ഇറാന്റെ സാമ്പത്തിക സ്രോതസ്സുകൾ ലക്ഷ്യമിട്ട് ട്രംപ് ഭരണകൂടം; ഹോർമുസ് കടലിടുക്ക് തുറക്കണമെന്ന നിർദ്ദേശം തള്ളി
തെഹ്റാൻ: ഇറാനെതിരെ സാമ്പത്തിക സമ്മർദ്ദം ശക്തമാക്കുന്നതിന്റെ ഭാഗമായി കൂടുതൽ കർശനമായ ഉപരോധങ്ങൾ പ്രഖ്യാപിച്ച് അമേരിക്ക. ഇറാന്റെ ഷാഡോ ബാങ്കിങ് സംവിധാനത്തിന് കീഴിൽ പ്രവർത്തിക്കുന്ന 35 സ്ഥാപനങ്ങൾക്കും വ്യക്തികൾക്കും എതിരെയാണ് യുഎസ് പ്രസിഡന്റ് ഡൊണാൾഡ് ട്രംപ് ഉപരോധം ഏർപ്പെടുത്തിയിരിക്കുന്നത്. ഇറാനുമായി സാമ്പത്തിക ഇടപാടുകൾ നടത്തുന്ന രാജ്യങ്ങൾക്കും അമേരിക്ക കർശന മുന്നറിയിപ്പ് നൽകിയിട്ടുണ്ട്. പരമാവധി സമ്മർദ്ദ തന്ത്രങ്ങളിലൂടെ ഇറാനെ പുതിയൊരു കരാറിലേക്ക് കൊണ്ടുവരാനാണ് ട്രംപിന്റെ നീക്കമെങ്കിലും അമേരിക്കയുടെ സുരക്ഷ ഉറപ്പുവരുത്താത്ത ഒരു മോശം കരാറിനായി ധൃതി കാണിക്കില്ലെന്നും വൈറ്റ് ഹൗസ് വ്യക്തമാക്കി.
അതേസമയം, ഹോർമുസ് കടലിടുക്ക് തുറന്നുനൽകുന്നതിന് മുൻഗണന നൽകണമെന്ന ഇറാന്റെ ആവശ്യം ട്രംപ് ഭരണകൂടം തള്ളിയതായാണ് റിപ്പോർട്ടുകൾ. ഇറാൻ സാമ്പത്തികമായി തകർച്ചയുടെ വക്കിലാണെന്നും എത്രയും വേഗം ഹോർമുസ് തുറന്നു കിട്ടണമെന്ന് അവർ ആവശ്യപ്പെട്ടതായും ട്രംപ് വെളിപ്പെടുത്തി. നിലവിലെ സംഘർഷം അവസാനിപ്പിക്കാൻ ഇറാൻ മുന്നോട്ടുവെച്ച പുതിയ നിർദ്ദേശങ്ങൾ ട്രംപ് തന്റെ സുരക്ഷാ ഉദ്യോഗസ്ഥരുമായി ചർച്ച ചെയ്തുവരികയാണ്. മേഖലയിലെ സമാധാന ശ്രമങ്ങളെക്കുറിച്ച് വിശദമായ കൂടിയാലോചനകൾക്ക് ശേഷം മാത്രമേ തുടർനടപടികൾ ഉണ്ടാവുകയുള്ളൂ എന്നാണ് സൂചന.
ഹോർമുസ് കടലിടുക്കിൽ ഇറാൻ ഏർപ്പെടുത്തിയ ഉപരോധത്തെ അപലപിച്ച് ഗൾഫ് രാജ്യങ്ങളുടെ കൂട്ടായ്മയായ ജിസിസിയും രംഗത്തെത്തി. മേഖലയിലെ കപ്പൽ ഗതാഗതം യുദ്ധത്തിന് മുൻപുള്ള സാധാരണ അവസ്ഥയിലേക്ക് എത്രയും വേഗം മാറണമെന്നാണ് ജിസിസി ആവശ്യപ്പെടുന്നത്. രാജ്യാന്തര വ്യാപാര പാതയിലെ തടസ്സങ്ങൾ ആഗോള സമ്പദ്വ്യവസ്ഥയെ ബാധിക്കുമെന്ന ആശങ്കയും വിവിധ രാജ്യങ്ങൾ പങ്കുവെക്കുന്നുണ്ട്.