രതിഷേധിച്ച് അവർ നിരസിച്ചിരുന്നു.

ആന്ധ്രപ്രദേശിലെ ഗുണ്ടൂരിൽ നിന്ന് ആരംഭിച്ച സംഗീതയാത്ര 1956-ൽ ആകാശവാണി നടത്തിയ അഖിലേന്ത്യാ സംഗീതമത്സരത്തിലെ രണ്ടാംസ്ഥാനത്തോടെയാണ് ശ്രദ്ധ നേടിയത്. 1957-ൽ ‘വിധിയിൻ വിളയാട്ട്’ എന്ന തമിഴ് ചിത്രത്തിലൂടെ ചലച്ചിത്രഗാനരംഗത്തേക്ക് കടന്ന അവർ ആദ്യവർഷം തന്നെ അഞ്ച് ഭാഷകളിൽ പാടി. ‘കൊഞ്ചും ചിലങ്കൈ’ എന്ന തമിഴ് ചിത്രത്തിലെ ‘ശിങ്കാര വേലനെ ദേവ’ എന്ന ഗാനത്തിലൂടെയാണ് തെന്നിന്ത്യയിലെ മുൻനിര ഗായികയായി ഉയർന്നത്.

ഉയർന്ന സ്ഥായിയിലുള്ള ഗാനങ്ങൾ പോലും അനായാസം ആലപിക്കുന്ന കഴിവും, വരികളുടെ അർഥവും ഉച്ചാരണവും മനസ്സിലാക്കി ഹൃദയസ്പർശിയായി പാടുന്ന ശൈലിയും എസ്. ജാനകിയെ ഓരോ ഭാഷയിലെയും സംഗീതാസ്വാദകർക്ക് സ്വന്തം ഗായികയാക്കി.

1957-ൽ പുറത്തിറങ്ങിയ ‘മിന്നുന്നതെല്ലാം പൊന്നല്ല’ എന്ന ചിത്രത്തിലെ ‘ഇരുള്‍ മൂടുകയോ എന്‍ വഴിയില്‍’ എന്ന ഗാനത്തിലൂടെയാണ് മലയാള സിനിമയിലേക്കുള്ള അരങ്ങേറ്റം. എം.എസ്. ബാബുരാജിന്റെ ഈണങ്ങളിൽ പാടിയ ഗാനങ്ങളിലൂടെ ജാനകിയമ്മ മലയാളികളുടെ ഹൃദയത്തിൽ കൂടുതൽ പ്രിയങ്കരിയായി. മികച്ച ഗായികയ്ക്കുള്ള ദേശീയ പുരസ്കാരം മലയാളത്തിലേക്ക് എത്തിച്ചതും എസ്. ജാനകിയിലൂടെയായിരുന്നു. ഏറ്റവും കൂടുതൽ സംസ്ഥാന പുരസ്കാരങ്ങൾ നൽകി ആദരിച്ചതും കേരളമാണ്.

തലമുറകൾക്ക് താരാട്ടും പ്രണയവും വിരഹവും ഭക്തിയും ഒരുപോലെ സ്വരമാധുര്യമായി സമ്മാനിച്ച ആ ശബ്ദം ഇനി ഓർമകളിൽ മാത്രം.