തിരുവനന്തപുരം: കേരള നിയമസഭാ തിരഞ്ഞെടുപ്പിനുള്ള നാമനിർദ്ദേശ പത്രിക സമർപ്പിക്കാനുള്ള സമയപരിധി ഇന്ന് അവസാനിക്കുന്നു. പ്രമുഖ സ്ഥാനാർത്ഥികളെല്ലാം കഴിഞ്ഞ ദിവസങ്ങളിലായി പത്രിക നൽകിയെങ്കിലും, ബാക്കിയുള്ളവർ ഇന്ന് അതത് വരണാധികാരികൾക്ക് മുൻപാകെ പത്രിക സമർപ്പിക്കും. പുനലൂരിലെ യുഡിഎഫ് തർക്കം പരിഹരിക്കപ്പെട്ടതോടെ സ്ഥാനാർത്ഥി നൗഷാദ് യൂനുസ് ഇന്ന് പത്രിക നൽകും. കരുനാഗപ്പള്ളിയിലെ എൻഡിഎ സ്ഥാനാർത്ഥി ജിതിൻ ദേവിന്റെ പത്രികാ സമർപ്പണത്തിന് സാക്ഷ്യം വഹിക്കാൻ മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് എത്തുന്നതും തുടർന്ന് നടക്കുന്ന റോഡ് ഷോയും ഇന്നത്തെ പ്രധാന രാഷ്ട്രീയ നീക്കങ്ങളാണ്.
കൊട്ടാരക്കരയിലെ ആർ. രശ്മി (എൻഡിഎ), ഇരവിപുരത്തെ വിഷ്ണു മോഹൻ (യുഡിഎഫ്), എം. നൗഷാദ് (എൽഡിഎഫ്), കൊല്ലത്തെ എസ്. ജയമോഹൻ (എൽഡിഎഫ്), ചടയമംഗലത്തെ എം.എം. നസീർ (യുഡിഎഫ്), കുണ്ടറയിലെ റോബിൻ രാധാകൃഷ്ണൻ (എൻഡിഎ), എസ്.എൽ. സജികുമാർ (എൽഡിഎഫ്) എന്നിവരും ഇന്ന് പത്രിക സമർപ്പിക്കുന്നവരിൽ ഉൾപ്പെടുന്നു. പത്രികാ സമർപ്പണം പൂർത്തിയാകുന്നതോടെ സംസ്ഥാനത്തെ 140 മണ്ഡലങ്ങളിലെയും അന്തിമ മത്സരചിത്രം തെളിയും. വോട്ടെടുപ്പിന് ഇനി വെറും 17 ദിവസങ്ങൾ മാത്രം ബാക്കിനിൽക്കെ, ഭരണത്തുടർച്ച ലക്ഷ്യമിടുന്ന എൽഡിഎഫും തിരിച്ചുപിടിക്കാൻ ഉറച്ച യുഡിഎഫും മാറ്റത്തിനായി പോരാടുന്ന എൻഡിഎയും പ്രചാരണരംഗത്ത് ആവേശം കൂട്ടിയിരിക്കുകയാണ്. പത്രികകളുടെ സൂക്ഷ്മപരിശോധന നാളെ നടക്കും.