തിരുവനന്തപുരം: ഓണത്തോടനുബന്ധിച്ച് വിവിധതരം ഓണക്കിറ്റുകളും സമ്മാന പദ്ധതികളുമായി സപ്ലൈകോ വിപണിയിൽ സജീവമാകുന്നു. 1000 രൂപയുടെ അത്തം ഓണസമ്മാനക്കിറ്റ് മുതൽ 2000 രൂപയുടെ പ്രീമിയം തിരുവോണം കിറ്റ് വരെ കുറഞ്ഞ വിലയിൽ ലഭിക്കും. ഓണക്കിറ്റുകൾക്ക് പുറമെ ഗിഫ്റ്റ് കാർഡുകളും സമ്മാനക്കൂപ്പണുകളും സപ്ലൈകോ ഒരുക്കിയിട്ടുണ്ട്.
ഓണക്കോടിയെടുക്കുന്നതിനും ഓണസദ്യയ്ക്കുള്ള സാധനങ്ങൾ വാങ്ങുന്നതിനുമുള്ള തിരക്കിലാണ് വിപണി. ഓണസദ്യയ്ക്ക് ആവശ്യമായ വസ്തുക്കളും ബ്രാൻഡഡ് ഉത്പന്നങ്ങളും ഉൾപ്പെടുത്തിയ കിറ്റുകളുമായാണ് സപ്ലൈകോയും ഒരുങ്ങുന്നത്.
1000 രൂപയുടെ അത്തം കിറ്റ്
അരി, വെളിച്ചെണ്ണ, പഞ്ചസാര, ശബരി മസാലകൾ തുടങ്ങി 21 ഇനങ്ങളാണ് 1000 രൂപയുടെ അത്തം ഓണസമ്മാനക്കിറ്റിലുള്ളത്. സപ്ലൈകോ വിൽപ്പനശാലകളിൽ കിറ്റ് ലഭ്യമാകും.
ഓണസദ്യയ്ക്കാവശ്യമായ സാധനങ്ങളും ബ്രാൻഡഡ് ഉത്പന്നങ്ങളും ഉൾപ്പെടുത്തി പ്രത്യേക ഗിഫ്റ്റ് കിറ്റുകളും സപ്ലൈകോ പുറത്തിറക്കിയിട്ടുണ്ട്.
1500 രൂപയ്ക്ക് ഉത്രാടം കിറ്റ്
25 ഇനങ്ങളുള്ള ഉത്രാടം കിറ്റിന് 1500 രൂപയാണ് വില. 1880 രൂപ വിപണി വില വരുന്ന സാധനങ്ങളാണ് ഈ കിറ്റിൽ 1500 രൂപയ്ക്ക് ലഭിക്കുന്നത്.
2000 രൂപയ്ക്ക് പ്രീമിയം തിരുവോണം കിറ്റ്
30 ഇനങ്ങളുള്ള പ്രീമിയം തിരുവോണം കിറ്റിന് 2000 രൂപയാണ് വില. 2540 രൂപയുടെ സാധനങ്ങളാണ് ഈ കിറ്റിൽ ഉൾപ്പെടുത്തിയിരിക്കുന്നത്.
ഇതിന് പുറമെ പുട്ടുപൊടി, സേമിയ, പായസക്കൂട്ട്, മുളകുപൊടി, മഞ്ഞൾപ്പൊടി തുടങ്ങി ഒൻപത് പ്രീമിയം ശബരി ഉത്പന്നങ്ങൾ ഉൾപ്പെടുത്തിയ ശബരി സിഗ്നേച്ചർ കിറ്റും 299 രൂപയ്ക്ക് ലഭിക്കും.
ഗിഫ്റ്റ് കാർഡും സമ്മാനക്കൂപ്പണുകളും
ഓണക്കിറ്റുകൾക്ക് പുറമെ വിവിധ സമ്മാനങ്ങളും ബോണസുകളും സപ്ലൈകോ ഒരുക്കിയിട്ടുണ്ട്. 500 രൂപയും 1000 രൂപയും മൂല്യമുള്ള സപ്ലൈകോ ഓണം ഗിഫ്റ്റ് കാർഡുകൾ ഉപയോഗിച്ച് സപ്ലൈകോ ഔട്ട്ലെറ്റുകളിൽ നിന്ന് ആവശ്യമായ ഉത്പന്നങ്ങൾ വാങ്ങാം.
ഗിഫ്റ്റ് കാർഡുകൾക്കൊപ്പം സമ്മാനക്കൂപ്പണുകളും ലഭിക്കും. ഗിഫ്റ്റ് കൂപ്പണുകളും വിവിധ ഓഫറുകളും ഒരുക്കി ഓണക്കാല വിപണി സജീവമാക്കാനാണ് സപ്ലൈകോ ലക്ഷ്യമിടുന്നത്. കിറ്റ് വിതരണത്തിനായി സപ്ലൈകോ സ്റ്റോറുകൾ തയ്യാറെടുക്കുന്നതോടെ ഈ വർഷത്തെ ഓണച്ചന്തയും സജീവമാകും.