റിയാദ്: പതിനെട്ട് വർഷത്തിലേറെയായി സൗദി അറേബ്യയിലെ ജയിലിൽ കഴിയുന്ന കോഴിക്കോട് കോടമ്പുഴ സ്വദേശി അബ്ദുൽ റഹീമിന്റെ മോചന ഉത്തരവിൽ ഔദ്യോഗികമായി ഒപ്പുവെച്ചു. റഹീമിന്റെ മോചനത്തിനായുള്ള അന്തിമ ഉത്തരവിൽ ബന്ധപ്പെട്ട അധികൃതർ ഒപ്പുവെച്ചതായി റഹീം നിയമസഹായ സമിതി ഭാരവാഹികൾ സ്ഥിരീകരിച്ചു. ഇതോടെ സൌദി ജയിലിൽ നിന്നുള്ള അദ്ദേഹത്തിന്റെ മോചനം പൂർണ്ണമായി ഉറപ്പായിരിക്കുകയാണ്.
ഇനി അദ്ദേഹം ജയിലിൽ നിന്ന് ഇറങ്ങി നാട്ടിലേക്ക് മടങ്ങുന്നതിന് രാജ്യം വിടാനുള്ള എമിഗ്രേഷൻ നടപടികൾ മാത്രമാണ് പൂർത്തിയാകാനുള്ളത്. ഇതിനായുള്ള എക്സിറ്റ് വിസയും ഇതിനകം തന്നെ ലഭ്യമായിട്ടുണ്ടെന്ന് നിയമസഹായ സമിതി വ്യക്തമാക്കി. വരും ദിവസങ്ങളിൽ തന്നെ എമിഗ്രേഷൻ നടപടിക്രമങ്ങൾ പൂർത്തിയാക്കി അബ്ദുൽ റഹീം കേരളത്തിൽ തിരിച്ചെത്തുമെന്നാണ് പ്രതീക്ഷിക്കുന്നത്. പുതിയ യുഡിഎഫ് സർക്കാരിന്റെ പ്രവാസി കാര്യ മന്ത്രാലയവും ലോകമെമ്പാടുമുള്ള മലയാളി സമൂഹവും ഏറെ ആശ്വാസത്തോടെയാണ് ഈ വാർത്തയെ വരവേൽക്കുന്നത്.