തിരുവനന്തപുരം: കേരളത്തെ വിവാദത്തിലാക്കിയ ജിഎൻഎ വൈദ്യുതി കരാറിൽ പുതിയ വെളിപ്പെടുത്തൽ. ജിഎൻഎ എനർജി പ്രൈവറ്റ് ലിമിറ്റഡിനെ കരാറിനായി ആദ്യം ശുപാർശ ചെയ്തത് ചീഫ് സെക്രട്ടറി ബിശ്വനാഥ് സിൻഹയാണെന്നാണ് പുറത്തുവരുന്ന വിവരം. കുറഞ്ഞ നിരക്കിൽ വൈദ്യുതി ലഭിക്കുമെന്ന വിലയിരുത്തലിൽ കമ്പനിയെ പരിഗണിക്കണമെന്ന് ഹിമാചൽ വൈദ്യുതി നിർദേശവുമായി ബന്ധപ്പെട്ട ഫയലിൽ ചീഫ് സെക്രട്ടറി പ്രത്യേകം കുറിപ്പ് രേഖപ്പെടുത്തിയിരുന്നു.
ജിഎൻഎയുമായുള്ള കരാർ കെഎസ്ഇബിക്ക് വലിയ സാമ്പത്തിക നഷ്ടമുണ്ടാക്കുമെന്ന് അന്നത്തെ ബോർഡ് സിഎംഡി എം.ജി. രാജമാണിക്യം മുന്നറിയിപ്പ് നൽകിയിട്ടും അത് പരിഗണിക്കാൻ ചീഫ് സെക്രട്ടറി തയ്യാറായില്ലെന്നാണ് ആരോപണം. കരാർ നടപ്പാക്കാൻ ചീഫ് സെക്രട്ടറിയും മുഖ്യമന്ത്രിയും സമ്മർദം ചെലുത്തിയതായും വിവരങ്ങളുണ്ട്. രാജമാണിക്യത്തെ സ്ഥാനത്തുനിന്ന് മാറ്റുന്നതിന് തൊട്ടുമുമ്പും ചീഫ് സെക്രട്ടറിയുടെ സമ്മർദം തുടർന്നതായാണ് സൂചന. കരാർ വഴി 903 കോടി രൂപയുടെ നഷ്ടമുണ്ടാകുമെന്നായിരുന്നു റിപ്പോർട്ടിലെ മുന്നറിയിപ്പ്.
അതേസമയം, വൈദ്യുതി പ്രതിസന്ധിയുമായി ബന്ധപ്പെട്ട് കെഎസ്ഇബിക്കെതിരെ ഉയർന്ന ആരോപണങ്ങൾ തള്ളി വൈദ്യുതി മന്ത്രി സണ്ണി ജോസഫ് രംഗത്തെത്തി. ബോർഡ് സർക്കാരിന് തെറ്റായ റിപ്പോർട്ട് നൽകിയിട്ടില്ലെന്നും അനാവശ്യ സമ്മർദം ചെലുത്തിയിട്ടില്ലെന്നും മന്ത്രി വ്യക്തമാക്കി. ഇതോടെ വിഷയത്തിൽ മുഖ്യമന്ത്രിയുടെ മുൻ നിലപാടുകളിൽനിന്ന് വ്യത്യസ്തമായ വിശദീകരണമാണ് മന്ത്രിയുടെ ഭാഗത്തുനിന്നുണ്ടായിരിക്കുന്നത്.
കേരളത്തിൽ നിലവിൽ വൈദ്യുതിയുടെ ആവശ്യകത വളരെ കൂടുതലാണ്. വരും വർഷങ്ങളിലും ദീർഘകാലാടിസ്ഥാനത്തിൽ കൂടുതൽ വൈദ്യുതി ആവശ്യമായി വരും. അതിനുള്ള വാങ്ങൽ നടപടികളാണ് ഇപ്പോൾ പുരോഗമിക്കുന്നത്. വൈദ്യുതിയുടെ ആവശ്യകതയെക്കുറിച്ച് കെഎസ്ഇബി സർക്കാരിനെ ആവർത്തിച്ച് അറിയിക്കുക മാത്രമാണ് ചെയ്തതെന്നും മന്ത്രി വിശദീകരിച്ചു. വിഷയത്തിൽ മുഖ്യമന്ത്രിയുമായി നിലവിൽ അഭിപ്രായവ്യത്യാസങ്ങളില്ലെന്നും അദ്ദേഹം കൂട്ടിച്ചേർത്തു.
ജിഎൻഎ കരാർ പ്രായോഗികമല്ലെന്നും കമ്പനിയുമായി ഇനി വൈദ്യുതി കരാറുണ്ടാകില്ലെന്നും സണ്ണി ജോസഫ് വ്യക്തമാക്കി. കരാർ നടപ്പാക്കുന്നതിലെ പ്രായോഗിക ബുദ്ധിമുട്ടുകൾ കെഎസ്ഇബി മുഖ്യമന്ത്രിയെ അറിയിച്ചിട്ടുണ്ടെന്നും അദ്ദേഹം പറഞ്ഞു.
വൈദ്യുതി കരാറുമായി ബന്ധപ്പെട്ട് ഇപ്പോൾ പുറത്തുവരുന്ന വാർത്തകൾ വ്യാജമാണെന്നും അതിനു പിന്നിൽ മാധ്യമങ്ങളാണെന്നും മന്ത്രി ആരോപിച്ചു. അതേസമയം, സംസ്ഥാനത്തെ വൈദ്യുതി പ്രതിസന്ധി പരിഹരിക്കാൻ മഹാരാഷ്ട്രയിലെ സിന്നാർ താപവൈദ്യുതി നിലയത്തിൽനിന്ന് കൂടുതൽ വൈദ്യുതി ലഭ്യമാക്കാനുള്ള നടപടികൾ സ്വീകരിക്കുമെന്നും അദ്ദേഹം അറിയിച്ചു.