കാരക്കസ്: ഇരട്ട ഭൂചലനത്തിൽ പകച്ചുപോയ വെനസ്വേലയിൽനിന്ന് പ്രതീക്ഷയേകുന്ന വാർത്തകളും എത്തുന്നു. തകർന്നടിഞ്ഞ കെട്ടിടങ്ങളുടെ അവശിഷ്ടങ്ങൾക്കടിയിൽനിന്ന് ജീവനോടെ ആളുകളെ കണ്ടെത്തി രക്ഷാപ്രവർത്തകർ പുറത്തെടുത്തു. പിഞ്ചുകുഞ്ഞുങ്ങളടക്കം നിരവധി പേരെ രക്ഷപ്പെടുത്താൻ കഴിഞ്ഞത് ദുരന്തത്തിനിടയിലെ ആശ്വാസമായി.
ബുധനാഴ്ച വൈകുന്നേരമാണ് വെനസ്വേലയെ നടുക്കിയ ഇരട്ട ഭൂചലനം ഉണ്ടായത്. ദുരന്തബാധിത പ്രദേശങ്ങളിൽ രക്ഷാപ്രവർത്തനം യുദ്ധകാലാടിസ്ഥാനത്തിൽ തുടരുകയാണ്.
കെട്ടിടാവശിഷ്ടങ്ങൾക്കടിയിൽ കുടുങ്ങിക്കിടന്ന പിഞ്ചുകുഞ്ഞിനെ ശ്രദ്ധാപൂർവം പുറത്തെടുത്ത ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി പ്രചരിക്കുകയാണ്. കുട്ടിയെ സുരക്ഷിതമായി രക്ഷാപ്രവർത്തകർ കൈമാറുന്നതും ദൃശ്യങ്ങളിൽ കാണാം. അവശിഷ്ടങ്ങൾക്കടിയിൽ കുടുങ്ങിയിരുന്നെങ്കിലും കുട്ടിക്ക് കാര്യമായ പരിക്കുകളില്ലെന്നത് ആശ്വാസകരമാണ്.
മനുഷ്യരെ മാത്രമല്ല, അവശിഷ്ടങ്ങൾക്കിടയിൽ കുടുങ്ങിയ മൃഗങ്ങളെയും രക്ഷിക്കാൻ രക്ഷാപ്രവർത്തകർക്ക് കഴിഞ്ഞു. കെട്ടിടാവശിഷ്ടങ്ങൾക്കിടയിൽ കുടുങ്ങിയ നായയ്ക്ക് വെള്ളം നൽകുന്ന രക്ഷാപ്രവർത്തകരുടെ ദൃശ്യങ്ങളും സമൂഹമാധ്യമങ്ങളിൽ ശ്രദ്ധ നേടുകയാണ്.
ദുരന്തഭൂമിയിൽനിന്ന് പുറത്തുവരുന്ന ഇത്തരം രക്ഷാപ്രവർത്തന ദൃശ്യങ്ങൾ പ്രതീക്ഷ പകരുന്നതായി സാമൂഹിക മാധ്യമങ്ങളിൽ നിരവധി പേർ പ്രതികരിച്ചു. രക്ഷാപ്രവർത്തനം തുടരുന്നതിനിടെ കൂടുതൽ പേരെ ജീവനോടെ കണ്ടെത്താനുള്ള ശ്രമങ്ങൾ പുരോഗമിക്കുകയാണ്.