തിരുവനന്തപുരം: പുതിയ യുഡിഎഫ് സർക്കാരിന്റെ സത്യപ്രതിജ്ഞാ ചടങ്ങിൽ ജാതിപ്പേര് ഉപയോഗിച്ചെന്ന രീതിയിൽ ഉയർന്ന വിമർശനങ്ങളോട് കടുത്ത വൈകാരിക ഭാഷയിൽ പ്രതികരിച്ച് മുഖ്യമന്ത്രി വി.ഡി. സതീശൻ. തന്റെ ഔദ്യോഗിക രേഖകളിലുള്ള പൂർണ്ണമായ പേര് വായിക്കുക മാത്രമാണ് ചെയ്തതെന്നും അതിൽ അച്ഛന്റെ പേര് ഉൾപ്പെട്ടിട്ടുണ്ടെന്നും അദ്ദേഹം വ്യക്തമാക്കി. സത്യപ്രതിജ്ഞാ സമയത്ത് അച്ഛന്റെ പേര് പറയാനായാണ് താൻ വടശ്ശേരി ദാമോദരൻ മേനോൻ സതീശൻ എന്ന് പൂർണ്ണമായി വായിച്ചതെന്നും, അതിൽ ജാതി പ്രഖ്യാപനമില്ലെന്നും മന്ത്രിസഭാ യോഗത്തിന് ശേഷം വാർത്താസമ്മേളനത്തിൽ മാധ്യമപ്രവർത്തകരുടെ ചോദ്യങ്ങൾക്ക് മറുപടിയായി മുഖ്യമന്ത്രി പറഞ്ഞു.
ജീവിതത്തിലെ ഏറ്റവും വലിയൊരു പദവിയിൽ എത്തിയപ്പോൾ തന്റെ അമ്മയെയും മനസ്സിൽ ഓർത്തിരുന്നുവെന്ന് മുഖ്യമന്ത്രി പറഞ്ഞു. അമ്മയുടെ പേര് കൂടി ഉൾപ്പെടുത്താൻ അവിടെ നിയമപരമായ അവസരമുണ്ടായിരുന്നെങ്കിൽ അതും താൻ പറയുമായിരുന്നു. താൻ ആദ്യമായി എംഎൽഎ ആകുന്നതിന് മുൻപ് തന്നെ മരണപ്പെട്ടുപോയവരാണ് മാതാപിതാക്കൾ രണ്ടുപേരും. അങ്ങനെയുള്ള സാഹചര്യത്തിൽ ജീവിതത്തിലെ അസുലഭ നിമിഷത്തിൽ അവരെ ഓർക്കുന്നതും അവരുടെ പേര് പറയുന്നതും വലിയ അഭിമാനവും സന്തോഷവുമുള്ള കാര്യമാണ്. അച്ഛന്റെ ഔദ്യോഗിക പേര് അത് തന്നെയായതുകൊണ്ട് അത് പറഞ്ഞതിൽ എന്താണ് തെറ്റെന്നും, പാസ്പോർട്ടിലും മറ്റ് ഔദ്യോഗിക രേഖകളിലും തന്റെ പേര് ഇങ്ങനെ തന്നെയാണ് രേഖപ്പെടുത്തിയിട്ടുള്ളതെന്നും വി.ഡി. സതീശൻ ചോദിച്ചു.
കഴിഞ്ഞദിവസം നടന്ന സത്യപ്രതിജ്ഞാ ചടങ്ങിൽ “വടശ്ശേരി ദാമോദരൻ മേനോൻ സതീശൻ എന്ന ഞാൻ” എന്ന് മുഖ്യമന്ത്രി സത്യപ്രതിജ്ഞ ചൊല്ലിയതിനെതിരെ സമൂഹമാധ്യമങ്ങളിലും പാർട്ടിയിലെ ചില കോണുകളിലും വലിയ രീതിയിൽ ആക്ഷേപങ്ങൾ ഉയർന്നിരുന്നു. മുൻപ് 2021 മെയ് 24-ന് നിയമസഭയിൽ എംഎൽഎയായി സത്യപ്രതിജ്ഞ ചെയ്തപ്പോൾ “വി.ഡി. സതീശൻ എന്ന ഞാൻ” എന്ന് മാത്രം പറഞ്ഞ അദ്ദേഹം, മുഖ്യമന്ത്രിയായപ്പോൾ സവർണ്ണ ജാതിവാൽ ഉറക്കെ പ്രഖ്യാപിച്ചത് ശരിയായില്ലെന്നായിരുന്നു വിമർശനം. ചടങ്ങിൽ പരമ്പരാഗതമായി പാലിച്ചുപോരുന്ന മതേതര വരികളെ മറികടന്ന് വന്ദേഭാരതം ചൊല്ലിയതും അദ്ദേഹത്തിന്റെ മുൻകാല നിലപാടുകൾക്ക് വിരുദ്ധമാണെന്ന് രാഷ്ട്രീയ എതിരാളികളും ആരോപിച്ചിരുന്നു. എന്നാൽ ഇത്തരത്തിലുള്ള എല്ലാ രാഷ്ട്രീയ വിവാദങ്ങളെയും തള്ളിക്കൊണ്ടാണ് ഇത് കേവലം തന്റെ പിതാവിനോടുള്ള ആദരവ് മാത്രമാണെന്ന വിശദീകരണവുമായി മുഖ്യമന്ത്രി നേരിട്ട് രംഗത്തെത്തിയത്.