മുംബൈ: മഹാരാഷ്ട്രയിലെ നാന്ദേഡിൽ ഒരു വർഷം മുൻപ് നിർമ്മാണം പൂർത്തിയാക്കിയ ദേശീയപാതയിലെ ഫ്ലൈഓവറിന്റെ ഒരു ഭാഗം തകർന്നു വീണു. അപകടത്തിൽ രണ്ടുപേർക്ക് പരിക്കേറ്റു. പുലർച്ചെയുണ്ടായ ഭൂചലനമാണ് തകർച്ചയ്ക്ക് കാരണമെന്ന് കോൺട്രാക്ടർ വിശദീകരിച്ചെങ്കിലും രാവിലെ 10 മണിയോടെയാണ് ഫ്ലൈഓവർ തകർന്നത്. സംഭവത്തിൽ അധികൃതർ അന്വേഷണം ആരംഭിച്ചിട്ടുണ്ട്.
നാന്ദേഡ്–ലാത്തൂർ ദേശീയപാതയിൽ നന്ദേഡിന് സമീപമുള്ള വിഷ്ണുപുരി മേഖലയിലെ തിരക്കേറിയ ഭാഗത്താണ് ഫ്ലൈഓവറിന്റെ ഒരു ഭാഗം തകർന്നുവീണത്. ഒരു വർഷം മുമ്പാണ് പാലത്തിന്റെ നിർമ്മാണം പൂർത്തിയായിരുന്നത്.
അപകടത്തെ തുടർന്ന് ദേശീയപാതയിലെ ഗതാഗതം സ്തംഭിച്ചു. രക്ഷാപ്രവർത്തനങ്ങളും ഗതാഗത നിയന്ത്രണ നടപടികളും ആരംഭിച്ചതോടെ നിരവധി യാത്രക്കാർ വഴിയിൽ കുടുങ്ങി. സംഭവത്തിന് പിന്നാലെ പോലീസും ദുരന്തനിവാരണ സേനയും സ്ഥലത്തെത്തി പ്രദേശം സുരക്ഷിതമാക്കുകയും രക്ഷാപ്രവർത്തനങ്ങൾക്ക് നേതൃത്വം നൽകുകയും ചെയ്തു.
പാലം തകർന്നതിന്റെ യഥാർഥ കാരണം ഇതുവരെ കണ്ടെത്താനായിട്ടില്ലെന്ന് അധികൃതർ അറിയിച്ചു. ഗതാഗതം പൂർണമായും പുനഃസ്ഥാപിക്കുന്നതുവരെ തടസ്സങ്ങൾ തുടരുമെന്നും യാത്രക്കാർ ബാധിത ഭാഗങ്ങൾ ഒഴിവാക്കി അധികൃതർ നിർദേശിക്കുന്ന വഴിതിരിച്ചുവിടലുകൾ ഉപയോഗിക്കണമെന്നും അധികൃതർ അഭ്യർഥിച്ചു.