ന്യൂഡല്ഹി: ശബരിമല യുവതീപ്രവേശന കേസിലെ പുനഃപരിശോധനാ ഹര്ജികളില് സുപ്രീംകോടതി ഭരണഘടനാ ബെഞ്ചില് നടക്കുന്ന വാദത്തിനിടെ അതിനിര്ണ്ണായക നിരീക്ഷണവുമായി ജസ്റ്റിസ് ബി.വി. നാഗരത്ന. യുവതീപ്രവേശം ആവശ്യപ്പെട്ട് കോടതിയെ സമീപിച്ച ആദ്യ ഹര്ജിക്കാര് വിശ്വാസികളല്ലെന്നും, വിശ്വാസമില്ലാത്തവരുടെ ഹര്ജികള് കോടതി എന്തിന് കേള്ക്കണമെന്നും ജസ്റ്റിസ് നാഗരത്ന ചോദിച്ചു. ഇത്തരം പൊതുതാല്പര്യ ഹര്ജികള് കോടതി സ്വീകരിക്കാനേ പാടില്ലായിരുന്നുവെന്നും അവര് വ്യക്തമാക്കി.
യുവതീപ്രവേശത്തിനായി ഏതെങ്കിലും അയ്യപ്പ വിശ്വാസി ഹര്ജി നല്കിയിട്ടുണ്ടോ എന്ന് ചോദിച്ച നാഗരത്ന, പലവിധ അജണ്ടകളുമായി എത്തുന്നവര്ക്ക് ഇത്തരം കാര്യങ്ങളില് എങ്ങനെ ഇടപെടാനാകുമെന്നും ആരാഞ്ഞു. വിശ്വാസികള് അല്ലാത്തവര് ഹര്ജി നല്കേണ്ടതില്ലെന്നും ആചാരപരമായ കാര്യങ്ങളില് ഇവരുടെ ഇടപെടല് അനുവദിക്കാനാകില്ലെന്നും അവര് നിരീക്ഷിച്ചു. ഹര്ജിക്കാരുടെ വിശ്വാസം സംബന്ധിച്ച ഈ ചോദ്യങ്ങള്ക്കുള്ള ഉത്തരം പുനഃപരിശോധനാ വിധിയില് നിര്ണ്ണായകമാകുമെന്ന് ചീഫ് ജസ്റ്റിസും വ്യക്തമാക്കി.
അതേസമയം, ചില ആചാരങ്ങള് അന്ധവിശ്വാസമാണെന്ന് തീരുമാനിക്കാന് കോടതിക്ക് അധികാരമുണ്ടെന്ന് ചീഫ് ജസ്റ്റിസ് ഡി.വൈ. ചന്ദ്രചൂഡ് നിരീക്ഷിച്ചു. മനുഷ്യബലി പോലുള്ള കാര്യങ്ങള് നടന്നാല് കോടതിക്ക് മറുത്തൊരു പരിശോധനയില്ലാതെ ഇടപെടാം. പൊതുശാന്തിയും നൈതികതയും കണക്കിലെടുത്ത് ആചാരങ്ങളെ വിലയിരുത്താന് കോടതിക്ക് അധികാരമുണ്ടെന്നും അദ്ദേഹം പറഞ്ഞു. എന്നാല് ഒരു മതാചാരത്തെ മാത്രം അന്ധവിശ്വാസമായി വിധിക്കാന് കോടതിക്ക് കഴിയില്ലെന്നും അതിനുള്ള പണ്ഡിത പരിജ്ഞാനം കോടതികള്ക്കില്ലെന്നും കേന്ദ്ര സര്ക്കാര് വാദിച്ചു.
ആചാരങ്ങള് നിര്വഹിക്കാനും ദേവനെ സ്പര്ശിക്കാനും പ്രത്യേക യോഗ്യതയും പരിജ്ഞാനവുമുള്ളവരെ മാത്രമേ മതവിഭാഗങ്ങള് അംഗീകരിക്കൂവെന്നും അക്കാര്യത്തില് സര്ക്കാരിന് ഇടപെടാന് അധികാരമില്ലെന്നും സോളിസിറ്റര് ജനറല് തുഷാര് മേത്ത വ്യക്തമാക്കി. അഞ്ചംഗ ബെഞ്ചിന്റെ വിധി തെറ്റാണെന്നും അത് തിരുത്തണമെന്നുമാണ് കേന്ദ്രത്തിന്റെ നിലപാട്. ശബരിമലയിലെ ആചാരങ്ങളെ ലിംഗവിവേചനമായോ തൊട്ടുകൂടായ്മയായോ കാണരുതെന്നും കേന്ദ്രം ആവര്ത്തിച്ചു. സീനിയോറിറ്റിയുടെ അടിസ്ഥാനത്തില് നാളെയും കേസില് വാദം തുടരും.
സംസ്ഥാനത്ത് നിയമസഭാ തിരഞ്ഞെടുപ്പ് പ്രചാരണം കലാശക്കൊട്ടിലേക്ക് നീങ്ങുമ്പോള് സുപ്രീംകോടതിയില് നിന്നുള്ള ഈ നിരീക്ഷണങ്ങള് രാഷ്ട്രീയ കേരളത്തില് വലിയ ചലനങ്ങളുണ്ടാക്കും. തനിനിറം മെഗാ പ്രീ-പോള് സര്വേ ഫലങ്ങളില് വിശ്വാസികളുടെ നിലപാട് തിരഞ്ഞെടുപ്പിനെ സ്വാധീനിക്കുമെന്ന് വ്യക്തമാക്കിയ സാഹചര്യത്തില്, ഭരണഘടനാ ബെഞ്ചിലെ പുതിയ നിരീക്ഷണങ്ങള് വോട്ടര്മാരുടെ നിലപാടില് നിര്ണ്ണായകമാകും. പശ്ചിമേഷ്യന് സമാധാന ചര്ച്ചകളും ആഗോള വിപണിയിലെ എണ്ണവില മാറ്റങ്ങളും പ്രവാസികള്ക്കിടയില് വലിയ ചര്ച്ചയാകുന്നതിനിടയിലാണ് വിശ്വാസികള്ക്കും വിശ്വാസ സംരക്ഷണത്തിനും കരുത്തേകുന്ന വാക്കുകള് സുപ്രീംകോടതിയില് നിന്ന് ഉയരുന്നത്.