ന്യൂഡൽഹി: ഡൽഹി കലാപ ഗൂഢാലോചനക്കേസിൽ തടവിൽ കഴിയുന്ന ജെഎൻയു മുൻ വിദ്യാർത്ഥി നേതാവ് ഉമർ ഖാലിദിന് ഡൽഹി ഹൈക്കോടതി ഇടക്കാല ജാമ്യം അനുവദിച്ചു. അമ്മയുടെ അടിയന്തര ചികിത്സാർത്ഥം മൂന്ന് ദിവസത്തേക്കാണ് കോടതി ജാമ്യം നൽകിയിരിക്കുന്നത്. ജൂൺ ഒന്ന് മുതൽ മൂന്ന് വരെയാണ് ഉമർ ഖാലിദിന് ജാമ്യത്തിൽ പുറത്തിറങ്ങാനാകുക.
ജസ്റ്റിസുമാരായ പ്രതിഭ എം. സിങ്, മധു ജെയിൻ എന്നിവരടങ്ങിയ ഡിവിഷൻ ബെഞ്ചാണ് ഉമറിന്റെ ഹർജി പരിഗണിച്ചത്. കടുത്ത നിബന്ധനകളോടെയാണ് കോടതി ജാമ്യം അനുവദിച്ചിരിക്കുന്നത്. ജാമ്യകാലയളവിൽ ഉമർ ഖാലിദ് പൂർണ്ണമായും അന്വേഷണ ഉദ്യോഗസ്ഥരുടെ കർശന നിരീക്ഷണത്തിലായിരിക്കണം, യാത്രയിലുടനീളം ഒരു മൊബൈൽ ഫോൺ മാത്രമേ ഉപയോഗിക്കാൻ പാടുള്ളൂ, ഈ ഫോൺ നമ്പർ അന്വേഷണ ഉദ്യോഗസ്ഥന് കൈമാറുകയും അത് എപ്പോഴും പ്രവർത്തനസജ്ജമായി സൂക്ഷിക്കുകയും വേണം, യാതൊരുവിധ ക്രിമിനൽ കുറ്റകൃത്യങ്ങളിലും ഏർപ്പെടരുത് തുടങ്ങിയവയാണ് കോടതി മുന്നോട്ടുവെച്ച പ്രധാന ഉപാധികൾ.
അമ്മയുടെ ചികിത്സയ്ക്കൊപ്പം അന്തരിച്ച അമ്മാവന്റെ മരണാനന്തര ചടങ്ങുകളിൽ പങ്കെടുക്കേണ്ടതുണ്ടെന്നും ചൂണ്ടിക്കാട്ടി 15 ദിവസത്തെ ഇടക്കാല ജാമ്യം ആവശ്യപ്പെട്ടാണ് ഉമർ ഖാലിദ് ഹൈക്കോടതിയെ സമീപിച്ചത്. നേരത്തെ ഡൽഹി കർക്കർദൂമ അഡീഷണൽ സെഷൻസ് കോടതി ഉമറിന്റെ ജാമ്യാപേക്ഷ തള്ളിയിരുന്നു. ജാമ്യം അനുവദിക്കാൻ മതിയായ കാരണങ്ങളില്ലെന്ന് വ്യക്തമാക്കിക്കൊണ്ടായിരുന്നു വിചാരണക്കോടതിയുടെ നടപടി. ഇതിനെ തുടർന്നാണ് പ്രതിഭാഗം ഹൈക്കോടതിയെ സമീപിച്ചതും അനുകൂല ഉത്തരവ് നേടിയതും.
ഡൽഹി കലാപ ഗൂഢാലോചനക്കേസുമായി ബന്ധപ്പെട്ട് അഞ്ച് വർഷത്തിലേറെയായി ഉമർ ഖാലിദ് ജയിലിൽ തുടരുകയാണ്. കേസിൽ ഉമർ ഖാലിദിനും ഷർജീൽ ഇമാമിനും മുൻപ് ജാമ്യം നിഷേധിച്ച സുപ്രീംകോടതിയിലെ ഒരു ബെഞ്ചിന്റെ നിലപാടിനെതിരെ, സുപ്രീംകോടതിയുടെ തന്നെ മറ്റൊരു ബെഞ്ച് കഴിഞ്ഞദിവസം കടുത്ത വിമർശനം ഉന്നയിച്ചിരുന്നു. വിചാരണ നടപടികൾ അകാരണമായി നീണ്ടുപോവുകയാണെങ്കിൽ പ്രതികൾക്ക് ജാമ്യം അനുവദിക്കണമെന്ന മുൻ ഉത്തരവുകൾ നിലനിൽക്കെ, അത് പാലിക്കപ്പെട്ടില്ലെന്നായിരുന്നു ജസ്റ്റിസ് ബി.വി. നാഗരത്ന ഉൾപ്പെട്ട ബെഞ്ചിന്റെ നിരീക്ഷണം. ഈ നിയമപരമായ ചർച്ചകൾ രാജ്യത്ത് സജീവമായിരിക്കെയാണ് ഇപ്പോൾ ഹൈക്കോടതിയിൽ നിന്ന് ഉമർ ഖാലിദിന് താൽക്കാലിക ആശ്വാസം ലഭിച്ചിരിക്കുന്നത്.