കണ്ണൂർ: നിയമസഭാ തെരഞ്ഞെടുപ്പ് തോൽവിക്ക് പിന്നാലെ സിപിഐഎമ്മിൽ ഉയർന്ന നേതൃത്വ വിമർശനങ്ങളോട് പ്രതികരിച്ച് മുതിർന്ന നേതാവ് പി ജയരാജൻ. തന്റെ ചിത്രം ഉപയോഗിച്ചുള്ള ഫ്ളക്സ് ബോർഡുകളും പ്രചാരണങ്ങളും ഉടൻ അവസാനിപ്പിക്കണമെന്ന് അദ്ദേഹം ആവശ്യപ്പെട്ടു. സോഷ്യൽ മീഡിയയിൽ തന്നെ പ്രകീർത്തിച്ചും പാർട്ടി നേതൃത്വത്തിലെ ചിലരെ ഇകഴ്ത്തിയും നടത്തുന്ന പ്രചാരണങ്ങൾ പാർട്ടിക്ക് ഗുണകരമല്ലെന്നും പി ജയരാജൻ വ്യക്തമാക്കി.
ഫേസ്ബുക്ക് കുറിപ്പിലൂടെയായിരുന്നു അദ്ദേഹത്തിന്റെ പ്രതികരണം. തെരഞ്ഞെടുപ്പ് പരാജയം പാർട്ടി ഗൗരവമായി പരിശോധിക്കുകയാണെന്നും ആവശ്യമായ തിരുത്തൽ നടപടികൾ സ്വീകരിക്കുമെന്നും അദ്ദേഹം പറഞ്ഞു. അത്തരമൊരു ഘട്ടത്തിൽ നേതാക്കളെ ലക്ഷ്യമിട്ട് പരസ്യ വിമർശനം നടത്തുന്നത് ശരിയായ സമീപനമല്ലെന്നും അദ്ദേഹം ചൂണ്ടിക്കാട്ടി.
“സോഷ്യൽ മീഡിയയിലൂടെ തുറന്ന ചർച്ചകൾ നടത്തുന്നത് ഒഴിവാക്കണം. അഭിപ്രായങ്ങളും വിമർശനങ്ങളും പാർട്ടി നേതൃത്വത്തെ നേരിട്ട് അറിയിക്കണം. ഉൾപാർട്ടി ചർച്ചകളാണ് പ്രോത്സാഹിപ്പിക്കേണ്ടത്,” എന്ന് പി ജയരാജൻ പറഞ്ഞു.
കോൺഗ്രസിൽ കാണുന്ന ഫ്ളക്സ് രാഷ്ട്രീയം സിപിഐഎമ്മിന്റെ സംഘടനാ സംസ്കാരമല്ലെന്നും അദ്ദേഹം കൂട്ടിച്ചേർത്തു. കമ്മ്യൂണിസ്റ്റ് പാർട്ടി തെരഞ്ഞെടുപ്പിനെ മാത്രം മുൻനിർത്തി പ്രവർത്തിക്കുന്ന പ്രസ്ഥാനമല്ലെന്നും വിജയവും പരാജയവും വസ്തുനിഷ്ഠമായി വിലയിരുത്തിയാണ് പാർട്ടി മുന്നോട്ട് പോകുന്നതെന്നും പി ജയരാജൻ പറഞ്ഞു.
പാർട്ടിക്കെതിരെ വലതുപക്ഷ ശക്തികൾ ഇത്തരം സംഭവങ്ങളെ ഉപയോഗിക്കാൻ ശ്രമിക്കുന്നുവെന്നും അദ്ദേഹം മുന്നറിയിപ്പ് നൽകി. തന്റെ ചിത്രം ഉപയോഗിച്ച് സ്ഥാപിച്ച ബോർഡുകൾ നീക്കണമെന്നും സോഷ്യൽ മീഡിയ പ്രചാരണങ്ങൾ അവസാനിപ്പിക്കണമെന്നും അദ്ദേഹം പ്രവർത്തകരോട് അഭ്യർത്ഥിച്ചു.
ബംഗാളിൽ സിപിഐഎം വീണ്ടും ശക്തിപ്രാപിക്കുന്ന സാഹചര്യത്തിൽ കേരളത്തിലെ നിലവിലെ പ്രതിസന്ധിയും പാർട്ടി അതിജീവിക്കുമെന്ന് ആത്മവിശ്വാസം പ്രകടിപ്പിച്ചാണ് പി ജയരാജൻ കുറിപ്പ് അവസാനിപ്പിച്ചത്.