തിരുവനന്തപുരം: ഓണക്കാല റേഷൻ വിതരണം തിങ്കളാഴ്ച മുതൽ ആരംഭിക്കും. വിലക്കയറ്റം നിയന്ത്രിക്കുന്നതിനായി വിപണിയിൽ സർക്കാർ ഇടപെടുമെന്ന് മന്ത്രി അനൂപ് ജേക്കബ് അറിയിച്ചു.
മഞ്ഞ കാർഡ് ഉടമകൾക്ക് 30 കിലോ അരിയും രണ്ട് കിലോ ഗോതമ്പും സൗജന്യമായി ലഭിക്കും. കൂടാതെ മൂന്ന് പാക്കറ്റ് ആട്ട ഏഴ് രൂപ നിരക്കിലും വിതരണം ചെയ്യും.
പിങ്ക് കാർഡിലെ ഓരോ അംഗത്തിനും നാല് കിലോ അരിയും ഒരു കിലോ ഗോതമ്പും സൗജന്യമായി ലഭിക്കും. ആട്ട ഒമ്പത് രൂപ നിരക്കിലും വിതരണം ചെയ്യും.
നീല കാർഡിലുള്ള ഓരോ അംഗത്തിനും രണ്ട് കിലോ അരി കിലോയ്ക്ക് നാല് രൂപ നിരക്കിലും, രണ്ട് കിലോ സ്പെഷൽ ഗോതമ്പ് കിലോയ്ക്ക് 8.70 രൂപ നിരക്കിലും, മൂന്ന് കിലോ അരി കിലോയ്ക്ക് 10.90 രൂപ നിരക്കിലും ലഭിക്കും. താലൂക്കിലെ സ്റ്റോക്കിന് അനുസരിച്ച് ഓരോ കാർഡിനും നാല് കിലോ വരെ ആട്ട കിലോയ്ക്ക് 17 രൂപ നിരക്കിൽ വിതരണം ചെയ്യും.
ഓഗസ്റ്റ് 10 മുതൽ അധികവിഹിതമായി പരമാവധി 10 കിലോ അരി കിലോയ്ക്ക് 26 രൂപ നിരക്കിൽ ലഭ്യമാക്കുമെന്നും മന്ത്രി അറിയിച്ചു.
അതേസമയം, ലോട്ടറി തൊഴിലാളികൾക്കുള്ള ഓണം ബത്ത സംസ്ഥാന സർക്കാർ വർധിപ്പിച്ചു. ഉത്സവ ബത്തയായി 1,000 രൂപയുടെ വർധനയാണ് പ്രഖ്യാപിച്ചത്. ഇതിന്റെ പ്രയോജനം 26,980 അംഗങ്ങൾക്കും 9,345 പെൻഷൻകാർക്കും ലഭിക്കും. ഇതിനായി 26.47 കോടി രൂപ സർക്കാർ അനുവദിച്ചു.
ഏജന്റുമാർക്കും വിൽപ്പനക്കാർക്കും 8,500 രൂപയും പെൻഷൻകാർക്ക് 3,750 രൂപയും ലഭിക്കും. ചരിത്രത്തിലാദ്യമായാണ് ഏജന്റുമാർക്കും പെൻഷൻകാർക്കും ഒരുപോലെ ബത്ത വർധിപ്പിക്കുന്നതെന്ന് മന്ത്രി വ്യക്തമാക്കി.