ന്യൂഡൽഹി: ഇന്ത്യൻ വാഹന വിപണിയിൽ ഹൈബ്രിഡ് കാറുകൾക്ക് സ്വീകാര്യത ഏറുന്ന പശ്ചാത്തലത്തിൽ, പ്രമുഖ നിർമ്മാതാക്കൾ വമ്പൻ സെവൻ സീറ്റർ ഹൈബ്രിഡ് എസ്യുവികളുമായി രംഗത്തെത്തുന്നു. നിലവിൽ ടൊയോട്ടയും മാരുതിയും ഹോണ്ടയും ആധിപത്യം പുലർത്തുന്ന ഈ മേഖലയിലേക്ക് ഹ്യുണ്ടായ്, കിയ, റെനോ തുടങ്ങിയ കമ്പനികളും ചുവടുവെക്കുന്നതോടെ മത്സരം കടുക്കും. 2029-ഓടെ ഹൈബ്രിഡ് വാഹന വിപണിയിൽ 24.81 ശതമാനം വാർഷിക വളർച്ചയുണ്ടാകുമെന്നാണ് കണക്കുകൾ സൂചിപ്പിക്കുന്നത്. വലിയ കുടുംബങ്ങളെ ലക്ഷ്യമിട്ട് വിപണിയിലെത്താനൊരുങ്ങുന്ന അഞ്ച് പ്രമുഖ ഹൈബ്രിഡ് എസ്യുവികൾ ഇവയാണ്:
ഗ്രാൻഡ് വിറ്റാരയുടെ പ്ലാറ്റ്ഫോമിനെ അടിസ്ഥാനമാക്കി 4.5 മീറ്ററിലധികം നീളമുള്ള പ്രീമിയം ത്രീ-റോ എസ്യുവി പുറത്തിറക്കുമെന്ന് മാരുതി സുസുക്കി സ്ഥിരീകരിച്ചു കഴിഞ്ഞു. മഹീന്ദ്ര XUV 7XO, ഹ്യുണ്ടായ് അൽകാസർ തുടങ്ങിയവയുമായി മത്സരിക്കുന്ന ഈ വാഹനത്തിന് പെട്രോൾ, സ്ട്രോങ്ങ് ഹൈബ്രിഡ്, സിഎൻജി ഓപ്ഷനുകൾ ഉണ്ടാകും. ഇതിന് പിന്നാലെ ടൊയോട്ടയും തങ്ങളുടെ സെവൻ സീറ്റർ ഹൈറൈഡർ പുറത്തിറക്കാനുള്ള തയ്യാറെടുപ്പിലാണ്. നിലവിലെ അഞ്ച് സീറ്റർ മോഡലിനേക്കാൾ നീളക്കൂടുതലുള്ള ഈ വാഹനം പരീക്ഷണ ഓട്ടം ആരംഭിച്ചുകഴിഞ്ഞു. 2026 അവസാനത്തോടെ ഈ രണ്ട് മോഡലുകളും വിപണിയിലെത്തുമെന്നാണ് പ്രതീക്ഷിക്കുന്നത്.
ദക്ഷിണ കൊറിയൻ കമ്പനിയായ കിയ, തങ്ങളുടെ ആദ്യ ഹൈബ്രിഡ് മോഡലായി ‘സോറന്റോ’ അടിസ്ഥാനമാക്കിയുള്ള സെവൻ സീറ്റർ എസ്യുവി 2026-ഓടെ അവതരിപ്പിക്കും. 1.5 ലിറ്റർ പെട്രോൾ ഹൈബ്രിഡ് എൻജിനായിരിക്കും ഇതിലുണ്ടാകുക. സമാനമായ രീതിയിൽ ഹ്യുണ്ടായിയും തങ്ങളുടെ പുതിയ സെവൻ സീറ്റർ മോഡലായ ‘Ni1i’ വികസിപ്പിക്കുന്നുണ്ട്. ചൈനീസ് വിപണിയിലുള്ള ട്യൂസൺ ലോംഗ് വീൽബേസിനെ അടിസ്ഥാനമാക്കിയായിരിക്കും ഈ വാഹനത്തിന്റെ നിർമ്മാണം. 1.5 ലിറ്റർ പെട്രോൾ എൻജിന്റെ ഇലക്ട്രിക് പതിപ്പായിരിക്കും ഇതിന് കരുത്തേകുക.
ഫ്രഞ്ച് കമ്പനിയായ റെനോ തങ്ങളുടെ പുതിയ ഡസ്റ്ററിന്റെ സെവൻ സീറ്റർ പതിപ്പായ ‘ബോറിയൽ’ ഉടൻ വിപണിയിലെത്തിക്കും. 1.8 ലിറ്റർ പെട്രോൾ എൻജിനും ഇലക്ട്രിക് മോട്ടറും ചേരുന്ന ഹൈബ്രിഡ് സംവിധാനമായിരിക്കും ബോറിയലിന്റെ പ്രധാന ആകർഷണം. കുറഞ്ഞ ഇന്ധനച്ചെലവിൽ കൂടുതൽ ദൂരം സഞ്ചരിക്കാമെന്നതും പരിസ്ഥിതി സൗഹൃദമാണെന്നതും വരും വർഷങ്ങളിൽ ഹൈബ്രിഡ് വാഹനങ്ങളുടെ സ്വീകാര്യത വർദ്ധിപ്പിക്കും. കൂടുതൽ ഓപ്ഷനുകൾ എത്തുന്നതോടെ ഉപഭോക്താക്കൾക്ക് തങ്ങളുടെ ബജറ്റിനും സൗകര്യത്തിനുമനുസരിച്ചുള്ള ഹൈബ്രിഡ് എസ്യുവികൾ തിരഞ്ഞെടുക്കാൻ സാധിക്കും.