മുംബൈ: ഐപിഎല് 2026 സീസണില് മികച്ച ഫോമില് തുടരുന്ന പഞ്ചാബ് കിംഗ്സിന്റെ പ്രധാന ലക്ഷ്യം കിരീടം സ്വന്തമാക്കുകയാണെന്ന് നായകന് ശ്രേയസ് അയ്യര് വ്യക്തമാക്കി. എന്നാല് ഭാവിയെക്കുറിച്ച് അമിതമായി ചിന്തിക്കാതെ ഓരോ മത്സരത്തിലും ശ്രദ്ധ കേന്ദ്രീകരിക്കാനാണ് ടീമിന്റെ സമീപനമെന്നും അദ്ദേഹം പറഞ്ഞു.
റിക്കി പോണ്ടിംഗ് പരിശീലകനായ പഞ്ചാബ് കിംഗ്സ് ഈ സീസണില് ഇതുവരെ തോല്വി അറിയാത്ത ഏക ടീമാണ്. കളിച്ച അഞ്ച് മത്സരങ്ങളില് നാലിലും വിജയം നേടിയപ്പോള് ഒരു മത്സരം മഴ മൂലം ഉപേക്ഷിക്കപ്പെട്ടു. ടീമിലെ ഐക്യവും സ്ഥിരതയുള്ള പ്രകടനവുമാണ് വിജയത്തിന് പിന്നിലെന്നും അയ്യര് കൂട്ടിച്ചേര്ത്തു.
ഓരോ ദിവസവും സ്വയം മെച്ചപ്പെടുത്താന് ശ്രമിക്കണമെന്നും എതിരാളികളെക്കാള് സ്വന്തം പ്രകടനത്തില് ശ്രദ്ധ കേന്ദ്രീകരിക്കണമെന്നും സഹതാരങ്ങളോട് നിര്ദേശിക്കാറുണ്ടെന്ന് അയ്യര് പറഞ്ഞു. ടീമില് ഒത്തൊരുമയുണ്ടെങ്കില് ഫലങ്ങള് സ്വാഭാവികമായി ലഭിക്കുമെന്നും അദ്ദേഹം വ്യക്തമാക്കി.
ഇതിനിടെ, കഴിഞ്ഞ മത്സരത്തില് മുംബൈ ഇന്ത്യന്സിനെതിരെ ഏഴ് വിക്കറ്റിന്റെ തകര്പ്പന് ജയം സ്വന്തമാക്കി പഞ്ചാബ് കിംഗ്സ് അപരാജിത കുതിപ്പ് തുടരുകയായിരുന്നു. ആദ്യം ബാറ്റ് ചെയ്ത മുംബൈ 195 റണ്സ് നേടിയപ്പോള്, മറുപടിയായി പഞ്ചാബ് വെറും 16.3 ഓവറില് ലക്ഷ്യം കണ്ടു. പ്രഭ്സിമ്രാന് സിംഗ്, ശ്രേയസ് അയ്യര് എന്നിവര് നടത്തിയ മികച്ച ബാറ്റിംഗ് പ്രകടനമാണ് ടീമിന് അനായാസ ജയം സമ്മാനിച്ചത്.