മഞ്ചേശ്വരത്ത് കള്ളവോട്ട് ആരോപണം: യുഡിഎഫിനെതിരെ കെ സുരേന്ദ്രൻ രംഗത്ത്

കാസർഗോഡ്: മഞ്ചേശ്വരത്ത് യുഡിഎഫ് വ്യാപകമായി കള്ളവോട്ട് നടത്താൻ ശ്രമിക്കുന്നുവെന്നാരോപിച്ച് കെ സുരേന്ദ്രൻ രംഗത്തെത്തി. നടപടി സ്വീകരിക്കാത്ത പക്ഷം സുതാര്യമായ തിരഞ്ഞെടുപ്പ് നടക്കില്ലെന്നും അദ്ദേഹം മുന്നറിയിപ്പ് നൽകി.

നാട്ടിൽ ഇല്ലാത്ത പ്രവാസികളുടെ വോട്ടർ സ്ലിപ്പുകൾ യുഡിഎഫ് പ്രവർത്തകർ ശേഖരിച്ചതായാണ് ആരോപണം. മഞ്ചേശ്വരം, കുമ്പള, മംഗൽപ്പാടി, വോർക്കാടി പഞ്ചായത്തുകളിലായി കള്ളവോട്ട് നടത്താനുള്ള നീക്കങ്ങൾ നടക്കുന്നുവെന്നും സുരേന്ദ്രൻ ആരോപിച്ചു.

സംഭവത്തിൽ ബന്ധപ്പെട്ട അധികാരികൾ ഉടൻ ഇടപെടുകയും ആവശ്യമായ നടപടി സ്വീകരിക്കുകയും ചെയ്യണമെന്ന് അദ്ദേഹം ആവശ്യപ്പെട്ടു. തിരഞ്ഞെടുപ്പ് സുതാര്യവും നിഷ്പക്ഷവുമാകുന്നതിനായി കർശന നിരീക്ഷണം വേണമെന്നും സുരേന്ദ്രൻ വ്യക്തമാക്കി