തിരുവനന്തപുരം: സിഎംആർഎൽ–എക്സാലോജിക് സാമ്പത്തിക ഇടപാട് കേസുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയന്റെ വസതിയുൾപ്പെടെ വിവിധ ഇടങ്ങളിൽ എൻഫോഴ്സ്മെന്റ് ഡയറക്ടറേറ്റ് (ഇഡി) പരിശോധന നടത്തുന്നതിനിടെ രാഷ്ട്രീയ ആരോപണവുമായി ബിനീഷ് കോടിയേരി രംഗത്തെത്തി. മുഖ്യമന്ത്രി വി ഡി സതീശനും കേന്ദ്ര നേതൃത്വവും തമ്മിലുള്ള കൂടിക്കാഴ്ചയ്ക്ക് പിന്നാലെയാണ് ഇഡി നടപടി ഉണ്ടായതെന്ന സൂചന ഉയർത്തിക്കാട്ടിയാണ് ബിനീഷിന്റെ പ്രതികരണം.
ഫേസ്ബുക്ക് കുറിപ്പിലൂടെയായിരുന്നു ബിനീഷ് കോടിയേരിയുടെ വിമർശനം. മുഖ്യമന്ത്രി വി ഡി സതീശൻ പ്രധാനമന്ത്രിയെ കണ്ടതിന് പിന്നാലെ പിണറായി വിജയന്റെ വീട്ടിൽ ഇഡി പരിശോധന നടന്നുവെന്നാണ് അദ്ദേഹം ആരോപിച്ചത്. പിണറായി വിജയനെ ലക്ഷ്യമിട്ടുള്ള നടപടികൾ രാഷ്ട്രീയ ലക്ഷ്യത്തോടെയാണെന്നും അദ്ദേഹം പറഞ്ഞു.
പിണറായി വിജയന്റെ വീട്ടിൽ പരിശോധന നടത്തിയിട്ടും യാതൊരു അനധികൃത കാര്യവും കണ്ടെത്താനാകില്ലെന്നും, സിപിഎം നേതൃത്വത്തെ സമ്മർദത്തിലാക്കാനുള്ള ശ്രമങ്ങളാണ് നടക്കുന്നതെന്നും ബിനീഷ് കോടിയേരി അഭിപ്രായപ്പെട്ടു. കോൺഗ്രസ് നേതാക്കളുടെ വീടുകളിലും സമാനമായ അന്വേഷണം നടന്നാൽ രാഷ്ട്രീയ സാഹചര്യം തന്നെ മാറിയേക്കാമെന്ന പരിഹാസപരമായ പരാമർശവും അദ്ദേഹം നടത്തി.
അതേസമയം, പരിശോധനയ്ക്കിടെ മുൻ മന്ത്രി മുഹമ്മദ് റിയാസും ശക്തമായ രാഷ്ട്രീയ പ്രതികരണവുമായി രംഗത്തെത്തി. സംഘപരിവാർ രാഷ്ട്രീയത്തെ എതിർക്കുന്ന നിലപാടിൽ നിന്ന് പിന്നോട്ടില്ലെന്നും രാഷ്ട്രീയമായും നിയമപരമായും പോരാട്ടം തുടരുമെന്നുമാണ് അദ്ദേഹത്തിന്റെ പ്രതികരണം.
ഇതിനിടെ സിഎംആർഎൽ–മാസപ്പടി കേസുമായി ബന്ധപ്പെട്ട് വീണാ വിജയന്റെ മൊഴിയും ഇഡി രേഖപ്പെടുത്തുന്നുണ്ട്. തിരുവനന്തപുരത്തെ വസതിയിലെത്തിയാണ് ഉദ്യോഗസ്ഥർ വിവരശേഖരണം നടത്തുന്നത്. പിണറായി വിജയന്റെ തിരുവനന്തപുരത്തെയും കണ്ണൂരിലെയും വസതികൾ, സിഎംആർഎൽ ഓഫീസ്, കമ്പനി എംഡി ശശിധരൻ കർത്തയുടെ വീട്, മുഹമ്മദ് റിയാസിന്റെ കോഴിക്കോട് വസതി എന്നിവ ഉൾപ്പെടെ പത്തോളം കേന്ദ്രങ്ങളിലാണ് പരിശോധന പുരോഗമിക്കുന്നത്.
സിഎംആർഎൽ–എക്സാലോജിക് ഇടപാടുകളിൽ ഇഡിക്ക് അന്വേഷണം തുടരാമെന്ന ഹൈക്കോടതി ഉത്തരവിന് പിന്നാലെയാണ് പരിശോധന ശക്തമാക്കിയത്. സാമ്പത്തിക ഇടപാടുകളുമായി ബന്ധപ്പെട്ട രേഖകളും വിശദാംശങ്ങളും ശേഖരിക്കുന്നതിനായാണ് നടപടി തുടരുന്നതെന്നാണ് സൂചന.