തിരുവനന്തപുരം: സംസ്ഥാനത്ത് പകർച്ചവ്യാധികൾ വ്യാപകമായ സാഹചര്യത്തിൽ പ്രതിരോധ പ്രവർത്തനങ്ങൾ ശക്തമാക്കി സർക്കാർ. ആരോഗ്യ വിദഗ്ധരെ ഉൾപ്പെടുത്തി ഹൈ പവർ കമ്മിറ്റി രൂപീകരിച്ചതായി ആരോഗ്യമന്ത്രി കെ മുരളീധരൻ വാർത്താസമ്മേളനത്തിൽ അറിയിച്ചു. പകർച്ചവ്യാധികൾ കൂടുന്നത് ആരുടെയും തെറ്റല്ലെന്നും പരിശോധനകൾ വിപുലമാക്കിയിട്ടുണ്ടെന്നും മന്ത്രി വ്യക്തമാക്കി.
മഴക്കാലപൂർവ ശുചീകരണ പ്രവർത്തനങ്ങൾ തെരഞ്ഞെടുപ്പുകൾ കാരണം തടസ്സപ്പെട്ടതായും മന്ത്രി വിശദീകരിച്ചു. പകർച്ചവ്യാധി നിയന്ത്രണം, മരുന്നുകളുടെ ലഭ്യത, സംഭരണം തുടങ്ങിയ വിഷയങ്ങളിൽ വിശദമായ പഠനം നടത്തി റിപ്പോർട്ട് സമർപ്പിക്കാനാണ് ഹൈ പവർ കമ്മിറ്റി രൂപീകരിച്ചത്. എസ് എസ് ലാൽ ചെയർമാനായും പ്രിൻസിപ്പൽ സെക്രട്ടറി ഡോ. ശർമിള മേരി ജോസഫ് കോ-ഓർഡിനേറ്ററായും കമ്മിറ്റിക്ക് നേതൃത്വം നൽകും. ജില്ലാതല പ്രതിരോധ പ്രവർത്തനങ്ങൾ ഏകോപിപ്പിക്കുന്നതിനായി ആക്ഷൻ കമ്മിറ്റികളും രൂപീകരിച്ചിട്ടുണ്ട്.
പ്രത്യേക മേഖലകളിൽ നിപ വൈറസ് വ്യാപന സാധ്യത സംബന്ധിച്ച് പരിശോധന നടത്തുമെന്നും മന്ത്രി അറിയിച്ചു. സംസ്ഥാനത്ത് ആവശ്യമായ എല്ലാ മരുന്നുകളും നിലവിൽ സ്റ്റോക്കുണ്ടെന്നും വൃത്തിഹീനമായ ഭക്ഷണശാലകൾ അടച്ചുപൂട്ടാനും മിനറൽ വാട്ടറിന്റെ ഗുണനിലവാരം പരിശോധിക്കാനും നിർദേശം നൽകിയിട്ടുണ്ടെന്നും അദ്ദേഹം പറഞ്ഞു.
അതേസമയം, വയനാട്ടിൽ ഒരു വിദ്യാർത്ഥിക്ക് കൂടി ഷിഗെല്ല സ്ഥിരീകരിച്ചു. കോളിയാടി മാർ ബസേലിയോസ് എയുപി സ്കൂളിലെ വിദ്യാർത്ഥിക്കാണ് രോഗം സ്ഥിരീകരിച്ചത്. സ്വകാര്യ ആശുപത്രിയിൽ നിന്ന് പരിശോധനയ്ക്കായി അയച്ച സാമ്പിളിലാണ് രോഗബാധ കണ്ടെത്തിയത്. നിലവിൽ ബത്തേരിയിലെ വിവിധ ആശുപത്രികളിലായി 21 പേർ ചികിത്സയിലാണ്. ഇതോടെ രോഗബാധിതരായ വിദ്യാർത്ഥികളുടെ എണ്ണം 17 ആയി. വയനാട് ജില്ലയിൽ മാത്രം 538 വിദ്യാർത്ഥികൾ രോഗലക്ഷണങ്ങളോടെ ചികിത്സ തേടിയിട്ടുണ്ട്.
സംസ്ഥാനത്ത് ജനുവരി മുതൽ ഈ മാസം വരെ 146 ഷിഗെല്ല കേസുകളാണ് റിപ്പോർട്ട് ചെയ്തത്. ഈ മാസം മാത്രം 70 കേസുകൾ സ്ഥിരീകരിച്ചു. ഷിഗെല്ല ബാധിച്ച് ഇതുവരെ അഞ്ച് മരണങ്ങളാണ് റിപ്പോർട്ട് ചെയ്തത്. മലപ്പുറം, കോഴിക്കോട്, തൃശൂർ ജില്ലകളിലാണ് മരണങ്ങൾ റിപ്പോർട്ട് ചെയ്തത്. ഏറ്റവും കൂടുതൽ കേസുകൾ റിപ്പോർട്ട് ചെയ്തത് കോഴിക്കോട് ജില്ലയിലാണ്. ഈ മാസം റിപ്പോർട്ട് ചെയ്ത 22 കേസുകൾ ഉൾപ്പെടെ ജില്ലയിൽ ആകെ 74 കേസുകളാണ് രേഖപ്പെടുത്തിയിരിക്കുന്നത്.