പുതിയ സാമ്പത്തിക വർഷം ആരംഭിക്കുന്ന ഇന്ന് മുതൽ രാജ്യത്തെ സാമ്പത്തിക-ബാങ്കിംഗ് മേഖലകളിൽ നിർണ്ണായക മാറ്റങ്ങൾ പ്രാബല്യത്തിൽ വരുന്നു. ആദായനികുതി നിയമങ്ങൾ ലളിതമാക്കുന്നത് മുതൽ ഡിജിറ്റൽ പണമിടപാടുകളുടെ സുരക്ഷ വർദ്ധിപ്പിക്കുന്നത് വരെയുള്ള പരിഷ്കാരങ്ങൾ സാധാരണക്കാരെ നേരിട്ട് ബാധിക്കുന്നവയാണ്. ആഗോള സാമ്പത്തിക അനിശ്ചിതത്വങ്ങൾക്കിടയിലും നികുതി ഘടനയിലും സേവന നിരക്കുകളിലും വരുത്തിയ പ്രധാന മാറ്റങ്ങൾ താഴെ പറയുന്നവയാണ്:
പുതിയ ആദായനികുതി നിയമം (2025): 1961-ലെ പഴയ നിയമത്തിന് പകരം പുതിയ ഇൻകം ടാക്സ് ആക്ട് ഇന്ന് മുതൽ നിലവിൽ വരും. സാമ്പത്തിക വർഷം (FY), അസസ്മെന്റ് ഇയർ (AY) തുടങ്ങിയ പദങ്ങൾ ഒഴിവാക്കി ‘ടാക്സ് ഇയർ (TY)’ എന്ന ഒറ്റപ്പദം മാത്രം ഇനി ഉപയോഗിക്കും. സെക്ഷൻ 87A പ്രകാരം 12 ലക്ഷം രൂപ വരെ വാർഷിക വരുമാനമുള്ളവർക്ക് നികുതി ഇളവ് ലഭിക്കാൻ സാധ്യതയുണ്ട്. പാൻ കാർഡിനായി അപേക്ഷിക്കുമ്പോൾ ജനനത്തീയതി തെളിയിക്കാൻ ആധാർ കാർഡ് മാത്രം മതിയാകില്ല; എസ്എസ്എൽസി സർട്ടിഫിക്കറ്റോ പാസ്പോർട്ടോ നിർബന്ധമാണ്. 20 ലക്ഷം രൂപയ്ക്ക് മുകളിലുള്ള വസ്തു ഇടപാടുകൾക്കും അഞ്ച് ലക്ഷത്തിന് മുകളിലുള്ള വാഹനങ്ങൾ വാങ്ങുന്നതിനും പാൻ നിർബന്ധമാക്കി. ബാങ്ക് നിക്ഷേപ പരിധി പത്ത് ലക്ഷമായി ഉയർത്തി.
സ്വർണ്ണപ്പണയത്തിലും വിദ്യാഭ്യാസ ഇളവുകളിലും മാറ്റം: ആർബിഐയുടെ പരിഷ്കരിച്ച സ്വർണ്ണപ്പണയ ചട്ടം ഇന്ന് മുതൽ പൂർണ്ണതോതിൽ നടപ്പിലാകും. 2.5 ലക്ഷം രൂപ വരെയുള്ള വായ്പകൾക്ക് സ്വർണ്ണവിലയുടെ 85 ശതമാനം വരെ തുക ലഭിക്കും. എന്നാൽ ഉയർന്ന തുകകൾക്ക് ഈ പരിധി 75 ശതമാനം വരെയായി കുറയും. വിദ്യാഭ്യാസ ആനുകൂല്യങ്ങളിൽ വലിയ ഇളവുകൾ പ്രഖ്യാപിച്ചിട്ടുണ്ട്. കുട്ടികളുടെ വിദ്യാഭ്യാസ അലവൻസിനുള്ള നികുതി ഇളവ് പ്രതിമാസം 100 രൂപയിൽ നിന്ന് 3,000 രൂപയായി ഉയർത്തി. ഹോസ്റ്റൽ അലവൻസ് 9,000 രൂപയായും വർദ്ധിപ്പിച്ചു. പരമാവധി രണ്ട് കുട്ടികൾക്ക് ഈ ആനുകൂല്യം ലഭിക്കും.
യാത്രക്കാർ ശ്രദ്ധിക്കാൻ: ട്രെയിൻ ടിക്കറ്റ് റദ്ദാക്കുന്നതിനുള്ള വ്യവസ്ഥകൾ കർശനമാക്കി. വണ്ടി പുറപ്പെടുന്നതിന് എട്ട് മണിക്കൂറിൽ താഴെ സമയം ബാക്കിയുള്ളപ്പോൾ ടിക്കറ്റ് റദ്ദാക്കിയാൽ തുക തിരികെ ലഭിക്കില്ല. 8 മുതൽ 24 മണിക്കൂർ മുൻപാണെങ്കിൽ 50 ശതമാനവും, 24 മുതൽ 72 മണിക്കൂർ മുൻപാണെങ്കിൽ 75 ശതമാനവും തുക റീഫണ്ട് ലഭിക്കും. ടോൾ പ്ലാസകളിൽ ഇനി മുതൽ പണമിടപാടുകൾ ഉണ്ടാകില്ല, ഡിജിറ്റൽ പേയ്മെന്റുകൾ മാത്രമാകും അനുവദിക്കുക. വാർഷിക ടോൾ പാസ് നിരക്ക് 3,075 രൂപയായി ഉയർത്തിയിട്ടുണ്ട്.
ഡിജിറ്റൽ സുരക്ഷയും വായ്പകളും: ഓൺലൈൻ പണമിടപാടുകൾക്ക് ഇനി ‘ടു-ഫാക്ടർ ഒതന്റിക്കേഷൻ’ നിർബന്ധമാണ്. ഒടിപിക്ക് പുറമെ ഫിംഗർ പ്രിന്റ്, പിൻ അല്ലെങ്കിൽ ബയോമെട്രിക്സ് എന്നിവയും ഉപയോഗിക്കേണ്ടി വരും. ചെറുകിട-ഇടത്തരം സംരംഭങ്ങൾക്കുള്ള ഈടുരഹിത വായ്പ പരിധി 10 ലക്ഷത്തിൽ നിന്ന് 20 ലക്ഷമായി ഉയർത്തി. എടിഎം ഫീസുകളിൽ വർദ്ധനവുണ്ടാകും. ക്രെഡിറ്റ് സ്കോർ ഇനി മുതൽ ഏഴ് ദിവസം കൂടുമ്പോൾ പുതുക്കും. ചികിത്സയ്ക്കും വിദ്യാഭ്യാസത്തിനുമായി വിദേശത്തേക്ക് പണമയയ്ക്കുന്നതിനുള്ള ടിസിഎസ് (TCS) അഞ്ച് ശതമാനത്തിൽ നിന്ന് രണ്ട് ശതമാനമായി കുറച്ചു. തപാൽ വഴി അയയ്ക്കുന്ന സാധനങ്ങൾക്കുള്ള ഇൻഷുറൻസ് പരിധി അഞ്ച് ലക്ഷം രൂപയായി വർദ്ധിപ്പിച്ചു.