ചെന്നൈ: ജന്മദിനത്തോടനുബന്ധിച്ച് നടി തൃഷ കൃഷ്ണൻ തിരുപ്പതി ക്ഷേത്രത്തിൽ ദർശനം നടത്തി. നടൻ വിജയ് സ്ഥാപിച്ച തമിഴക വെട്രി കഴകം (ടിവികെ) പതാകയുടെ നിറങ്ങളുള്ള ഷാൾ ധരിച്ചാണ് തൃഷ ക്ഷേത്രത്തിൽ എത്തിയതെന്ന് പുറത്തുവന്ന ദൃശ്യങ്ങൾ സൂചിപ്പിക്കുന്നു. ഇതിനെ വിജയ്ക്ക് പരോക്ഷ പിന്തുണയായി പലരും വിലയിരുത്തുന്നു.
തമിഴ്നാട്ടിലെ നിയമസഭാ തിരഞ്ഞെടുപ്പിന്റെ വോട്ടെണ്ണൽ ദിനത്തോടൊപ്പമാണ് തൃഷയുടെ ജന്മദിനം എന്ന പ്രത്യേകതയും ശ്രദ്ധേയമാണ്. ഇതോടെ നടിയുടെ ക്ഷേത്രദർശനവും വേഷധാരണവും രാഷ്ട്രീയ ചർച്ചകൾക്ക് വഴിവെച്ചു.
വിജയ്യുടെ രാഷ്ട്രീയ പ്രവേശനത്തിന് പിന്നാലെ തൃഷയും സാമൂഹിക മാധ്യമങ്ങളിൽ വലിയ ചർച്ചാവിഷയമായി മാറിയിരുന്നു. ഇരുവരുടെയും സൗഹൃദം എതിര് രാഷ്ട്രീയകക്ഷികള് വിമര്ശന ആയുധമാക്കിയതും ശ്രദ്ധേയമാണ്. വിജയ്യുടെ വ്യക്തിജീവിതവുമായി ബന്ധപ്പെട്ട വിവാദങ്ങളിലും നടിയുടെ പേര് ഉയർന്നുവന്നിരുന്നു.
വോട്ടെടുപ്പിന് പിന്നാലെ വിരലിൽ മഷി പുരട്ടിയ ചിത്രം തൃഷ സമൂഹമാധ്യമങ്ങളിൽ പങ്കുവെച്ചതും വലിയ ചര്ച്ചയ്ക്കിടയാക്കി. ഗില്ലി എന്ന ചിത്രത്തിലെ ഗാനത്തോടൊപ്പമാണ് ചിത്രം പങ്കുവെച്ചത്. അതിലെ വിസിൽ ശബ്ദം ടിവികെയുടെ ചിഹ്നവുമായി ബന്ധപ്പെടുത്തി വ്യാഖ്യാനിക്കപ്പെട്ടിരുന്നു.
ഇതിനിടെ, ഈ തെരഞ്ഞെടുപ്പ് ഫലം തമിഴക വെട്രി കഴകംക്ക് നിർണായകമാണ്. ദ്രാവിഡ മുന്നേറ്റ കഴകം നേതൃത്വത്തിലുള്ള സഖ്യത്തെയും എഐഎഡിഎംകെ–ഭാരതീയ ജനതാ പാർട്ടി സഖ്യത്തെയും നേരിടുന്ന സാഹചര്യത്തിലാണ് പാർട്ടി മത്സരിക്കുന്നത്.
സിനിമയിൽ നിന്ന് രാഷ്ട്രീയത്തിലേക്ക് കടന്ന നേതാക്കളായ എം.ജി. രാമചന്ദ്രൻ, ജയലളിത എന്നിവരുടെ പാത പിന്തുടരുകയാണ് വിജയ് ലക്ഷ്യമിടുന്നതെന്ന വിലയിരുത്തലുകളും ഉയരുന്നു.