സൗഹൃദത്തിനും രാഷ്ട്രീയച്ചാപ്പയോ?

മമ്മൂട്ടിക്കെതിരായ സൈബർ അധിക്ഷേപം വ്യക്തിസ്വാതന്ത്ര്യത്തിനുമേലുള്ള കടന്നുകയറ്റം; രാഷ്ട്രീയ അസഹിഷ്ണുതയുടെ ആൾക്കൂട്ട വിചാരണകൾ അവസാനിക്കണം

ഒരു കലാകാരൻ ആരുടെ വീട്ടിൽ പോകണം, ആരോട് സൗഹൃദം പുലർത്തണം, ആരുടെ കുടുംബചടങ്ങിൽ പങ്കെടുക്കണം എന്നൊക്കെ തീരുമാനിക്കാനുള്ള അധികാരം രാഷ്ട്രീയ ആൾക്കൂട്ടങ്ങൾക്കില്ല. വ്യക്തിബന്ധങ്ങളെപ്പോലും രാഷ്ട്രീയ വിശ്വാസത്തിന്റെ അളവുകോലിൽ അളക്കുകയും അതിന്റെ പേരിൽ വ്യക്തിഹത്യ നടത്തുകയും ചെയ്യുന്ന പ്രവണത ജനാധിപത്യത്തിന്റെ ആരോഗ്യകരമായ നിലനിൽപ്പിന് ഭീഷണിയാണ്. മലയാളത്തിന്റെ മഹാനടൻ മമ്മൂട്ടിക്കെതിരെ അടുത്തിടെ ഉയർന്ന സൈബർ അധിക്ഷേപങ്ങൾ ഈ രാഷ്ട്രീയ അസഹിഷ്ണുതയുടെ അപകടകരമായ മുഖമാണ് തുറന്നുകാട്ടുന്നത്. ബി.ജെ.പി സംസ്ഥാന ഉപാധ്യക്ഷൻ ബി. ഗോപാലകൃഷ്ണന്റെ മകളുടെ വിവാഹത്തോടനുബന്ധിച്ച് ആശംസകൾ നേരാൻ മമ്മൂട്ടി തൃശൂരിലെ വീട്ടിലെത്തിയതാണ് ചില സൈബർ കേന്ദ്രങ്ങളുടെ വിചാരണയ്ക്ക് കാരണമായത്. ഒരു കുടുംബചടങ്ങിൽ പങ്കെടുത്തതിനെ രാഷ്ട്രീയ നിലപാടിന്റെ പ്രഖ്യാപനമായി വ്യാഖ്യാനിക്കുകയും അതിന്റെ പേരിൽ ഒരു കലാകാരനെ വ്യക്തിപരമായി അധിക്ഷേപിക്കുകയും ചെയ്യുന്നത് എന്തുതരം ജനാധിപത്യബോധമാണ്? സൗഹൃദവും കുടുംബബന്ധവും രാഷ്ട്രീയ വിധേയത്വത്തിന്റെ തെളിവുകളല്ല. രാഷ്ട്രീയമായി വ്യത്യസ്ത നിലപാടുകളുള്ളവരുമായി സൗഹൃദം പുലർത്താനും വ്യക്തിബന്ധങ്ങൾ കാത്തുസൂക്ഷിക്കാനും ഓരോ പൗരനും അവകാശമുണ്ട്.
മമ്മൂട്ടി ഏതെങ്കിലും രാഷ്ട്രീയ പാർട്ടിയുടെ പ്രതിനിധിയല്ല. അദ്ദേഹം ഒരു കലാകാരനാണ്; അതിനുമപ്പുറം സ്വന്തം നിലപാടുകളും ബന്ധങ്ങളും ജീവിതവുമുള്ള വ്യക്തിയാണ്. അദ്ദേഹത്തിന്റെ കലാജീവിതത്തെ വിമർശിക്കാം, സാമൂഹിക ഇടപെടലുകളോട് വിയോജിക്കാം. എന്നാൽ ആരുടെ വീട്ടിൽ പോയി എന്നതിന്റെ പേരിൽ രാഷ്ട്രീയച്ചാപ്പ കുത്തി വിചാരണ ചെയ്യുന്നത് വിമർശനമല്ല, വ്യക്തിസ്വാതന്ത്ര്യത്തിനുമേലുള്ള കടന്നുകയറ്റമാണ്. കലാകാരന്റെ വ്യക്തിജീവിതം രാഷ്ട്രീയ വിശ്വസ്തത പരിശോധിക്കുന്ന പരീക്ഷണശാലയാകരുത്. വിയോജിപ്പും വിമർശനവും ജനാധിപത്യത്തിന്റെ കരുത്താണ്. എന്നാൽ വിമർശനത്തിന് യുക്തിയും മര്യാദയും വേണം. വ്യക്തിയെ അപമാനിക്കുകയും കുടുംബബന്ധങ്ങളെ സംശയത്തിന്റെ നിഴലിലാക്കുകയും ചെയ്യുന്ന അധിക്ഷേപങ്ങൾ അഭിപ്രായസ്വാതന്ത്ര്യത്തിന്റെ പരിധിയിൽ ന്യായീകരിക്കാനാവില്ല. സാമൂഹിക മാധ്യമങ്ങളിലെ ആൾക്കൂട്ട വിചാരണകൾ പലപ്പോഴും വസ്തുതകളെക്കാൾ മുൻവിധികൾക്കും രാഷ്ട്രീയ വിദ്വേഷത്തിനുമാണ് പ്രാധാന്യം നൽകുന്നത്. ഒരാളെ ഉയർത്തിക്കാട്ടാനോ തകർക്കാനോ ഉള്ള രാഷ്ട്രീയ ഉപകരണമായി സാമൂഹിക മാധ്യമങ്ങൾ മാറുമ്പോൾ നഷ്ടപ്പെടുന്നത് സമൂഹത്തിന്റെ സംവാദസംസ്കാരമാണ്. ഇവിടെ മമ്മൂട്ടി എന്ന വ്യക്തിയെക്കാൾ വലുതാണ് ഉയരുന്ന ചോദ്യം: രാഷ്ട്രീയ വ്യത്യാസങ്ങളുടെ പേരിൽ മനുഷ്യബന്ധങ്ങളെപ്പോലും നിഷേധിക്കേണ്ട കാലത്തേക്കാണോ നാം നീങ്ങുന്നത്? ഒരു രാഷ്ട്രീയ നേതാവിന്റെ വീട്ടിൽ പോകുന്നത് അയാളുടെ എല്ലാ രാഷ്ട്രീയ നിലപാടുകളെയും അംഗീകരിക്കുന്നതിന്റെ തെളിവാണെങ്കിൽ, ജനാധിപത്യത്തിലെ സംവാദത്തിനും സഹവർത്തിത്വത്തിനും എന്താണ് അർഥം? രാഷ്ട്രീയമായി എതിർചേരികളിലുള്ളവർ പരസ്പരം സംസാരിക്കാതെയും സൗഹൃദം പുലർത്താതെയും ജീവിക്കണമെന്നാണോ ഇത്തരം ആൾക്കൂട്ടങ്ങൾ ആവശ്യപ്പെടുന്നത്?. സാമൂഹിക മാധ്യമങ്ങളിലെ അധിക്ഷേപങ്ങൾക്കെതിരെ ഭരണകൂടവും രാഷ്ട്രീയ നേതൃത്വങ്ങളും മൗനം പാലിക്കരുത്. സ്വന്തം രാഷ്ട്രീയ ചേരിയിലുള്ളവർ നടത്തുന്ന വ്യക്തിഹത്യയോടും അതേ നിലപാടിൽ പ്രതികരിക്കാനുള്ള ആർജവം എല്ലാ രാഷ്ട്രീയ പ്രസ്ഥാനങ്ങളും കാട്ടണം. നിയമവിരുദ്ധമായ ഭീഷണികൾക്കും അപകീർത്തിപ്പെടുത്തലുകൾക്കും എതിരെ നിയമനടപടികൾ ഉണ്ടാകണം. അതോടൊപ്പം, അഭിപ്രായസ്വാതന്ത്ര്യത്തെ മാനിച്ചുകൊണ്ട് വിമർശനത്തിന്റെയും അധിക്ഷേപത്തിന്റെയും അതിർവരമ്പ് തിരിച്ചറിയുന്ന സാമൂഹിക ബോധവും വളരണം. മമ്മൂട്ടിയെപ്പോലൊരു കലാകാരന്റെ വ്യക്തിസ്വാതന്ത്ര്യം സംരക്ഷിക്കപ്പെടേണ്ടത് അദ്ദേഹത്തിന്റെ പ്രശസ്തി കൊണ്ടുമാത്രമല്ല; ഓരോ പൗരന്റെയും സ്വാതന്ത്ര്യം സംരക്ഷിക്കപ്പെടേണ്ടതുകൊണ്ടാണ്. രാഷ്ട്രീയം മനുഷ്യരെ വേർതിരിക്കാനുള്ള മതിലാകരുത്; വ്യത്യസ്ത നിലപാടുകളുള്ളവർക്ക് ഒരുമിച്ച് ജീവിക്കാനുള്ള ഇടമാകണം. സൗഹൃദത്തിന് രാഷ്ട്രീയച്ചാപ്പയും വ്യക്തിബന്ധങ്ങൾക്ക് പ്രത്യയശാസ്ത്ര സർട്ടിഫിക്കറ്റും ആവശ്യപ്പെടുന്നിടത്ത് ജനാധിപത്യം ദുർബലമാകുന്നു. രാഷ്ട്രീയത്തിന് അതിരുകളുണ്ടാകാം; മനുഷ്യബന്ധങ്ങൾക്ക് അത്തരം അതിരുകൾ വരയ്ക്കാൻ ആരെയും അനുവദിക്കരുത്.