തിരുവനന്തപുരം: സംസ്ഥാനത്തെ വൈദ്യുതി നിയന്ത്രണത്തിനെതിരെ രൂക്ഷ വിമർശനവുമായി പ്രതിപക്ഷ നേതാവ് പിണറായി വിജയൻ. വൈദ്യുതി നിയന്ത്രണം മുൻകൂട്ടി അറിയിക്കാത്തത് ജനങ്ങളെ വലിയ ബുദ്ധിമുട്ടിലാക്കുകയാണെന്ന് അദ്ദേഹം പറഞ്ഞു. കഴിഞ്ഞ ദിവസം സ്വന്തം വീട്ടിൽ ഒന്നേകാൽ മണിക്കൂർ വൈദ്യുതി മുടങ്ങിയെന്നും അദ്ദേഹം പരിഹസിച്ചു.
വൈദ്യുതി ലഭ്യതയിൽ കുറവുണ്ടാകാം. എന്നാൽ അതിന് മുൻകൂട്ടി തയ്യാറെടുത്ത് ആവശ്യമായ വൈദ്യുതി വാങ്ങാനുള്ള നടപടികളാണ് സർക്കാർ സ്വീകരിക്കേണ്ടതെന്നും പിണറായി വിജയൻ വ്യക്തമാക്കി.
ഓണപ്പരീക്ഷ അടുത്തിരിക്കെ ഒന്നേകാൽ മണിക്കൂർ വരെ നീളുന്ന പവർകട്ട് വിദ്യാർത്ഥികളെ ബുദ്ധിമുട്ടിലാക്കുന്നുണ്ടെന്നും അദ്ദേഹം പറഞ്ഞു. സർക്കാർ മുൻകരുതൽ നടപടികൾ സ്വീകരിക്കുന്നതിൽ വീഴ്ച വരുത്തിയെന്നാണ് ആരോപണം.
ആര്യാടൻ മുഹമ്മദ് മന്ത്രിയായിരുന്ന കാലത്തെ വൈദ്യുതി കരാർ നല്ലതായിരുന്നില്ലെന്നും, ആ കരാറുമായി വിയോജിച്ചുകൊണ്ടാണ് ഇടത് സർക്കാർ മുന്നോട്ട് പോയതെന്നും പിണറായി പറഞ്ഞു. കരാർ റദ്ദാക്കിയത് റെഗുലേറ്ററി കമ്മീഷനാണെന്നും അദ്ദേഹം കൂട്ടിച്ചേർത്തു.
ചീമേനി ആണവനിലയ പദ്ധതിക്കെതിരെയും വിമർശനം
ചീമേനി ആണവനിലയ പദ്ധതിക്കെതിരെയും പ്രതിപക്ഷ നേതാവ് ശക്തമായി പ്രതികരിച്ചു. സർക്കാർ പദ്ധതിയുമായി മുന്നോട്ടുപോയാൽ അതിശക്തമായ എതിർപ്പ് നേരിടേണ്ടിവരുമെന്ന് അദ്ദേഹം മുന്നറിയിപ്പ് നൽകി.
കേരളത്തിൽ ആണവനിലയം സ്ഥാപിക്കുന്നത് അത്ര എളുപ്പമുള്ള കാര്യമല്ലെന്നും, അതിന് ശക്തമായ ജനവിരോധമുണ്ടാകുമെന്നും പിണറായി പറഞ്ഞു. അതുകൊണ്ടുതന്നെയാണ് തങ്ങളുടെ സർക്കാർ അത്തരമൊരു പദ്ധതി ആലോചിക്കാതിരുന്നതെന്നും, ആണവനിലയ പദ്ധതി അനാവശ്യ പ്രശ്നങ്ങൾ സൃഷ്ടിക്കാനിടയാക്കുമെന്നും അദ്ദേഹം അഭിപ്രായപ്പെട്ടു.