മലബാറിൽ വൻ തരംഗമുണ്ടാകുമെന്ന് പ്രവചനം; ബേപ്പൂരിൽ വിജയം ഉറപ്പെന്നും മലപ്പുറവും വയനാടും തൂത്തുവാരുമെന്നും മുൻ എംഎൽഎ
മലപ്പുറം: നിയമസഭാ തിരഞ്ഞെടുപ്പിൽ യുഡിഎഫ് 89 സീറ്റുകൾ നേടി ഉജ്ജ്വല വിജയം കൈവരിക്കുമെന്ന സർവ്വേ റിപ്പോർട്ടുമായി ബേപ്പൂരിലെ യുഡിഎഫ് സ്ഥാനാർത്ഥിയും മുൻ എംഎൽഎയുമായ പി.വി. അൻവർ. തന്റെ ഫേസ്ബുക്ക് പേജിലൂടെ പുറത്തുവിട്ട പോഡ്കാസ്റ്റിലാണ് അൻവർ ഈ സർവ്വേ ഫലങ്ങൾ അവതരിപ്പിച്ചത്. മലബാറിൽ ആഞ്ഞടിക്കുന്ന പിണറായി വിരുദ്ധ തരംഗം യുഡിഎഫിന് ഭരണത്തിലേറാൻ വഴിയൊരുക്കുമെന്നും അദ്ദേഹം അവകാശപ്പെട്ടു. ധർമ്മടത്ത് മുഖ്യമന്ത്രിയുടെ ഭൂരിപക്ഷം പതിനായിരത്തിൽ താഴെയായി കുറയുമെന്നും ഒരുപക്ഷേ അദ്ദേഹം പരാജയപ്പെട്ടാൽ പോലും അതിൽ ഞെട്ടേണ്ടതില്ലെന്നും അൻവർ കൂട്ടിച്ചേർത്തു.
സർവ്വേ പ്രകാരം മലബാറിലെ 60 സീറ്റുകളിൽ 40 എണ്ണവും യുഡിഎഫ് സ്വന്തമാക്കും. മലപ്പുറം, വയനാട് ജില്ലകളിലെ മുഴുവൻ സീറ്റുകളും യുഡിഎഫിന് ലഭിക്കുമെന്നും റിപ്പോർട്ടിൽ പറയുന്നു. മധ്യകേരളത്തിലെ 32 സീറ്റുകളിൽ 21 എണ്ണത്തിലും തെക്കൻ കേരളത്തിലെ 48 സീറ്റുകളിൽ 25 എണ്ണത്തിലും യുഡിഎഫ് വിജയിക്കും. ബേപ്പൂരിൽ താൻ വിജയിക്കുമെന്ന് പറയുന്ന സർവ്വേ റിപ്പോർട്ടിൽ മലമ്പുഴയിൽ ബിജെപി സ്ഥാനാർത്ഥി എസ്. സുരേഷ് വിജയിക്കുമെന്നും പ്രവചിക്കുന്നുണ്ട്. പേരാമ്പ്ര, ബാലുശ്ശേരി, എലത്തൂർ മണ്ഡലങ്ങളിൽ ശക്തമായ മത്സരമായിരിക്കും നടക്കുകയെന്നും അൻവർ ചൂണ്ടിക്കാട്ടി.
അതേസമയം, തിരഞ്ഞെടുപ്പിന്റെ യഥാർത്ഥ ചിത്രം വ്യക്തമാക്കുന്ന വിവിധ ദേശീയ മാധ്യമങ്ങളുടെയും ഏജൻസികളുടെയും എക്സിറ്റ് പോൾ ഫലങ്ങൾ ഇന്ന് വൈകിട്ടോടെ പുറത്തുവരും. ഇന്ത്യ ടുഡേ, ടൈംസ് നൗ, ന്യൂസ് 18 തുടങ്ങിയ പ്രമുഖ മാധ്യമങ്ങളും സി-വോട്ടർ ഉൾപ്പെടെയുള്ള ഏജൻസികളും നടത്തുന്ന സർവ്വേ ഫലങ്ങൾക്കായി രാഷ്ട്രീയ കേരളം ഉറ്റുനോക്കുകയാണ്. മെയ് നാലാം തീയതിയാണ് ഔദ്യോഗിക വോട്ടെണ്ണലും ഫലപ്രഖ്യാപനവും നടക്കുക.