തൃശൂർ : വിയ്യൂർ ജില്ലാ ജയിലിൽ റിമാൻഡിൽ കഴിയുന്നതിനിടെ യുവാവ് മരിച്ച സംഭവത്തിൽ ദുരൂഹതയാരോപിച്ച് ബന്ധുക്കൾ രംഗത്ത്. പുലക്കോട്ടുക്കര സ്വദേശി രേഷ് ബാബു (36) ജയിലിൽ മർദനമേറ്റതിനെ തുടർന്നാണ് മരിച്ചതെന്നാണ് കുടുംബത്തിന്റെ പരാതി.
മോഷണക്കേസുമായി ബന്ധപ്പെട്ട് മേയ് 18-നാണ് രേഷ് ബാബുവിനെ തൃശൂർ ഈസ്റ്റ് പൊലീസ് അറസ്റ്റ് ചെയ്തത്. തുടർന്ന് വിയ്യൂർ ജില്ലാ ജയിലിൽ റിമാൻഡിൽ പാർപ്പിക്കുകയായിരുന്നു. ആരോഗ്യനില മോശമായതിനെ തുടർന്ന് മേയ് 26-ന് ആശുപത്രിയിലേക്ക് മാറ്റിയ രേഷ് ബാബു ചികിത്സയിലിരിക്കെ കഴിഞ്ഞ ദിവസം മരണത്തിന് കീഴടങ്ങി.
സംഭവത്തിന് പിന്നാലെ ജയിലിൽ മർദനമേറ്റതാണ് മരണകാരണമെന്ന് ആരോപിച്ച് ബന്ധുക്കൾ രംഗത്തെത്തി. രേഷ് ബാബുവിന് മാനസികാരോഗ്യ സംബന്ധമായ വെല്ലുവിളികൾ ഉണ്ടായിരുന്നുവെന്നും, ഇത് സംബന്ധിച്ച മെഡിക്കൽ രേഖകൾ ഉണ്ടായിരുന്നുവെന്നും കുടുംബം പറയുന്നു. ഇക്കാര്യം അറിഞ്ഞിട്ടും ആവശ്യമായ പരിഗണന ലഭിച്ചില്ലെന്നാണ് ബന്ധുക്കളുടെ ആരോപണം.
മാനസികാരോഗ്യ പ്രശ്നമുണ്ടെന്ന് വ്യക്തമാക്കുന്ന മെഡിക്കൽ സർട്ടിഫിക്കറ്റും കുടുംബം പുറത്തുവിട്ടിട്ടുണ്ട്. യുവാവിന്റെ മരണവുമായി ബന്ധപ്പെട്ട സാഹചര്യങ്ങൾ വിശദമായി അന്വേഷിക്കണമെന്നും ഉത്തരവാദികൾക്കെതിരെ നടപടി സ്വീകരിക്കണമെന്നും ബന്ധുക്കൾ ആവശ്യപ്പെട്ടു.
സംഭവത്തിൽ ജയിൽ അധികൃതരുടേയും പൊലീസിന്റേയും ഭാഗത്തുനിന്നുള്ള ഔദ്യോഗിക വിശദീകരണം ലഭിക്കാനുണ്ട്. മരണകാരണം സംബന്ധിച്ച കൂടുതൽ വിവരങ്ങൾ പോസ്റ്റ്മോർട്ടം റിപ്പോർട്ട് പുറത്തുവന്ന ശേഷമേ വ്യക്തമാകൂ.