ഉദ്വേഗജനകമായ ട്വിസ്റ്റുകളുമായി ഐപിഎൽ 2026 സീസൺ പ്ലേ ഓഫ് റേസ് അവസാന ഘട്ടത്തിലേക്ക് കടക്കുന്നു. ലീഗ് ഘട്ടത്തിൽ 13 റൗണ്ട് മത്സരങ്ങൾ പൂർത്തിയായപ്പോൾ, നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബംഗളൂരു മാത്രമാണ് നിലവിൽ പ്ലേ ഓഫ് യോഗ്യത ഔദ്യോഗികമായി ഉറപ്പാക്കിയിട്ടുള്ളത്. വിരാട് കോലിയുടെ നേതൃത്വത്തിൽ കിരീടം നിലനിർത്താനുള്ള കുതിപ്പിലാണ് ബംഗളൂരു. ഇനി അവശേഷിക്കുന്ന മൂന്ന് പ്ലേ ഓഫ് സ്ഥാനങ്ങൾക്കായി ഏഴ് ടീമുകളാണ് ആവേശകരമായ പോരാട്ടത്തിലുള്ളത്.
നിലവിൽ ഒരു മത്സരം ബാക്കിനിൽക്കെ 16 പോയിന്റുമായി ഗുജറാത്ത് ടൈറ്റൻസ് പട്ടികയിൽ രണ്ടാം സ്ഥാനത്തുണ്ട്. ഗുജറാത്ത് പ്ലേ ഓഫിന്റെ തൊട്ടരികിലാണെങ്കിലും സാങ്കേതികമായി സ്ഥാനം ഉറപ്പിച്ചിട്ടില്ല. ഇന്ന് നടക്കുന്ന ചെന്നൈ സൂപ്പർ കിങ്സ് – സൺറൈസേഴ്സ് ഹൈദരാബാദ് മത്സരത്തിൽ ഹൈദരാബാദ് ജയിക്കുകയോ, അല്ലെങ്കിൽ ലഖ്നൗ സൂപ്പർ ജയന്റ്സ് രാജസ്ഥാൻ റോയൽസിനെ തോൽപ്പിക്കുകയോ ചെയ്താൽ ഗുജറാത്തിന് പ്ലേ ഓഫ് ഉറപ്പിക്കാം. ചെന്നൈക്കെതിരെയുള്ള തങ്ങളുടെ അവസാന മത്സരത്തിൽ ജയിച്ചാൽ ഗുജറാത്തിന് ആദ്യ രണ്ട് സ്ഥാനങ്ങളിൽ ഒന്നിലെത്താം. 14 പോയിന്റുള്ള ഹൈദരാബാദിന് ഇനിയുള്ള ചെന്നൈ, ബംഗളൂരു മത്സരങ്ങളിൽ ഒന്നിൽ ജയിച്ചാൽ പ്ലേ ഓഫിൽ കടക്കാം. രണ്ടും തോറ്റാൽ നെറ്റ് റൺറേറ്റിനെ ആശ്രയിക്കേണ്ടി വരും.
തുടർച്ചയായ ആറ് പരാജയങ്ങളോടെ പഞ്ചാബ് കിങ്സിന്റെ പ്ലേ ഓഫ് സാധ്യതകൾ മങ്ങിയിരിക്കുകയാണ്. 13 പോയിന്റുള്ള പഞ്ചാബിന് ലഖ്നൗവിനെതിരെയുള്ള അവസാന മത്സരത്തിൽ ജയിച്ചാൽ 15 പോയിന്റിലെത്താം. എന്നാൽ ചെന്നൈ, ഹൈദരാബാദ്, രാജസ്ഥാൻ എന്നിവരിൽ ഒരു ടീം മാത്രമേ 16 പോയിന്റിൽ എത്താവൂ എന്നതും കൊൽക്കത്ത ഒരു മത്സരമെങ്കിലും തോൽക്കണമെന്നതും പഞ്ചാബിന് അത്യാവശ്യമാണ്. അതേസമയം, 12 പോയിന്റുള്ള ചെന്നൈക്ക് ഹൈദരാബാദ്, ഗുജറാത്ത് ടീമുകൾക്കെതിരെയുള്ള ഇനിയുള്ള രണ്ട് മത്സരങ്ങളും ജയിച്ചാൽ 16 പോയിന്റോടെ സുരക്ഷിതമായി പ്ലേ ഓഫിലെത്താം.
സമാനമായി 12 പോയിന്റുള്ള രാജസ്ഥാൻ റോയൽസിന് ലഖ്നൗ, മുംബൈ ടീമുകൾക്കെതിരെയുള്ള അവശേഷിക്കുന്ന രണ്ട് മത്സരങ്ങളും ജയിച്ചാൽ നേരിട്ട് പ്ലേ ഓഫ് യോഗ്യത നേടാം. 11 പോയിന്റുള്ള കൊൽക്കത്ത നൈറ്റ് റൈഡേഴ്സിന് മുംബൈ, ഡൽഹി ടീമുകളെ തോൽപ്പിച്ചാലും പരമാവധി 15 പോയിന്റേ ലഭിക്കൂ. പഞ്ചാബ് അവസാന മത്സരം തോൽക്കുകയും ചെന്നൈ, ഹൈദരാബാദ്, രാജസ്ഥാൻ എന്നിവരിൽ ഒരു ടീം മാത്രം 16 പോയിന്റിൽ എത്തുകയും ചെയ്താൽ കൊൽക്കത്തയ്ക്ക് സാധ്യതയുണ്ട്. ഒരു മത്സരം ബാക്കിനിൽക്കെ 12 പോയിന്റുള്ള ഡൽഹി ക്യാപിറ്റൽസാണ് റേസിൽ ഏറ്റവും പിന്നിൽ. അവസാന മത്സരത്തിൽ കൊൽക്കത്തയെ തോൽപ്പിക്കുന്നതിനൊപ്പം രാജസ്ഥാനും ചെന്നൈയും ഇനിയുള്ള എല്ലാ മത്സരങ്ങളും തോൽക്കുകയും ലഖ്നൗ പഞ്ചാബിനെ പരാജയപ്പെടുത്തുകയും ചെയ്താൽ മാത്രമേ ഡൽഹിക്ക് 14 പോയിന്റോടെ പ്ലേ ഓഫ് സ്വപ്നം കാണാൻ സാധിക്കൂ.