വാഷിംഗ്ടൺ: അമേരിക്കയിൽ ജോലി ചെയ്യാനും പഠിക്കാനും ആഗ്രഹിക്കുന്ന വിദേശ പ്രൊഫഷണലുകൾക്കും വിദ്യാർത്ഥികൾക്കും കനത്ത പ്രതിസന്ധി സൃഷ്ടിച്ചുകൊണ്ട് യുഎസ് ഇമിഗ്രേഷൻ നിയമങ്ങൾ കൂടുതൽ കർശനമാക്കാൻ ഡൊണാൾഡ് ട്രംപ് ഭരണകൂടം ഒരുങ്ങുന്നു. യുഎസിലെ ഏറ്റവും വലിയ കുടിയേറ്റ സമൂഹങ്ങളിലൊന്നായ ഇന്ത്യക്കാരെയായിരിക്കും ഈ പുതിയ നിയന്ത്രണങ്ങൾ ഏറ്റവും കൂടുതൽ ബാധിക്കുക.
എച്ച്-1ബി വിസ, എൽ-1 വിസ, സ്റ്റുഡന്റ് വിസ എന്നിവയുമായി ബന്ധപ്പെട്ട് കടുത്ത മാറ്റങ്ങളാണ് യുഎസ് ആഭ്യന്തര സുരക്ഷാ വകുപ്പും തൊഴിൽ വകുപ്പും പുറത്തിറക്കിയ പുതിയ റഗുലേറ്ററി അജണ്ടയിൽ നിർദേശിച്ചിരിക്കുന്നത്. നിർദേശങ്ങൾ ഉടൻ പ്രാബല്യത്തിൽ വരില്ലെങ്കിലും ഭരണകൂടത്തിന്റെ ഭാവി നയങ്ങളുടെ വ്യക്തമായ സൂചനയാണിതെന്ന് വിലയിരുത്തപ്പെടുന്നു.
എച്ച്-1ബി വിസയ്ക്ക് ഓഗസ്റ്റ് മുതൽ കടുത്ത നിബന്ധനകൾ
യുഎസ് കമ്പനികൾക്ക് വിദേശ പ്രൊഫഷണലുകളെ നിയമിക്കാൻ അനുവദിക്കുന്ന എച്ച്-1ബി വിസയുടെ യോഗ്യതാ മാനദണ്ഡങ്ങൾ ഓഗസ്റ്റ് മാസത്തോടെ കൂടുതൽ കർശനമാക്കാനാണ് പദ്ധതി. പ്രധാനമായും ഇന്ത്യൻ ഐടി, കൺസൾട്ടിംഗ് കമ്പനികൾ വ്യാപകമായി ഉപയോഗിക്കുന്ന ‘തേർഡ് പാർട്ടി ക്ലയന്റ് സൈറ്റ്’ മാതൃകയ്ക്ക് മേൽ കൂടുതൽ നിരീക്ഷണമുണ്ടാകും.
കമ്പനിയും ജീവനക്കാരനും തമ്മിലുള്ള തൊഴിൽബന്ധം തെളിയിക്കുന്ന കൂടുതൽ രേഖകൾ സമർപ്പിക്കേണ്ടിവരും. കൂടാതെ, എച്ച്-1ബി, എൽ-1 വിസകളിൽ ഭൂരിഭാഗം ജീവനക്കാരെയും നിലനിർത്തുന്ന കമ്പനികൾക്ക് വിസ പുതുക്കലിന് അധിക ഫീസ് ഈടാക്കാനും നീക്കമുണ്ട്. ഇതോടെ കമ്പനികളുടെ ചെലവ് ഗണ്യമായി വർധിക്കും.
ശമ്പള പരിധി ഉയരും, ഗ്രീൻ കാർഡ് ചെലവും കൂടും
വിദേശ ജീവനക്കാരെ സ്പോൺസർ ചെയ്യുന്നതിനായി കമ്പനികൾ നൽകേണ്ട ഏറ്റവും കുറഞ്ഞ ശമ്പളപരിധി ഉയർത്താനാണ് തൊഴിൽ വകുപ്പ് ആലോചിക്കുന്നത്. എൻട്രി ലെവൽ ശമ്പളം നിലവിലെ 17-ാം പെർസന്റൈലിൽ നിന്ന് 34-ാം പെർസന്റൈലിലേക്ക് ഉയർത്താനുള്ള നിർദേശമാണ് മുന്നിലുള്ളത്.
ഇതോടെ വിദേശ തൊഴിലാളികളെ നിയമിക്കുന്നത് കമ്പനികൾക്ക് കൂടുതൽ സാമ്പത്തിക ബാധ്യതയാകും. ഈ അനിശ്ചിതത്വങ്ങളുടെ പശ്ചാത്തലത്തിൽ നിരവധി ഇന്ത്യൻ പ്രൊഫഷണലുകൾ സ്ഥിരതാമസത്തിനായി യുകെ ഉൾപ്പെടെയുള്ള മറ്റ് രാജ്യങ്ങളെ പരിഗണിക്കാൻ തുടങ്ങിയിട്ടുണ്ടെന്നും റിപ്പോർട്ടുകളുണ്ട്.
ഇന്ത്യൻ വിദ്യാർത്ഥികൾക്കും തിരിച്ചടി
2024-25 അധ്യയന വർഷത്തിൽ മാത്രം 3.6 ലക്ഷത്തിലധികം വിദ്യാർത്ഥികളുമായി യുഎസിലെ ഏറ്റവും വലിയ അന്താരാഷ്ട്ര വിദ്യാർത്ഥി സമൂഹമായി ഇന്ത്യ മാറിയിരുന്നു. പുതിയ സ്റ്റുഡന്റ് വിസ നിയമങ്ങൾ ഇവരെ നേരിട്ട് ബാധിക്കുമെന്നാണ് വിലയിരുത്തൽ.
നിലവിലുള്ള ‘ഡ്യൂറേഷൻ ഓഫ് സ്റ്റാറ്റസ്’ സംവിധാനം അവസാനിപ്പിക്കാൻ യുഎസ് ഒരുങ്ങുകയാണ്. നിലവിൽ പഠനം തുടരുന്നിടത്തോളം കാലം യുഎസിൽ തുടരാൻ അനുവദിക്കുന്ന സംവിധാനത്തിന് പകരം നിശ്ചിത കാലയളവിലേക്കുള്ള വിസയാണ് അനുവദിക്കുക. തുടർന്ന് പഠനം തുടരാൻ പ്രത്യേക വിസ വിപുലീകരണത്തിന് അപേക്ഷിക്കേണ്ടിവരും.
കൂടാതെ, വിദ്യാർത്ഥികൾക്ക് തൊഴിൽപരിചയം നേടാൻ സഹായിക്കുന്ന ഒപ്ഷണൽ പ്രാക്ടിക്കൽ ട്രെയിനിംഗ് (OPT) നിയമങ്ങളും 2027 ഫെബ്രുവരിയോടെ കൂടുതൽ കർശനമാക്കാൻ സാധ്യതയുണ്ട്.
എച്ച്-4 വിസക്കാർക്കും തൊഴിൽ നഷ്ട ഭീഷണി
എച്ച്-1ബി വിസക്കാരുടെ പങ്കാളികൾക്ക് അനുവദിക്കുന്ന എച്ച്-4 വിസയിലെ തൊഴിൽ അനുമതി രേഖകളുടെ യാന്ത്രിക കാലാവധി നീട്ടൽ ഈ മാസം മുതൽ അവസാനിപ്പിക്കാനാണ് സാധ്യത. ഗ്രീൻ കാർഡിനായി വർഷങ്ങളായി കാത്തിരിക്കുന്ന നിരവധി ഇന്ത്യൻ കുടുംബങ്ങളെ ഇത് ബാധിക്കും.
തൊഴിൽ അനുമതി പുതുക്കുന്നതിൽ ചെറിയ താമസം വന്നാൽ പോലും ഇവർക്ക് യുഎസിൽ ജോലി ചെയ്യാനുള്ള നിയമപരമായ അവകാശം താൽക്കാലികമായി നഷ്ടപ്പെടാൻ സാധ്യതയുണ്ട്.
ഈ നിർദേശങ്ങൾ നിയമമാകുന്നതിന് മുമ്പ് പൊതുജനാഭിപ്രായം, ഔദ്യോഗിക അംഗീകാരം, നിയമപരമായ വെല്ലുവിളികൾ എന്നിവ നേരിടേണ്ടതുണ്ടെങ്കിലും, കുടിയേറ്റ നിയമങ്ങൾ കൂടുതൽ കർശനമാക്കാനുള്ള നീക്കമാണ് ട്രംപ് ഭരണകൂടം സ്വീകരിക്കുന്നതെന്ന് കുടിയേറ്റ നിയമവിദഗ്ധർ വിലയിരുത്തുന്നു.