ന്യൂഡൽഹി: ഇൻഡ്യ മുന്നണിയുടെ യോഗത്തിൽ അദാനി ഗ്രൂപ്പുമായുള്ള ബന്ധവും സിപിഐഎമ്മിനെതിരായ ആരോപണങ്ങളും ചർച്ചയായതോടെ രാഹുൽ ഗാന്ധിയും സിപിഐഎം പ്രതിനിധി ജോൺ ബ്രിട്ടാസും തമ്മിൽ വാക്കേറ്റം. കേരളത്തിലെ രാഷ്ട്രീയ സാഹചര്യങ്ങളും അദാനി വിഷയവും ചർച്ചയിലെ പ്രധാന വിഷയങ്ങളായി മാറിയതോടെയാണ് യോഗത്തിൽ അഭിപ്രായവ്യത്യാസങ്ങൾ പ്രകടമായത്.
കേരള നിയമസഭാ തിരഞ്ഞെടുപ്പ് പ്രചാരണ വേളയിൽ സിപിഐഎമ്മും ബിജെപിയും തമ്മിൽ ധാരണയുണ്ടെന്ന രാഹുൽ ഗാന്ധിയുടെ മുൻപരാമർശത്തിനെതിരെ ജോൺ ബ്രിട്ടാസ് യോഗത്തിൽ ശക്തമായ പ്രതിഷേധം രേഖപ്പെടുത്തി. സഖ്യകക്ഷികളായ പാർട്ടികൾക്കെതിരെ ഇത്തരത്തിലുള്ള ആരോപണങ്ങൾ ഉന്നയിക്കുന്നത് ഇൻഡ്യ മുന്നണിയുടെ ഐക്യത്തെ ബാധിക്കുമെന്ന് അദ്ദേഹം ചൂണ്ടിക്കാട്ടി.
കോൺഗ്രസിലെ മറ്റ് നേതാക്കൾ ഇത്തരം രാഷ്ട്രീയ വിമർശനങ്ങൾ ഉന്നയിക്കുന്നത് ഒരു പരിധിവരെ മനസ്സിലാക്കാമെങ്കിലും, രാഹുൽ ഗാന്ധിയോ മല്ലികാർജുൻ ഖാർഗെയോ പോലുള്ള ദേശീയ നേതാക്കൾ തന്നെ ഇത്തരം ആരോപണങ്ങൾ ഉന്നയിക്കുന്നത് മുന്നണിയുടെ വിശ്വാസ്യതയെ ബാധിക്കുമെന്ന് ജോൺ ബ്രിട്ടാസ് അഭിപ്രായപ്പെട്ടു.
ഇതിനിടെ, സിപിഐ ജനറൽ സെക്രട്ടറി ഡി. രാജയുടെ വിമർശനത്തിന് മറുപടിയായി തന്റെ ആരോപണങ്ങൾക്ക് വ്യക്തമായ അടിസ്ഥാനമുണ്ടെന്ന് രാഹുൽ ഗാന്ധി ആവർത്തിച്ചു. തുടർന്ന് ചർച്ച അദാനി വിഷയത്തിലേക്ക് നീങ്ങുകയായിരുന്നു. കേരളത്തിൽ അദാനി ഗ്രൂപ്പിന് പദ്ധതികൾ നടപ്പാക്കാൻ അവസരം നൽകിയതും ഇടതുപക്ഷ സർക്കാരാണെന്ന് രാഹുൽ ഗാന്ധി ചൂണ്ടിക്കാട്ടിയതായി യോഗത്തിൽ പങ്കെടുത്തവർ അറിയിച്ചു.
എന്നാൽ അദാനിയുമായി കേരളത്തിൽ ആദ്യ കരാറുകൾ ഉണ്ടായത് കോൺഗ്രസ് ഭരണകാലത്താണെന്ന് ജോൺ ബ്രിട്ടാസ് മറുപടി നൽകി. ഇതോടെയാണ് ഇരുപക്ഷവും തമ്മിലുള്ള ചർച്ച കൂടുതൽ സജീവമായത്.
അതേസമയം, തന്റെ പരാമർശങ്ങളെക്കുറിച്ചുള്ള വിമർശനങ്ങൾ ഉൾക്കൊള്ളുന്നുവെന്ന് രാഹുൽ ഗാന്ധി യോഗത്തിൽ വ്യക്തമാക്കിയതായി റിപ്പോർട്ടുകളുണ്ട്. വിഷയത്തിൽ സിപിഐഎമ്മുമായി പ്രത്യേക ചർച്ച നടത്താൻ തയ്യാറാണെന്നും അദ്ദേഹം അറിയിച്ചു. യോഗത്തിന് ശേഷം ഈ വിഷയത്തിൽ കൂടുതൽ വിശദമായ സംഭാഷണം നടത്താമെന്ന് രാഹുൽ ഗാന്ധി ജോൺ ബ്രിട്ടാസിനെ അറിയിച്ചതായും സൂചനകളുണ്ട്.
എന്നാൽ പാർട്ടി നേതൃത്വവുമായി കൂടിയാലോചിച്ച ശേഷം മാത്രമേ ഇത്തരമൊരു ചർച്ചയ്ക്ക് തീരുമാനമെടുക്കാനാകൂവെന്ന് ജോൺ ബ്രിട്ടാസ് മറുപടി നൽകിയതായാണ് വിവരം. ഇൻഡ്യ മുന്നണിയുടെ യോഗത്തിൽ സിപിഐഎമ്മിനെ പ്രതിനിധീകരിച്ച് പങ്കെടുത്തത് ജോൺ ബ്രിട്ടാസായിരുന്നു.
സിപിഐഎമ്മും ബിജെപിയും തമ്മിൽ ധാരണയുണ്ടെന്ന ആരോപണത്തിൽ കോൺഗ്രസ് നേതൃത്വം ഔദ്യോഗിക വിശദീകരണം നൽകണമെന്നാവശ്യപ്പെട്ട് സിപിഐഎം നേരത്തേ രംഗത്തെത്തിയിരുന്നു. പാർട്ടി ജനറൽ സെക്രട്ടറി എം.എ. ബേബി കോൺഗ്രസ് അധ്യക്ഷൻ മല്ലികാർജുൻ ഖാർഗെയ്ക്ക് കത്തയച്ച് പ്രതിഷേധം അറിയിക്കുകയും ചെയ്തിരുന്നു. കത്തിന്റെ പകർപ്പ് ഇൻഡ്യ മുന്നണിയിലെ മറ്റ് കക്ഷികൾക്കും കൈമാറിയിരുന്നു.
സഖ്യകക്ഷികൾ തമ്മിലുള്ള അഭിപ്രായവ്യത്യാസങ്ങൾ പരസ്യമായി ചർച്ചയായെങ്കിലും, മുന്നണിയുടെ ഐക്യം നിലനിർത്തുന്നതിനുള്ള രാഷ്ട്രീയ സംഭാഷണങ്ങൾ തുടരുമെന്നാണ് നേതാക്കൾ വ്യക്തമാക്കുന്നത്.