ആംസ്റ്റർഡാം: നെതർലൻഡ്സ് ആസ്ഥാനമായുള്ള ആഡംബര ക്രൂസ് കപ്പലിൽ മൂന്ന് ജീവനക്കാർ മരിക്കാനിടയായത് ഹാൻറാ വൈറസ് (Hantavirus) അണുബാധ മൂലമെന്ന് റിപ്പോർട്ട്. നാല് ജീവനക്കാരെ ഗുരുതരാവസ്ഥയിൽ ദക്ഷിണാഫ്രിക്കയിലെ ജോഹന്നാസ്ബർഗിലുള്ള ആശുപത്രിയിൽ പ്രവേശിപ്പിച്ചു. ബ്രിട്ടീഷ്, അമേരിക്കൻ, സ്പാനിഷ് പൗരന്മാരടക്കം നിരവധി യാത്രക്കാരുമായി കേപ് വെർഡെ ദ്വീപിന് സമീപം സഞ്ചരിക്കുകയായിരുന്ന കപ്പലിലാണ് വൈറസ് ബാധ സ്ഥിരീകരിച്ചത്. 2026 മെയ് 4 വരെയുള്ള കണക്കനുസരിച്ച് ഏഴ് കേസുകൾ സ്ഥിരീകരിച്ചതായും ഇതിൽ മൂന്നുപേർ മരിച്ചതായും ലോകാരോഗ്യ സംഘടന വ്യക്തമാക്കി.
എലികളിലൂടെയും മറ്റ് കരണ്ടുതീനി ജീവികളിലൂടെയുമാണ് ഹാൻറാ വൈറസ് മനുഷ്യരിലേക്ക് പടരുന്നത്. എലികളുടെ മൂത്രം, കാഷ്ഠം, ഉമിനീർ എന്നിവയിലെ കണങ്ങൾ വായുവിലൂടെയോ സ്പർശനത്തിലൂടെയോ ഉള്ളിലെത്തുമ്പോഴാണ് അണുബാധയുണ്ടാകുന്നത്. ശ്വാസകോശത്തെയും വൃക്കകളെയും ബാധിക്കുന്ന ഈ വൈറസ് ബാധിച്ചാൽ മരണനിരക്ക് 40 ശതമാനത്തോളമാണ്. നിലവിൽ ഈ വൈറസിനെതിരെ പ്രത്യേക വാക്സിനുകളോ ഫലപ്രദമായ ചികിത്സയോ ലഭ്യമല്ലെന്നത് ആശങ്ക വർദ്ധിപ്പിക്കുന്നു.
രോഗബാധയുണ്ടായി ഒന്ന് മുതൽ എട്ട് ആഴ്ചയ്ക്കുള്ളിൽ ലക്ഷണങ്ങൾ കണ്ടുതുടങ്ങും. പനി, പേശി വേദന, തലവേദന, ഛർദി എന്നിവയാണ് പ്രാരംഭ ലക്ഷണങ്ങൾ. തുടർന്ന് ശക്തമായ ശ്വാസതടസ്സത്തിലേക്കും ഹൃദയമിടിപ്പിലെ വ്യതിയാനത്തിലേക്കും രോഗം നയിക്കും. അടിയന്തര വൈദ്യസഹായം ലഭ്യമാക്കിയില്ലെങ്കിൽ ജീവൻ അപകടത്തിലാകാൻ സാധ്യതയുണ്ട്.
എലികൾ പെരുകുന്ന സാഹചര്യം ഒഴിവാക്കുകയാണ് പ്രധാന പ്രതിരോധ മാർഗ്ഗം. വീടും പരിസരവും വൃത്തിയായി സൂക്ഷിക്കുക, ഭക്ഷണസാധനങ്ങൾ സുരക്ഷിതമായി അടച്ചുവെക്കുക, എലിവിസർജ്യങ്ങൾ വൃത്തിയാക്കുമ്പോൾ നിർബന്ധമായും മാസ്കും ഗ്ലൗസും ധരിക്കുക എന്നിവ വൈറസ് വ്യാപനം തടയാൻ അത്യാവശ്യമാണ്. ആഗോളതലത്തിൽ ക്രൂസ് കപ്പലുകൾക്ക് ജാഗ്രതാ നിർദ്ദേശം നൽകിയിട്ടുണ്ട്.