ഭരണം സ്പോൺസർമാരുടേതാകരുത്

ഭരണാധികാരികളുടെ യാത്രകളും അവരുടെ ചെലവുകളും ആരുടെ വകയാണ് എന്ന ചോദ്യം അതിരൂക്ഷമായി ഉയരുകയാണ്. അധികാരത്തിലെത്തി നാലുമാസം പിന്നിടുന്നതിനിടെ ചില മന്ത്രിമാരുടെ വിദേശയാത്രകളും, ഒരു മന്ത്രി സുഹൃത്തിന്റെ ആ‍ഡംബര വാഹനം സർക്കാർ ബോർഡും വെച്ച് ഉപയോഗിക്കുന്നതും പുറത്ത് വന്നിട്ടുണ്ട്. ഇക്കാര്യങ്ങളിൽ സംശയമുയർത്തിയവരോട് വെല്ലുവിളിക്കുകയും പരിഹസിക്കുകയും ചെയ്യുന്ന ഭരണാനുകൂല നേതാക്കൻമാർ മുതൽ പ്രവർത്തകൻമാരും പദവികളിലിരിക്കുന്നവർ വരെയുണ്ട്. ജനപ്രതിനിധികൾ ജനങ്ങളാൽ ഓഡിറ്റ് ചെയ്യപ്പെടുന്നവരാണെന്ന കാര്യം ഇവർക്കാർക്കും അറിവില്ലാത്തവരല്ല. സ്വകാര്യ വ്യക്തികളോ സംഘടനകളോ വഹിക്കുന്ന ചെലവുകളെക്കുറിച്ചുള്ള വിശദീകരണങ്ങളും പൊതുചർച്ചയായിട്ടുണ്ട്. സർക്കാർ പണം ചെലവഴിച്ചിട്ടില്ലെന്ന മറുപടി മാത്രം മതിയാകുമോ എന്നതാണ് യഥാർഥ ചോദ്യം. പണം ആരുടേത്, എന്തിനാണ് ചെലവഴിച്ചത്, എന്ത് വ്യവസ്ഥയിലാണ് ചെലവ് ഏറ്റെടുത്തത്-ഇവയ്ക്കെല്ലാം വ്യക്തമായ മറുപടി ജനങ്ങൾക്ക് ലഭിക്കണം. ഒരു മന്ത്രിയുടെ സ്വകാര്യ യാത്രയും ഔദ്യോഗിക യാത്രയും തമ്മിൽ നിയമപരമായ വ്യത്യാസമുണ്ടാകാം. എന്നാൽ പൊതുപദവി വഹിക്കുന്ന വ്യക്തിയുടെ യാത്രയ്ക്ക് സ്വകാര്യ വ്യക്തിയോ സ്ഥാപനമോ ചെലവ് വഹിക്കുമ്പോൾ താൽപര്യസംഘർഷത്തിന്റെ സാധ്യത ഉയരുന്നു. അതുകൊണ്ടുതന്നെ ചെലവ് സർക്കാർ ഖജനാവിൽനിന്നല്ല എന്നത് മാത്രമല്ല, ആ സഹായത്തിന് പിന്നിൽ യാതൊരു പ്രതീക്ഷയോ സ്വാധീനമോ ഇല്ലെന്നതും സുതാര്യമായി വ്യക്തമാക്കേണ്ടതുണ്ട്. ഇപ്പോഴത്തെ വിവാദത്തിൽ ചില മന്ത്രിമാർ യാത്രകൾ സ്വകാര്യ ചെലവിലോ ക്ഷണിച്ച സംഘടനകളുടെ ചെലവിലോ ആയിരുന്നുവെന്ന് വിശദീകരിച്ചിട്ടുണ്ട്. കായികമന്ത്രി ഒ.ജെ. ജനീഷ് തന്റെ ചില യാത്രകളുടെ ചെലവ് ബന്ധപ്പെട്ട സംഘടനകൾ വഹിച്ചതായി വ്യക്തമാക്കിയിട്ടുണ്ട്. അതേസമയം, വിദേശയാത്രകളുടെ ചെലവ് വഹിച്ചത് ആരാണെന്ന് സർക്കാർ വ്യക്തമാക്കണമെന്ന ആവശ്യം ഉയർന്നിട്ടുണ്ട്. ഇവിടെ ചോദ്യം യാത്ര ചെയ്യരുതെന്നതല്ല. മന്ത്രിമാർക്ക് സ്വകാര്യ ജീവിതമുണ്ടാകരുതെന്നതുമല്ല. മറിച്ച്, പൊതുപദവിയും സ്വകാര്യ ആതിഥേയത്വവും തമ്മിലുള്ള അതിർവരമ്പ് എവിടെയാണെന്നതാണ്. ഒരു മന്ത്രി ഒരു സ്വകാര്യ സ്ഥാപനത്തിന്റെ ക്ഷണം സ്വീകരിക്കുമ്പോൾ അതിന്റെ സ്വഭാവം, ചെലവ്, യാത്രയുടെ ഉദ്ദേശ്യം, ഔദ്യോഗിക പരിപാടിയുമായുള്ള ബന്ധം തുടങ്ങിയ വിവരങ്ങൾ പൊതുജനങ്ങൾക്ക് ലഭ്യമാക്കുന്നതാണ് വിശ്വാസം ഉറപ്പാക്കുന്ന വഴി. മുഖ്യമന്ത്രിയുടെ ചാർട്ടേഡ് വിമാനയാത്രയും സ്വകാര്യ ചെലവിൽ മന്ത്രിമാരുടെ വിദേശയാത്രകളും ആഡംബര വാഹന ഉപയോഗവുമെല്ലാം ഇപ്പോൾ ഒരേ ചോദ്യത്തിലേക്കാണ് എത്തുന്നത്-പൊതുപദവിക്ക് ലഭിക്കുന്ന സൗകര്യങ്ങളുടെ കണക്കുപുസ്തകം എവിടെയാണ്? ചാർട്ടേഡ് വിമാനത്തിന്റെ ചെലവ് ആരാണ് വഹിച്ചതെന്ന ചോദ്യവും ഇതിനകം രാഷ്ട്രീയ ചർച്ചയായിട്ടുണ്ട്. ജനാധിപത്യത്തിൽ സംശയങ്ങൾക്ക് മറുപടി നൽകുന്നത് ദൗർബല്യമല്ല. മറുപടി നൽകാതിരിക്കുമ്പോഴാണ് സംശയങ്ങൾക്ക് ഇടം വർധിക്കുന്നത്. അതിനാൽ മന്ത്രിമാരുടെ യാത്രകൾ സംബന്ധിച്ച ചെലവ്, സ്പോൺസർ, ക്ഷണം, പരിപാടിയുടെ സ്വഭാവം, ഔദ്യോഗിക അനുമതി എന്നിവ വ്യക്തമാക്കുന്ന ഏകീകൃത സുതാര്യതാ സംവിധാനം സർക്കാർ കൊണ്ടുവരേണ്ടതുണ്ട്. ഭരണം ജനങ്ങളുടെ വിശ്വാസത്തിലാണ് നിലനിൽക്കുന്നത്. സ്വകാര്യ സഹായം നിയമവിരുദ്ധമാണെന്ന് മുൻകൂട്ടി വിധിയെഴുതേണ്ടതില്ല; അതുപോലെ അത് ചോദ്യം ചെയ്യപ്പെടരുതെന്നും പറയാനാകില്ല. സൗജന്യമാണെങ്കിലും അതിന്റെ കണക്കുണ്ടാകണം. ആതിഥ്യമാണെങ്കിലും അതിന്റെ സുതാര്യത വേണം. അധികാരത്തിന് ലഭിക്കുന്ന ഓരോ സൗകര്യത്തിനും ജനങ്ങളോട് വിശദീകരണമുണ്ടാകണം. ഭരണം സ്പോൺസർമാരുടേതല്ല; ജനങ്ങളുടേതാണ്. ആ വിശ്വാസം നിലനിർത്താനുള്ള ഏറ്റവും ലളിതമായ മാർഗം-ചോദ്യങ്ങൾക്ക് വ്യക്തമായ മറുപടി നൽകുക എന്നതാണ്.