തിരുവനന്തപുരം: പതിനാറാം കേരള നിയമസഭയുടെ ആദ്യ സമ്മേളനത്തിന് തുടക്കമായി. പുതുതായി തെരഞ്ഞെടുക്കപ്പെട്ട അംഗങ്ങളുടെ സത്യപ്രതിജ്ഞ ചടങ്ങ് രാവിലെ 9 മണിക്ക് ആരംഭിച്ചു. പ്രോട്ടേം സ്പീക്കർ ജി സുധാകരനാണ് അംഗങ്ങൾക്ക് സത്യവാചകം ചൊല്ലിക്കൊടുക്കുന്നത്.
സത്യപ്രതിജ്ഞയ്ക്ക് മുന്നോടിയായി സഭയെ അഭിസംബോധന ചെയ്ത ജി സുധാകരൻ, സഭയുടെ ജനാധിപത്യ പാരമ്പര്യവും ഭരണഘടനാ മൂല്യങ്ങളും ഉയർത്തിപ്പിടിക്കേണ്ടതിന്റെ പ്രാധാന്യം ചൂണ്ടിക്കാട്ടി. മുഖ്യമന്ത്രി, പ്രതിപക്ഷ നേതാവ് ഉൾപ്പെടെയുള്ള അംഗങ്ങളെ അഭിസംബോധന ചെയ്ത ശേഷമാണ് നടപടികൾ ആരംഭിച്ചത്.
അക്ഷരമാല ക്രമത്തിലാണ് അംഗങ്ങളുടെ സത്യപ്രതിജ്ഞ നടക്കുന്നത്. ആദ്യമായി ഫിഷറീസ് മന്ത്രി വി ഇ അബ്ദുൾ ഗഫൂർ സത്യപ്രതിജ്ഞ ചെയ്തു. തുടർന്ന് പാറക്കൽ അബ്ദുല്ലയും കെ എം അഭിജിത്തും അംഗത്വം ഏറ്റെടുത്തു. ആദ്യഘട്ടത്തിൽ സത്യപ്രതിജ്ഞ ചെയ്ത അംഗങ്ങൾ ദൈവനാമത്തിലാണ് സത്യവാചകം ചൊല്ലിയത്.
നിയമസഭയിലെ തുടർ നടപടികൾ സ്പീക്കർ തെരഞ്ഞെടുപ്പ് പൂർത്തിയാകുന്നതുവരെ പ്രോട്ടേം സ്പീക്കറുടെ നിയന്ത്രണത്തിലായിരിക്കും നടക്കുക. പുതിയ സഭയുടെ ആദ്യ ദിനം സംസ്ഥാന രാഷ്ട്രീയത്തിൽ പുതിയ തുടക്കത്തിനും പുതിയ പ്രതീക്ഷകൾക്കും വഴിയൊരുക്കുന്നതായാണ് വിലയിരുത്തൽ.