ബോസ്റ്റൺ: ലോകകപ്പ് ഗ്രൂപ്പ് ഐയിലെ ആധിപത്യം ഉറപ്പിക്കാനും ഗ്രൂപ്പ് ചാമ്പ്യന്മാരായി നോക്കൗട്ടിലേക്ക് മുന്നേറാനുമായി മുൻ ചാമ്പ്യന്മാരായ ഫ്രാൻസും കരുത്തരായ നോർവേയും ഇന്ന് നേർക്കുനേർ വരുന്നു. ഇന്ത്യൻ സമയം രാത്രി 12:30-നാണ് ആരാധകർ കാത്തിരിക്കുന്ന ഈ ക്ലാസിക് പോരാട്ടം. ആദ്യ രണ്ട് മത്സരങ്ങളും ആധികാരികമായി വിജയിച്ചാണ് ഇരുടീമുകളും എത്തുന്നതെന്നതിനാൽ ബോസ്റ്റണിൽ കടുത്ത പോരാട്ടമാണ് പ്രവചിക്കപ്പെടുന്നത്. ലോക ഫുട്ബോളിലെ പുതിയ തലമുറയിലെ രാജാക്കന്മാരായ കിലിയൻ എംബാപ്പെയും എർലിങ് ഹാളണ്ടും നേർക്കുനേർ വരുന്നു എന്ന പ്രത്യേകതയും ഈ മത്സരത്തിനുണ്ട്. ടൂർണമെന്റിലെ ഗോൾവേട്ടയിൽ 4 ഗോളുകളുമായി ഇരുതാരങ്ങളും ഒപ്പത്തിനൊപ്പമാണ്.
ഇന്നത്തെ മത്സരത്തിൽ രണ്ട് ഗോളുകൾ കൂടി നേടാനായാൽ ലോകകപ്പ് ചരിത്രത്തിൽ ഏറ്റവും കൂടുതൽ ഗോളുകൾ നേടിയ താരമെന്ന ലയണൽ മെസ്സിയുടെ ഇതിഹാസ റെക്കോർഡിനൊപ്പമെത്താൻ 27-കാരനായ ഫ്രഞ്ച് നായകൻ എംബാപ്പെയ്ക്ക് സാധിക്കും. ആദ്യ രണ്ട് കളികളിലും മിന്നും ഫോമിലായിരുന്ന എംബാപ്പെ ഇന്ന് ചരിത്രനേട്ടം കുറിക്കുമെന്ന പ്രതീക്ഷയിലാണ് ആരാധകർ. ഗ്രൂപ്പ് ഘട്ടത്തിൽ സെനഗലിനെയും ഇറാഖിനെയും തകർത്താണ് ഇരുടീമുകളും പ്രീക്വാർട്ടർ യോഗ്യത നേരത്തെ തന്നെ ഉറപ്പാക്കിയത്.
നിലവിലെ പോയിന്റ് കണക്കുകൾ അനുസരിച്ച് ഗ്രൂപ്പ് ചാമ്പ്യന്മാരായാൽ ഫ്രാൻസിന് നോക്കൗട്ടിൽ സ്വീഡനായിരിക്കും എതിരാളികൾ. അങ്ങനെവന്നാൽ രണ്ടാം സ്ഥാനക്കാരാകുന്ന നോർവേയ്ക്ക് ഐവറികോസ്റ്റിനെ നേരിടേണ്ടി വരും. പ്രീക്വാർട്ടറിലെ നോർവേ-ഐവറികോസ്റ്റ് മത്സരവിജയികളെ കാത്തിരിക്കുന്നത് ബ്രസീൽ-ജപ്പാൻ പോരാട്ടത്തിലെ വിജയികളായിരിക്കും. എന്നാൽ ഇന്നത്തെ മത്സരത്തിൽ നോർവേ അട്ടിമറി ജയം നേടി ഗ്രൂപ്പ് ചാമ്പ്യന്മാരായാൽ സമവാക്യങ്ങൾ മാറും. ഫ്രാൻസ് രണ്ടാം സ്ഥാനത്തേക്ക് പിന്തള്ളപ്പെടുകയും നോക്കൗട്ടിൽത്തന്നെ ബ്രസീൽ-ജപ്പാൻ മത്സരവിജയികളെ ഫ്രഞ്ച് പടയ്ക്ക് നേരിടേണ്ടി വരികയും ചെയ്യും. അടുത്ത രണ്ട് ദിവസങ്ങൾക്കുള്ളിൽ ലോകകപ്പിന്റെ നോക്കൗട്ട് ചിത്രങ്ങൾക്ക് പൂർണ്ണമായ വ്യക്തത വരും.